Yalilo yaꞌ Esdras ismul konhobꞌ Israel yinh istxah
9
Haꞌ yinh tzꞌayik 24 (kanhebꞌ iskawinaj) yultikꞌa huneꞌ ixahaw tuꞌ, iskutxbꞌako isbꞌa ebꞌnaj Israel, yok ebꞌnaj yinh mach chiwaꞌ yu istxahli, yaniko ebꞌnaj xilqꞌape qꞌaqꞌiꞌ yinh, yanahto ebꞌnaj pojoj yibꞌanh iswiꞌ.a 2 Xaxin ispohilo isbꞌa ebꞌnaj Israel tuꞌ xol ebꞌnaj mach Israeloj. Yah linhno ebꞌnaj kutxaniko tuꞌ, yalnilo ebꞌnaj ismul yebꞌ ismul ismam icham. 3 Hayet linhan ebꞌnaj bꞌay ay tuꞌ, yil-lax yumal chejbꞌanile yet Komam Jahawil, isDiosal Israel, yulbꞌal oxebꞌ hora yabꞌe ebꞌnaj, haxa yinh hunxa oxebꞌ hora xin yalnati ebꞌnaj ismul tet Komam Dios, yinayo isbꞌa ebꞌnaj sata Komam Jahawil, isDiosal. 4 Haꞌ xin ebꞌnaj levita Jesúa, naj Bani, naj Cadmiel, naj Sebanías, naj Buni, naj Serebías, naj Bani, yebꞌ naj Quenani, ahto ebꞌnaj yibꞌanh huneꞌ bꞌay nahat yekanh watxꞌebꞌilkanh yu ebꞌnaj, yah yaw ebꞌnaj yinh kaw ip tet Komam Dios, isDiosal. 5 Yalni ebꞌnaj levita, haꞌ ton naj Jesúa, naj Cadmiel, naj Bani, naj Hasabnías, naj Serebías, naj Hodías, naj Sebanías, yebꞌ naj Petaías, hakaꞌ tiꞌ: —Ahanhwewanoj, kat heyok heyalno kꞌul-la tzotiꞌ yinh Komam Jahawil, koDiosal:Hal-laxojabꞌ kꞌul-la tzotiꞌ tawinh, Mamin, kat habꞌitnhelaxi,
hach tiꞌ kaw saqꞌal hachkanoj yebꞌ kaw aykano yelapno habꞌi yinh sunilbꞌal ej tiempo.
6 Hachnhechꞌan Yahawil hach. Hach tiꞌ watxꞌenhe satkanh, huneꞌ ixtanh yil-laxi,
yebꞌ huneꞌxa satkanh nahat yekantoj, yebꞌ ejército niman isbꞌisil ay satkanh chako hamay.
Hach watxꞌenhe txꞌo txꞌotxꞌ yebꞌ sunil tzet ay sat txꞌotxꞌ; hach watxꞌenhe haꞌ mar yebꞌ sunil tzet ay xol haꞌ.
7 Hach tiꞌ, hach Jahawilanh yebꞌ koDiosalanh, sikꞌnhenilo yaꞌ Abram,
hawinilo yaꞌ sat txꞌotxꞌ Ur, istxꞌotxꞌ ebꞌnaj caldeo, hawanikaniko Abraham isbꞌiho yaꞌ.
8 Kaw xin tohol yanma yaꞌ yul hasat, hatꞌinhbꞌankano hatzotiꞌ yebꞌ yaꞌ, yunhe hawaqꞌnikano istxꞌotxꞌ ebꞌnaj cananeo tet yuninal yaꞌ.
Yebꞌpaxo xin istxꞌotxꞌ ebꞌnaj heteo, ebꞌnaj amorreo, ebꞌnaj ferezeo, ebꞌnaj jebuseo yebꞌ ebꞌnaj gergeseo, hawaqꞌkano tet yuninal yaꞌ.
Wal xin yij isbꞌa tzet hawalkano tuꞌ, yuto tzꞌajan hachkanoj.
9 Hawilnipaxo isyaꞌtajil yaqꞌle jichmamanh bꞌey Egipto,
hawabꞌen yel yaw ebꞌnaj bꞌey haꞌ Kajinh Mar.
10 Hayenilo kꞌaybꞌalkꞌule yebꞌ hawip yilaꞌ naj faraón, yebꞌ tet ischejabꞌ naj, yebꞌ tet anma ay yulajla konhobꞌ ay bꞌey Egipto tuꞌ.
Haye hawip tuꞌ yilaꞌ yuto hawil yetalax jichmamtuꞌanh yuto kanh yute isbꞌa ebꞌnaj Egipto yinh.
Hak tuꞌ yu isbꞌinakanti habꞌi, masanto tinanh.
