Huneꞌ txah yet qꞌejbꞌiyal bꞌay chiyelax kawxobꞌal kꞌulal yinh Komam Dios
Salmo tzꞌibꞌnhebꞌilkano yu yaꞌ rey David tet naj yahaw yeko yinh isnuqꞌal bꞌit; yibꞌanh munlabꞌal Neginota
4
¡Mamin, hach inDiosalan, istoholalnhe chawatxꞌe!Hayet chiꞌahwawan tawet, chapajtzen tzet chinqꞌanan.
Hach chawaqꞌ yaqꞌlobꞌal wanmahan yet chꞌay isyaꞌtajil wibꞌanhan.
Tzꞌayojabꞌ hakꞌul winhan Mamin, abꞌe tzet chiwalan yinh intxahan.
2 Hex iskꞌahol ebꞌnaj winaj ¿bꞌaqꞌinh chebꞌej heyalni inqꞌumalan, kat heyichiko heyalni ta niman welapnojan?
¿Bꞌaqꞌinh chebꞌej heyochen hesayni tzettaj ye tuꞌ matzet chaliloj, yebꞌ leqꞌtiꞌal?b
3 Ohtanheweloj ta haꞌ Komam Dios sikꞌnhelo makta chiyijen tzet chala,
kat yokkano yeto Komam. Chabꞌen Komam yet chiꞌel wawan tet.
4 ¡Yilal heluylun yu xiwkilal tet Komam, matxa chelahiko heyaniko hemul!
Hayet chexok wayoj sat hetxꞌat chistxumni isbꞌa hekꞌul yinh tzet chewatxꞌe, yebꞌ matzet cheyala.
5 Haltewe hakaꞌ xahanbꞌal kaw tzꞌajan tet Komam Dios,
haꞌ ton hewatxꞌen istoholal.
Kawxojabꞌ hekꞌul yinh Komam.
6 Txꞌiꞌal mak chalni: «¿Maktaxka chiyenilo iskꞌulal jet?» xhi.
Mamin, yelo isqꞌaqꞌal hasat jibꞌanhanh.
7 Hach hawaqꞌ tzalahilal yul wanmahan,
ekꞌbꞌal sata tzalahilal ay tet ebꞌnaj kaw niman istrigo, yebꞌ niman yal yuva.c
8 Yinh aqꞌankꞌulal chinokan wayoj, hak tuꞌ xin chu inwaykanhan,
yuto tawinhnhe Mam Wahawil, chikawxi inkꞌulan.