10
Haꞌ ebꞌnaj yako isbꞌi yinh hum tzꞌibꞌnhelax tuꞌ, haꞌ ebꞌnaj tiꞌ: yaꞌ gobernador Nehemías, iskꞌahol yaꞌ Hacalías, yaꞌ Sedequías, 2 yaꞌ Seraías, yaꞌ Azarías, yaꞌ Jeremías, 3 yaꞌ Pasur, yaꞌ Amarías, yaꞌ Malquías, 4 yaꞌ Hatús, yaꞌ Sebanías, yaꞌ Maluc, 5 yaꞌ Harim, yaꞌ Meremot, yaꞌ Obadías, 6 yaꞌ Daniel, yaꞌ Ginetón, yaꞌ Baruc, 7 yaꞌ Mesulam, yaꞌ Abías, yaꞌ Mijamín, 8 yaꞌ Maazías, yaꞌ Bilgai, yaꞌ Semaías, haꞌ ebꞌyaꞌ tuꞌ, sacerdote ebꞌyaꞌ.9 Haxa ebꞌnaj levita, haꞌ ebꞌnaj tiꞌ: Naj Jesúa, iskꞌahol naj Azanías, naj Binúi titna yinh naj Henadad yebꞌ naj Cadmiel. 10 Yebꞌ ebꞌnaj yuxhta ebꞌnaj, haꞌ ton naj Sebanías, naj Hodías, naj Kelita, naj Pelaías, naj Hanán. 11 Naj Micaía, naj Rehob, naj Hasabías, 12 naj Zacur, naj Serebías, naj Sebanías, 13 naj Hodías, naj Bani, yebꞌ naj Baninu.
14 Haꞌ ebꞌnaj iswiꞌehal konhobꞌ haꞌ ebꞌnaj tiꞌ: Naj Paros, naj Pahat-moab, naj Elam, naj Zatu, naj Bani, 15 naj Buni, naj Azgad, naj Bebai, 16 naj Adonías, naj Bigvai, naj Adín, 17 naj Ater, naj Ezequías, naj Azur, 18 naj Hodías, naj Hasum, naj Bezai, 19 naj Harif, naj Anatot, naj Nebai, 20 naj Magpías, naj Mesulam, naj Hezir, 21 yaꞌ Mesezabeel, naj Sadoc, yaꞌ Jadúa, 22 naj Pelatías, naj Hanán, naj Anaías, 23 yaꞌ Oseas, naj Hananías, naj Hasub, 24 naj Halohes, naj Pilha, naj Sobec, 25 naj Rehum, naj Hasabna, naj Maasías, 26 naj Ahías, naj Hanán, naj Anán, 27 naj Maluc, naj Harim, yebꞌ naj Baana.
28 Haxa hunteqꞌanxa anma Israel yebꞌ ebꞌyaꞌ sacerdote, ebꞌnaj levita, ebꞌnaj tanhem pulta, ebꞌnaj bꞌitnom, ebꞌnaj chimunla yul Yatut Komam Dios, yebꞌ sunil ebꞌnaj ispohilo isbꞌa xol ebꞌnaj nan konhobꞌal yu isyijen kuybꞌanile yaqꞌ Komam Dios, haꞌ ebꞌnaj tuꞌ iskutxbꞌako isbꞌa yebꞌ yixal yebꞌ iskꞌahol yebꞌ iskutzꞌin yebꞌ sunil nixhte unin ayxa isnabꞌal istxumni. 29 Iskutxbꞌako isbꞌa sunil mak tuꞌ yebꞌ ebꞌnaj yuxhtanhe isbꞌa, yebꞌ ebꞌnaj yahawil, yu istaqꞌweniko yinh isyijen chejbꞌanile aykano yu Komam Dios, aqꞌbꞌilkano tet yaꞌ Moisés, ischejabꞌ Komam Dios. Yalni tato chiskꞌubꞌa, kat isyijen chejbꞌanile yebꞌ kuybꞌanile yebꞌ tzotiꞌ tzꞌibꞌnhebꞌilayo yul hum yaqꞌkano Komam Dios, Jahawil. 30 Jalnipaxojanh tato mach chijaqꞌanh kokutzꞌinanh yixalo iskꞌahol ebꞌnaj nan konhobꞌal, machi xin chiyiqꞌpaxo kokꞌaholanh iskutzꞌin ebꞌnaj nan konhobꞌal. 31 Jalnipaxojanh tato chul ebꞌnaj nan konhobꞌal txonho tzetaj ye tuꞌ maka tzet chilolaxi yinh istzꞌayikal xewilal maka yinh hunuxa tzꞌayikal yet Komam, mach chonhloqꞌwihanh tet ebꞌnaj. Chijaqꞌnipaxojanh xewo kotxꞌotxꞌanh yinh ishuj habꞌil, kat jaqꞌnitanhojanh yal chꞌen melyu ayilto kꞌamil.
