Isqꞌaqꞌal yip Komam Dios yebꞌ kaw niman yelapno anma yul sat Komam
Salmo tzꞌibꞌnhebꞌilkano yu yaꞌ rey David tet naj yahaw yeko yinh isnuqꞌal bꞌit, yibꞌanh munlabꞌal Gitit
8
¡Mamin, hach Jahawilanh, kaw nimankano yelapno habꞌi yul sat yibꞌanhqꞌinal tiꞌ!¡Hakpax tuꞌ yul satkanh, kaw aykano yelapnoj isqꞌaqꞌal hawip!a
2 Hayet chaxhisbꞌitnhen nixhte unin yebꞌ nixhte neneꞌ chitotxutxwi,
chayeni hanta hawip tet makta ayko ishowal tawinh,
yebꞌ makta mach chiyijen tzet chawala, yu iskachni istiꞌ.b
3 Hayet chintꞌanhxikanhan chiwilnihan satkanh watxꞌebꞌil hawu yu yiximal haqꞌabꞌ,
kat wilnipaxtojan ixahaw yebꞌ txꞌumel, watxꞌebꞌil hawu.
4 Chiwalnihan: «¿Tzet yelapno ye naj winaj yuxin chanati naj?
¿Tzet yelapno iskꞌahol naj winaj yuxin chatukle?» kinchihan.c
5 Watxꞌebꞌilkano naj winaj hawu, yaj hanikꞌnhechꞌan paxna naj yalanh ebꞌnaj ángel.
Hakaꞌta hawahto huneꞌ corona yinh iswiꞌ, yuto hawaqꞌkano ishelanil naj,
yebꞌ xin kaw ay yelapno ye naj hawu.
6 Hawaqꞌnikano yip yibꞌanh sunil tzet watxꞌebꞌil hawu,
hawanikaniko sunil yalanh yoj naj.d
7 Hawaqꞌnikano yip naj winaj yibꞌanh ej noꞌ meꞌ yebꞌ noꞌ wakax,
yebꞌ noꞌ cheh, yebꞌ yibꞌanh sunil no noqꞌ xoltelajil noqꞌ.
8 Yebꞌ yibꞌanh ej noꞌ chꞌik chꞌekꞌ purpun satkanh,
yebꞌ yibꞌanh ej noꞌ kay, yebꞌ yibꞌanh sunil ej no noqꞌ ay xol haꞌ mar.
9 ¡Mamin, hach Jahawilanh,
kaw niman yelapno habꞌi yul sat yibꞌanhqꞌinal tiꞌ!