Txah chiqꞌanni iskꞌubꞌanil Komam Dios
Salmo tzꞌibꞌnhebꞌilkano yu yaꞌ rey David tet naj yahaw yeko yinh isnuqꞌal bꞌit; yibꞌanh munlabꞌal Nehilota
5
Abꞌe tzet chiwalan, Mamin, il inqꞌajxihan yu bꞌiskꞌulal.2 Hajbꞌa hatxikin yet chinawihan tawet,
hach inDiosalan yebꞌ Wahawilan, yuto tawet chintxahlihan.
3 Mam Wahawil, yet kaw sahabꞌ chiꞌahwawan tawet.
Yet kaw sahabꞌ, chinokan tasataj, chiwechmahan tzet chinqꞌanan.
4 Yuto hach tiꞌ Mamin, Dios hach, mach chaxhtzala yinh istxꞌojal.
Haꞌ mak chiwatxꞌen istxꞌojal, mach chu ishitziko takꞌatanh.
5 Ebꞌnaj kaw ay yelapno yalni, mach chu ishitziko ebꞌnaj yinh hasat.
Chaxhyahwa yinh istxꞌojal chiswatxꞌe ebꞌnaj.
6 Chatanhtzelo makta chihalni leqꞌtiꞌal, yebꞌ chayah ebꞌnaj potxꞌom anma,
yebꞌ ebꞌnaj chiꞌaqꞌni subꞌchaho yet anmahil yinh leqꞌtiꞌal.
7 Wal hanintiꞌan Mamin, chinoktojan yul hawatut, yaj yu iskꞌulchꞌanil hakꞌul winhan,
chiwanikojan hamay, chiwinayo hinbꞌahan tawet yul hawatut mach istxꞌojal yinh.b
8 Mam Wahawil, ijbꞌa hinan yinh istoholal, yuto ay ebꞌnaj ayko ishowal winhan.
Watxꞌe inikojan yul habꞌeh kaw tohol.
9 Haꞌ ebꞌnaj tuꞌ, maxhtikꞌa isyelal chiꞌelti yul istiꞌ ebꞌnaj.
Haꞌ tzet ay yul yanma ebꞌnaj nohnanhetikꞌa yu istxꞌojal.
Lahan tzet chꞌahti yul isnuqꞌ ebꞌnaj tuꞌ hakaꞌ bꞌay mujan kamom. Hanhkꞌanhetikꞌa leqꞌtiꞌal chal ebꞌnaj.
10 ¡Hach inDiosalan, ati isyaꞌtajil yibꞌanh ebꞌnaj! ¡Ayojabꞌ ebꞌnaj yul isqꞌabꞌ istxꞌojal tzet chiyala!
Yu kaw txꞌiꞌalxa ismachiswalilal ebꞌnaj chakoj,
ilo ebꞌnaj xol hakonhobꞌ yuto xameltzoko ebꞌnaj tawinh.
11 Yaj mak chikawxi iskꞌul tawinh yaqꞌabꞌ tzalaho iskꞌul;
bꞌitnojabꞌ tawet yinh sunilbꞌal ej tiempo, yuto chaxhkolwa yinh.
Haꞌ mak chiꞌochen habꞌi, tzalahojabꞌ tawinh.
12 Yuto hach tiꞌ Mamin, kaw chawayo hakꞌulal yibꞌanh mak chiwatxꞌen istoholal;
haꞌ iskꞌulal hakꞌul lahan hakaꞌ hunu escudo hoyaniko yinh yu iskolni.