32 Kotaqꞌwenpaxikojanh jibꞌanhanh jaqꞌnihanh huneꞌ yox majan siclo chꞌen plata hunun honhanh hunun habꞌil, chiꞌokniko yul Yatut Komam Dios, koDiosal, 33 yinh ixim pan chiꞌalaxayo sata Komam Dios yebꞌ ofrenda chihaltelax hunun tzꞌayik, yebꞌ noꞌ xahanbꞌal chinhuslax hunun tzꞌayik, yebꞌ xahanbꞌal chiꞌaqꞌlax yinh istzꞌayikal xewilal yet unin ixahaw, yet chiꞌekꞌtzelax qꞌinh, yebꞌ hunteqꞌanxa yebꞌalqꞌabꞌe tet Komam, yebꞌ xahanbꞌal chiꞌaqꞌni tanho ismul konhobꞌ Israel, yebꞌ xin yinh sunil munil chiwatxꞌi yul Yatut Komam Dios, koDiosal.
34 Kat jilwenanh yinhbꞌala ebꞌyaꞌ sacerdote, ebꞌnaj levita, yebꞌ sunil konhobꞌ hatatikꞌa hunun majan yuxhtanhe isbꞌa yu jilnihanh tzet tzꞌayikal yinh hunun habꞌilal chijitojanh teꞌ siꞌ yet Yatut Komam Dios, yu istzꞌato teꞌ yibꞌanh mexha yet xahanbꞌal yet Komam Dios, koDiosal, hakaꞌ yalni kuybꞌanile. 35 Kotaqꞌwenpaxiko jibꞌanhanh jinitojanh bꞌabꞌel sat kotzꞌunubꞌanh chijikanhanh sat kotxꞌotxꞌanh, yebꞌ bꞌabꞌel sat sunil teꞌ lobꞌehal hunun habꞌil bꞌey Yatut Komam Dios. 36 Chijinipaxtojanh kobꞌabꞌel kꞌaholanh yebꞌ xahanbꞌal tet Komam, kat jinipaxtojanh bꞌabꞌel yunin konoqꞌanh yebꞌ koxahanbꞌalanh hakaꞌ yalni chejbꞌanile. Chijinipaxtojanh bꞌabꞌel yunin kowakaxanh, komeꞌanh bꞌey Yatut Komam Dios, koDiosal, tet ebꞌyaꞌ sacerdote chimunla yul Yatut Komam. 37 Chijinipaxtojanh kobꞌabꞌel harinahanh, yebꞌ koyebꞌalqꞌabꞌanh, yebꞌ bꞌabꞌel sat sunil teꞌ lobꞌehal yebꞌ bꞌabꞌel vino, yebꞌ bꞌabꞌel aceite tet ebꞌyaꞌ sacerdote, kat iskꞌubꞌanto ebꞌyaꞌ yul iskꞌuwanbꞌal Yatut Komam Dios. Chijaqꞌnipaxojanh isdiezmohal satla kotzꞌunubꞌanh chiꞌel sat kotxꞌotxꞌanh tet ebꞌnaj levita, yuto haꞌ ebꞌnaj levita tuꞌ chichahni isdiezmohal sat kotzꞌunubꞌanh chiꞌel sat kotxꞌotxꞌanh yul hunun kokonhobꞌanh.
38 Hayet chischahni ebꞌnaj levita diezmo tuꞌ yilal ayko hunun ebꞌyaꞌ sacerdote, yuninal yaꞌ Aarón iskꞌatanh ebꞌnaj, haxa xin ebꞌnaj levita tuꞌ chichahni chꞌen diezmo, chiyinilo ebꞌnaj isdiezmohal chꞌen, kat yinito ebꞌnaj chꞌen bꞌey Yatut Komam Dios, koDiosalanh, kat iskꞌubꞌanto ebꞌnaj chꞌen yul kꞌuwanbꞌal. 39 Yuto haꞌ yul iskꞌuwanbꞌal isqꞌalomal Yatut Komam Dios chiskꞌubꞌa ebꞌnaj Israel yebꞌ ebꞌnaj Levita yebꞌalqꞌabꞌe chiꞌilaxtoj, hakaꞌ ixim trigo, vino, yebꞌ aceite, haꞌ tuꞌ xin ay hunteqꞌan ismunlabꞌal Yatut Komam Dios, yebꞌ xin haꞌ tuꞌ chiꞌeyiko ebꞌyaꞌ sacerdote ayko yinh ismunil, yebꞌ ebꞌnaj tanhem pulta, yebꞌ ebꞌnaj chibꞌitni. Hak tuꞌ xin mach chikobꞌejkanojanh Yatut Komam Dios, koDiosal.