Txah chiqꞌanni iskolwal Komam yet ay ilwebꞌal
Salmo tzꞌibꞌnhebꞌilkano yu yaꞌ rey David tet naj yahaw yeko yinh isnuqꞌal bꞌit; yibꞌanh munlabꞌal Neginot yebꞌ Seminita
6
Mam Wahawil, machojabꞌ chinhakachan yet chichiwa hakꞌul.Machojabꞌ chawati isyaꞌtajil wibꞌanhan yet chitit hahowal.
2 Tzꞌayojabꞌ hakꞌul winhan, Mamin, yuto kaw yaꞌay hinan.
Kaw sunil inbꞌajilan chibꞌuychahi. Mamin, aqꞌ inkawxojan.
3 Kaw bꞌiskꞌulal ye wanmahan.
Mamin, ¿bꞌaqꞌinh xin chinhakolan?
4 Mam Wahawil, hulanh hakoloꞌ wanmahan tet isyaꞌtajil.
¡Kaw tzꞌayojabꞌ hakꞌul winhan, kolinan!
5 Haꞌ mak kamomxa, mach chaxhisnatij.
¿Mak chu isbꞌitnhen habꞌi bꞌay ay yehobꞌal kamom?
6 Kaw siki inkꞌulan sikꞌlebꞌil. Kaw chiꞌel wawan yu bꞌiskꞌulal,
yebꞌ xin hunun aqꞌbꞌal woqꞌan.
Kaw chichakꞌanbꞌi isqꞌanh inwiꞌan, yebꞌ sat intxꞌatan yu yal insatan.
7 Kaw chipáxilo yip inmujlubꞌalan yu yekꞌyaꞌ wanmahan yu ebꞌnaj ayko ishowal winhan.
8 ¡Elanhwe inkꞌatanhan hex chewatxꞌe istxꞌojal,
yuto yabꞌe Komam Jahawil woqꞌan!b
9 Yabꞌe Komam Jahawil tzet inqꞌanan,
ischah Komam intxahan.
10 Sunil mak ayko ishowal winhan chitxꞌixwikanh,
kat issomchakanh chila. Yinh haꞌmataj chitak iskꞌul, kat yelkanh.