Txah bꞌay chiqꞌanlax ispajtzen Komam tet ebꞌnaj txꞌoj chiswatxꞌe
Salmo tzꞌibꞌnhebꞌilkano yu yaꞌ rey David, bꞌit tet Komam Jahawil chiqꞌanni yaqꞌni Komam ispaj tet naj Cusa
7
Mam Wahawil, hach inDiosalan, tawinhnhe chikawxi inkꞌulan.Kolinan tet ebꞌnaj ayko ishowal winhan yebꞌ chintzumbꞌenikꞌojan;
kolinan yul isqꞌabꞌ ebꞌnaj.
2 Hunteqꞌan ebꞌnaj tuꞌ, lahan ebꞌnaj hakaꞌ noꞌ bꞌalam.
Kꞌuxantaxka ay tzet chu waykꞌayan yul isqꞌabꞌ ebꞌnaj kat kinisxitnikamojan;
machi mak xin chinkolnihan yul isqꞌabꞌ ebꞌnaj.
3 Mamin, hach inDiosalan, kꞌuxantaxka ay inmulan yul hasat,
taxka ay hunu mak xaꞌinwatxꞌehan istxꞌojal yinh,
4 ta ay hunelo tiꞌ waqꞌan istxꞌojal selelo iskꞌulal iswatxꞌe hunu mak winhan,
kꞌuxantaxka ay hunelo kinetlihan yinh mak ayko ishowal winhan,b
5 ta hak tuꞌ kinistzumbꞌehabꞌikꞌojan makta ayko ishowal winhan,
kat intzujchahan yu, kat kinishatxnikꞌojan sat txꞌotxꞌ, kat yelkano inpixanan.
6 ¡Mam Jahawil, ahanhwano yu sunil hahowal,
kat hawaniko howal yinh ebꞌnaj ayko ishowal winhan!
¡Mamin, hach tiꞌ istoholalnhetikꞌa chawatxꞌe! ¡Kolwahanh Mamin!
7 Okojabꞌ hoyno ej konhobꞌ tawinh, kat hawok yahawil yinh yul satkanh.
8 Hach tiꞌ Mamin, chaxhok hawilaꞌ yinh tzet chiꞌeliko anma yul hunun konhobꞌ.
Yuxin chinqꞌanan tawet ta chawil yinh tzet chinelikojan hatatikꞌa tzet chinwatxꞌehan.
Hanintiꞌan Mamin, chinwatxꞌehan istoholal.
9 Yuto hach tiꞌ, Dios kaw istoholal chawatxꞌe,
hawilwe tzet chꞌekꞌ yul yanma anma,
tanhtzekanilo makta chiwatxꞌen istxꞌojal, yajaꞌ wal ebꞌnaj chiwatxꞌen istoholal aqꞌ yip ebꞌnaj islinhbꞌan isbꞌa.
10 Komam Dios, haꞌ inescudohan, ayko wenhelojan.
Haꞌ Komam chikolni makta istoholalnhetikꞌa chiꞌekꞌ yinh yanma.
11 Komam Dios, juez Komam yinh kaw istoholal;
yinh sunilbꞌal tiempo chayo Komam isyaꞌtajil yibꞌanh makta chiwatxꞌen istxꞌojal.
12 Ta mach chisbꞌej anma iswatxꞌen istxꞌojal,
wal Komam xin lanhan yinahti Komam yeh yespada.
Watxꞌebꞌilxapaxo teꞌ litꞌ yu Komam.
13 Watxꞌebꞌilxa chꞌen chiꞌokniko yinh howal yu,
hunteqꞌan chꞌen chiꞌaqꞌnikamo anma.
Watxꞌebꞌilpaxo teꞌ litꞌ chihulwahi, ayko qꞌaꞌ yinh.
14 Haꞌ naj chiwatxꞌen istxꞌojal,
hanhkꞌanhetikꞌa istxꞌojal yebꞌ ekꞌnajil chiꞌekꞌ yinh isnabꞌal yebꞌ yinh yanma,
kat xin yaqꞌni naj leqꞌtiꞌal yohtanhelo yet anmahil.
15 Watxꞌebꞌilxa huneꞌ holan yu naj. Kaw nahat xin yehayto yich,
yaj wal xin haꞌtikꞌa naj, chitokꞌay yul holan tuꞌ.
16 ¡Haꞌ istxꞌojal chiswatxꞌe naj chiꞌaykꞌay yibꞌanh,
yebꞌ ischichon ay naj tuꞌ chiꞌay yibꞌanh iswiꞌ!
17 Chiwalan tzotiꞌ kꞌul yinh Komam Dios Jahawil yuto kaw toholkano Komam,
kat inbꞌitnhenan bꞌit yinh isbꞌi Komam Jahawil, yuto kaw aykano yelapnoj Komam.