11 Hapoh haꞌ mar sata jichmamtuꞌanh, yekꞌto ebꞌnaj bꞌay tajin txꞌotxꞌ yiktabꞌal haꞌ,
wal ebꞌnaj Egipto ok tzujno yinta ebꞌnaj tuꞌ xin, hawakanto ebꞌnaj yich haꞌ,
hakaꞌ chu istokano hunu niman chꞌen yich haꞌ.
12 Hayet tzꞌayikal, hawijbꞌakꞌo ebꞌnaj yinh isbꞌel yu huneꞌ moyan;
haxa yet aqꞌbꞌalil xin haꞌ huneꞌ qꞌa qꞌaꞌ ayko istzejtaho ebꞌnaj yinh isbꞌel hawu.
13 Lahwi tuꞌ xin hatit satkanh hawayilo iswiꞌ witz Sinaí,
hatzotelayti tet jichmamtuꞌanh, hawaqꞌnikano kuybꞌanile kaw tohol tet,
yebꞌ istzotiꞌal ayayo yul hum kaw yel chala, yebꞌ chejbꞌanile kaw kꞌul tet.
14 Hachejnikanoj tato chisyije tzꞌayik xewilal,
huneꞌ tzꞌayik hawet yehi, hawaqꞌnikano chejbꞌanile,
yebꞌ kuybꞌanile, yebꞌ tzotiꞌ ayayo yul hum tet yaꞌ Moisés hachejabꞌ,
haxa yaꞌ aqꞌni yohtanhelo jichmamanh.
15 Hawaqꞌni pan yet satkanhil yu isnoh iskꞌul yet isnhohchahi,
hawaqꞌni ha haꞌ elilo yul iskꞌul chꞌen niman chꞌen yukꞌuꞌ ebꞌnaj yet istaj istiꞌ.
Lahwi tuꞌ hawalnipaxo tet ebꞌnaj tato chiꞌehayo sat txꞌo txꞌotxꞌ hawalte tet ebꞌnaj yet hawanikanh haqꞌabꞌ,
yet hataqꞌwenkano tawinh, yet hawaqꞌni bꞌinaho habꞌi.
16 Yajaꞌ jichmamtuꞌanh kaw yikanh isbꞌa ebꞌnaj, islutꞌnhen yanma ebꞌnaj,
machi xin yabꞌeto ebꞌnaj chejbꞌanile hawala.
17 Mach xin isje ebꞌnaj yabꞌeꞌ, yebꞌ xin mach isnahti ebꞌnaj kꞌaybꞌalkꞌule hawatxꞌeꞌ,
wal xin islutꞌnhe yanma ebꞌnaj yok manhkꞌomal tawet, issayni ebꞌnaj yahawil chꞌaqꞌni meltzoho bꞌey Egipto hunelxa;
yajaꞌ wal hach tiꞌ xin Mamin, chawaqꞌ nimankꞌulal, kaw saqꞌalkano hakꞌul yebꞌ kaw kꞌulachkanoj.
Mach xin tonheho chitit hahowal, kaw tzetkano chitzꞌay hakꞌul, yuto mach habꞌejkano ebꞌnaj jichmamtuꞌanh.
18 Yebꞌpaxo xin yet iswatxꞌen ebꞌnaj huneꞌ chꞌen yechel wakax, yalni ebꞌnaj hakaꞌ tiꞌ:
“Haꞌ huneꞌ tiꞌ kodiosal konhinilti sat txꞌotxꞌ Egipto,” xhi ebꞌnaj.
Hak tuꞌ yu iswatxꞌen ebꞌnaj nimeta isyahbꞌetajil yul hasat.
19 Yajaꞌ hach tiꞌ yu hanta chitzꞌaykano hakꞌul, yuxin mach habꞌejkano ebꞌnaj bꞌey txꞌotxꞌ desierto.
Haꞌ huneꞌ moyan chiꞌijbꞌanikꞌo ebꞌnaj yinh isbꞌel yet tzꞌayikal, mach bꞌejlaxkano ebꞌnaj yu,
hakpax tuꞌ huneꞌ qꞌa qꞌaꞌ chiꞌijbꞌanikꞌo ebꞌnaj yet aqꞌbꞌalil yu yilni bꞌay chito yinh isbꞌel, mach bꞌejlaxkano ebꞌnaj yu.
20 Hawaqꞌni hawespíritu kaw kꞌul tet ebꞌnaj yu iskuylax ebꞌnaj yu,
machi xin hatzikilo maná yinh istiꞌ ebꞌnaj, hawaqꞌni haꞌ yukꞌuꞌ yet istaj istiꞌ.
21 Hawaqꞌni tzet isloh ebꞌnaj bꞌey txꞌotxꞌ desierto yulbꞌal 40 (kawinaj) habꞌil, machi hunu tzet ye tuꞌ tiꞌ,
matzet yul isqꞌabꞌ ebꞌnaj hawu, wal xin hawaqꞌ sunil tet ebꞌnaj,
machi xin xilbꞌipaxilo xil isqꞌap ebꞌnaj, mach malpaxokanh yoj ebꞌnaj yinh isbꞌel.
