Txah chiqꞌanni ta chitanhtzelax ebꞌnaj txꞌoj
Salmo tzꞌibꞌnhebꞌilkano yu yaꞌ rey David tet naj yahaw yeko yinh isnuqꞌal bꞌit
10
¿Tzet yinh yuxin kaw nahat hawehilo, Mam Jahawil?¿Tzet yinh xin chawebꞌato habꞌa yet ayayo isyaꞌtajil?
2 Haꞌ naj chiwatxꞌen istxꞌojal kaw chiyikanh isbꞌa naj.
Chaniko naj ishowal yinh mak matzet ayko yipo yanma.
Haꞌtikꞌa naj tuꞌ chiꞌaykꞌay yul isqꞌabꞌ istxꞌojal chiꞌekꞌ yinh isnabꞌal.
3 Naj chiwatxꞌen istxꞌojal kaw chikanh isbꞌa naj yinh tzet choche yanma iswatxꞌeꞌ.
Chal naj tzotiꞌ kꞌul yibꞌanh mak peqꞌ chute isbꞌa,
kat isyahnikanilo naj Komam.
4 Naj txꞌoj, kaw aykanh naj yalni, yuxin mach chissayilo naj Komam Dios;
machi nino chiꞌekꞌ isnabꞌal naj yinh Komam.
5 Haꞌ isbꞌeh naj, kaw kotxannhetikꞌa yinh sunilbꞌal tiempo.
Maxhtikꞌa chistxum naj ta chiꞌapni istzꞌayikal bꞌay chil Komam yinh tzet chiꞌeliko naj. Kaw xin chiyahwa naj yinh makta bꞌay ayko ishowal.
6 Chalni yanma naj hakaꞌ tiꞌ: «Machi hunu mak chinaqꞌni aykꞌayojan. Machi bꞌaqꞌinhal chiwilan isyaꞌtajil,» xhi.
7 Nohnanhetikꞌa istiꞌ naj yu tzꞌaktiꞌ, yebꞌ leqꞌtiꞌal, yebꞌ tzotiꞌ txꞌoj.
Yalanh yaqꞌ naj ayikto takbꞌalkꞌule yebꞌ tzꞌaktiꞌ.
8 Chiꞌok naj majwal ewantajil istiꞌla yaldeahil,
kat ismaqꞌnikamo naj anma mach ismul.
Kaw chiꞌok tꞌanhno naj yinh makta mach chu iskolni isbꞌa.
9 Hakaꞌ noꞌ bꞌalam chebꞌa isbꞌa yul isnhachꞌen,
kat yok naj yilno yinh tzet chu yaykꞌay makta mach chu iskolni isbꞌa yul isqꞌabꞌ.
Haxa yet chiꞌaykꞌay yul isqꞌabꞌ naj xin, kat yinito naj.
10 Chꞌay mokꞌno naj kat iskꞌonhbꞌan isbꞌa hakaꞌ noꞌ bꞌalam,
kat yaykꞌay makta mach chu iskolni isbꞌa yul isqꞌabꞌ naj.
11 Haꞌ yanma naj chihalni hakaꞌ tiꞌ: «Chito nahul yu Komam Dios, chebꞌato sat Komam, mach ixtanhoj,» xhi yanma naj.
12 ¡Mam Jahaw Dios, ahanhwanoj, ikanh haqꞌabꞌ! ¡Mach chanahulnheto ebꞌnaj mebꞌaꞌ chiꞌekꞌyaꞌ yanma!
13 ¿Tzet yinh yuxin chibꞌuchwa naj txꞌoj tawinh, Mam Jahawil?
Chistxumni naj ta machi bꞌaqꞌinhal chiꞌapni istzꞌayikal bꞌay chawil yinh tzet chiꞌeliko naj.
14 Hach chawil istxꞌojal chiswatxꞌe naj tuꞌ.
Chawil tzet chu naj, kat hawaqꞌni ispaj selel istxꞌojal naj.
Mamin, tawinh chikawxi iskꞌul makta machi yip.
Hach chaxhkolwa yinh makta mach ismam yebꞌ mach ismiꞌ.
15 ¡Maqꞌ qꞌaho isqꞌabꞌ naj chiwatxꞌen istxꞌojal!
Ayo isyaꞌtajil yibꞌanh naj txꞌoj masanto yet matxa tzet chiꞌilchalo yinh naj hawu.
16 Haꞌ Komam Jahawil, Yahaw yeko Komam yinh tohbꞌalqꞌinal.
Makta mach chiꞌohtanhen Komam chiꞌilaxilo yul iskonhobꞌ.
17 Mamin, hach tiꞌ hawabꞌe istxah makta chewchotanhe yanma.
Hach hawaqꞌ yip yanma, hawaqꞌni tzet chisqꞌan tawet.
18 Hach tiꞌ chawatxꞌe istoholal yinh makta machi ismam yebꞌ machi ismiꞌ, yebꞌ makta chiꞌetalaxi.
Mamin, matxahojabꞌ chislahiko naj winaj istzꞌunni istxꞌojal,
isnabꞌabꞌti naj ta pojoj hawakoj yet hawatxꞌen naj.