Chiꞌaqꞌlax yuchꞌandios yu istoholal chiswatxꞌe Komam Dios
Salmo tzꞌibꞌnhebꞌilkano yu yaꞌ rey David tet naj yahaw yeko yinh isnuqꞌal bꞌit; yibꞌanh munlabꞌal Mut-labén
9
Mam Jahawil, chaxhinbꞌitnhehan yinh sunil wanmahan,kat inpujbꞌanikꞌojan sunil tzet chikꞌay kokꞌul jilni chawatxꞌe.
2 Tawinh chiwaqꞌ tzalaho wanmahan,
kat inbꞌitnhenan habꞌi yu kaw aykano hawelapnoj.
3 Ebꞌnaj ayko ishowal winhan hayet chimeltzo ebꞌnaj yintaj,
kat yaykꞌay ebꞌnaj, hak tuꞌ xin chu istanhkanilo ebꞌnaj yinh hasat.
4 Hach tiꞌ Mamin, juez hach yinh kaw istoholal winhan.
Tzꞌonhan hach yul hatzꞌonhobꞌal hawatxꞌen istoholal.
5 Chachkachwa yinh anma mach kaxhohtanheni,
hatanhtzenpaxilo ebꞌnaj chiwatxꞌen istxꞌojal.
¡Hobꞌilxakanh isbꞌi ebꞌnaj hawu yinh hunelnhe!
6 Ebꞌnaj ayko ishowal winhan, xahatanhtzelo ebꞌnaj yinh hunelnhe.
Hatanhtzenpaxilo iskonhobꞌ ebꞌnaj.
Hach hatanhtzekaniloj, matxa xin chibꞌinahi.
7 Yajaꞌ wal Komam, Yahaw yinh sunilbꞌal ej tiempo.
Tzꞌonhan yul istzꞌonhobꞌal yilni yinh tzet chiꞌeliko anma.
8 Haꞌ Komam chiꞌilni yinh tzet chiꞌeliko sunil anma yul sat yibꞌanhqꞌinal tiꞌ yinh kaw istoholal,
kat yaqꞌni ispaj selel tet, hatatikꞌa tzet chiswatxꞌe.
9 Haꞌ Komam Jahawil chikolni makta chiꞌetalaxi,
haꞌ chitanheni yinh ej isyaꞌtajil.
10 Haꞌ mak yohta habꞌi chikawxi iskꞌul tawinh.
Machi bꞌaqꞌinhal chabꞌejkano makta chaxhsayni.
11 Bꞌitnhewe Komam Jahawil ay bꞌey konhobꞌ Sión.
Halwekꞌo tet ej konhobꞌ yinh tzet iswatxꞌe Komam.
12 Chisnati Komam makta chimalto ischikꞌil, mach chisnahulnheto Komam isyaꞌtajil tuꞌ.
Haꞌ mak chiwatxꞌen istxꞌojal yinh anma chꞌay isyaꞌtajil yibꞌanh yu Komam.
13 Tzꞌayojabꞌ hakꞌul winhan, Mamin.
Il yinh tzet chinutelaxan yu ebꞌnaj chichiwa iskꞌul winhan.
Hach tiꞌ chinawikanhan yul isqꞌabꞌ ispultahil kamikal,
14 chiwalnojan tet anma ay bꞌey istiꞌ ispultahil konhobꞌ Jerusalén hakꞌulchꞌanil.
Chiwalnipaxojan ta kaw ay tzalahilal yul wanmahan yuto kinhakolan yul isqꞌabꞌ mak ayko ishowal winhan.
15 Haꞌ anma mach kaxhohtanheni, haꞌtikꞌa aykꞌayto yul holan watxꞌebꞌil yu.
Iskankano txꞌapno yoj yul latzꞌabꞌ ebꞌabꞌil yu.
16 Isyelo isbꞌa Komam Jahawil yu istoholal iswatxꞌe,
yaykꞌaykano makta chiwatxꞌen istxꞌojal yul latzꞌabꞌ ayayo yu.
17 Sunil anma chiwatxꞌen istxꞌojal, chiꞌalaxto bꞌay ay kambꞌal bꞌey seol,
hakpax tuꞌ sunil mak chinahulnhento Komam Dios.a
18 Haꞌ anma mebꞌaꞌ machi nahulnhelaxto yinh hunelnhe,
yebꞌ xin mach chitanhkanilo huneꞌ ayko yipo yanma.
19 Mam Wahawil, ahanhwanoj, mach tonhe chawil yinikanh isbꞌa ebꞌnaj winaj,
chawil yinh tzet chitanhkano anma mach kaxhohtanheni.
20 Mamin, tzotelanh yul yanma, haxinwal chixiw hunteqꞌan anma tuꞌ tawet.
¡Txumchahojabꞌilo yu sunil anma tuꞌ ta mach ekꞌbꞌalo tasataj, anmanhe ebꞌnaj!