Komam Jahawil sikꞌbꞌililo yu Komam Dios
Salmo tzꞌibꞌnhebꞌilkano yu yaꞌ rey David
2
¿Tzet yinh xin chiꞌahwejna anma mach ohtanhe Komam Dios,kat istxumni iswatxꞌen tzettaj ye tuꞌ maxhtaj haꞌ yehi?
2 Chꞌah ebꞌnaj isreyal konhobꞌ ay yul sat yibꞌanhqꞌinal tiꞌ, yebꞌpaxo hunteqꞌanxa ebꞌnaj yahawil,
hun chu islahtiꞌnhen isbꞌa ebꞌnaj yaniko howal yinh Komam Dios,
yebꞌ yinh Komam Jahawil sikꞌbꞌililoj. Chalni ebꞌnaj:a
3 «Jiqꞌawelo chꞌen cadena ayko jinh, kat kokolnilo kobꞌa yul isqꞌabꞌ txꞌanh txꞌanh ayko jinh,» xhi ebꞌnaj.
4 Yajaꞌ wal Komam Dios ay yul satkanh chꞌok tzebꞌo yinh tzet chisnah ebꞌnaj,
chibꞌuchwa Komam yinh.
5 Yinh haꞌmataj chitzotel Komam yu ishowal yinh ebꞌnaj,
kat isxibꞌten Komam ebꞌnaj,
kat yalni Komam tet ebꞌnaj yinh sunil ishowal:
6 «Xawakojan mak chꞌok Yahawo bꞌey konhobꞌ Sión, huneꞌ wonhan tuꞌ, wetan yehi,» xhi Komam.b
7 Chalnipaxo Iskꞌahol Komam Dios: «Komam Jahawil, halni wetan: “Hach tiꞌ, hach Inkꞌaholan, chinokkanojan hamamo yinh huneꞌ tzꞌayik tiꞌ.c
8 Qꞌan wetan, kat waqꞌnihan sunil ej konhobꞌ hamajuloj, kat yokkano sunil yul sat yibꞌanhqꞌinal tiꞌ yul haqꞌabꞌ.
9 Haꞌ xin huneꞌ chꞌen vara ayko yul haqꞌabꞌ, haꞌ chꞌen chawaqꞌbꞌalnhe hatanhtzenilo sunil ebꞌnaj yahaw ej konhobꞌ;
chatanhtzelo hakaꞌ chu ismaqꞌlaxpoho txꞌotxꞌ xi,” xhi Komam wetan,» xhi Komam Kꞌahole.d
10 Yalnipaxo Komam Dios: «Wal tinanh xin hex yahawil konhobꞌ, helan cheyute hebꞌa,
haxa hex juez heyeko yulaj konhobꞌ yul sat yibꞌanhqꞌinal tiꞌ, abꞌewe tzet chiwalan:
11 Aqꞌwe chejaꞌ hebꞌa tet Komam Jahawil yinh xiwkilal, kat heluylun yinh tzalahilal.
12 Ayojabꞌ yelapno Komam Kꞌahole yul hesat, haxinwal mach chitit ishowal teyinh yet chexekꞌ yinh hebꞌel,
kat kexyaqꞌni kamoj, yuto kaw yinh anhe chitit ishowal Komam.
¡Saqꞌal yet sunil mak chikawxi iskꞌul yinh Komam!» xhi Komam Dios.