Txah yet sakꞌayal chiqꞌanni ta chikolwa Komam Dios
Salmo tzꞌibꞌnhebꞌilkano yu yaꞌ rey David yet yelkanh yaꞌ tet iskꞌahol Absalón
3
¡Mamin, kaw txꞌiꞌal mak ayko ishowal winhan!Kaw tzetkꞌa mak chikanh isbꞌa, kat yok howal winhan.
2 Kaw ay mak chalni winhan: «Mach chikolcha huneꞌ naj tiꞌ yu Komam Dios,» xhi anma.
3 Yajaꞌ wal hach tiꞌ Mamin, lahan hach hakaꞌ chꞌen escudoa chaxhok wenhelojan bꞌay chinkol hinbꞌahan;
tawet chitit iskꞌulchꞌanil wetan, hach xin chaqꞌekanh inwiꞌan, yuxin ay wipan.
4 Hayet chinawihan tawet Mam Wahawil,
kat hapajtzen wetan bꞌey wonhan hawet yehi.
5 Chinay hilnojan kat inwayan, lahwi tuꞌ kat yelpaxo inwayanhan,
yuto hach tiꞌ Mam Wahawil chintanhehan.
6 Mach chinxiwan tet huneꞌ niman bꞌulan anma chinhoynayojan,
kat yaniko howal winhan.
7 ¡Mam Wahawil! ¡Hach inDiosalan, ahanhwanoj!
¡Kolinan yuto hach chamaqꞌ poho isqꞌotx makta ayko ishowal winhan!
Chamaqꞌnilti yeh makta chiwatxꞌen istxꞌojal.
8 Haꞌ kolbꞌanile chitit tawet Mam Wahawil.
¡Mamin, ayo hakꞌulal yibꞌanh hakonhobꞌ!