22 Hawaqꞌni nimeta konhobꞌ yebꞌ konhobꞌlaj tet ebꞌnaj,
hapohnikanh tet ebꞌnaj jichmam tuꞌanh yinh hunun majan,
yokkano txꞌotxꞌ Hesbón yu ebꞌnaj,b txꞌotxꞌ bꞌay ayko naj Sehón reyal, yebꞌ istxꞌotxꞌ naj Og, rey yinh txꞌotxꞌ Basán.
23 Hawaqꞌni pohchaho yuninal ebꞌnaj hakaꞌ isbꞌisil txꞌumel ay satkanh,
hawinito yuninal jichmam tuꞌanh sat txꞌo txꞌotxꞌ hawala tato chawaqꞌ ismajuloj.
24 Hak tuꞌ yu yapni yuninal ebꞌnaj sat txꞌotxꞌ, yokkano txꞌotxꞌ yu ebꞌnaj;
hawinilo anma ayayo sat txꞌotxꞌ sata ebꞌnaj. Hawaniko ebꞌnaj cananeo yebꞌ isreyal yul isqꞌabꞌ ebꞌnaj,
hawanipaxiko konhobꞌla yul isqꞌabꞌ ebꞌnaj, iswatxꞌen ebꞌnaj tzet yoche iskꞌul yinh anma tuꞌ.
25 Yokpaxo ej konhobꞌ kaw ay yip yu ebꞌnaj, yebꞌ txꞌo txꞌotxꞌ kaw kꞌul,
yokpaxkano nha kaw nohna yu tzetaj ye tuꞌ kaw kꞌul yu ebꞌnaj, yiqꞌni ebꞌnaj kꞌuh watxꞌebꞌilxa,
yebꞌ tzꞌunubꞌ bꞌay ay teꞌ uva yebꞌ teꞌ olivo yebꞌ teꞌ lobꞌehal,
iswaꞌ ebꞌnaj masanto kaw noh iskꞌul ebꞌnaj, yaqꞌni tzalaho iskꞌul ebꞌnaj yu hakꞌulal.
26 Yajaꞌ yaqꞌtij ebꞌnaj hahowal, ismanhkꞌon ebꞌnaj tzet hawala,
yintanhenkanilto ebꞌnaj chejbꞌanile aqꞌbꞌil hawu. Ispotxꞌnikamo ebꞌnaj hachejabꞌ,
ebꞌnaj chalni ta yilal ismeltzo ebꞌnaj tuꞌ yul haqꞌabꞌ hunelxa, txꞌiꞌal xin isyahbꞌetajil iswatxꞌepaxo ebꞌnaj.
27 Hak tuꞌ xin yu hawaniko ebꞌnaj yul isqꞌabꞌ ebꞌnaj ayko ishowal yinh jichmam tuꞌanh, yaqꞌlax ekꞌoyaꞌ yanma jichmamanh yu ebꞌnaj,
yajaꞌ hayet ayko ebꞌnaj yinh isyaꞌtajil tuꞌ yah yaw ebꞌnaj tawet, hawabꞌen yul isnuqꞌ ebꞌnaj yul satkanh,
hawaniti ebꞌnaj winaj kolnilo ebꞌnaj yul isqꞌabꞌ ebꞌnaj ayko ishowal yinh, yuto tzꞌay hakꞌul yinh ebꞌnaj.
28 Haxa yet aqꞌankꞌulalxa ye ebꞌnaj, yokpaxo ebꞌnaj iswatxꞌeno istxꞌojal yul hasat yuxin habꞌejpaxiko ebꞌnaj yul isqꞌabꞌ ebꞌnaj ayko ishowal yinh.
Yet yokkano ebꞌnaj yalanh yip ebꞌnaj, yahpaxo yaw ebꞌnaj tawet, hawabꞌen yul isnuqꞌ ebꞌnaj yul satkanh,
yu iskꞌulchꞌanil hakꞌul yebꞌ yu chitzꞌay hakꞌul yinh ebꞌnaj yuxin txꞌiꞌal el hakolilo ebꞌnaj.
29 Hakachni ebꞌnaj yu ismeltzo ebꞌnaj isyijen tzet chawala, yajaꞌ xin isnohtzen yanma ebꞌnaj yu yekꞌnajil,
machi xin yabꞌeto ebꞌnaj chejbꞌanile chawala, yaniko ismul ebꞌnaj yinh kuybꞌanile, huneꞌ chiꞌilni tzet chꞌeliko ebꞌnaj;
haꞌ kuybꞌanile tuꞌ chiꞌaqꞌni kawile tet mak chiyijeni.
Haꞌ ebꞌnaj tuꞌ ok ebꞌnaj manhkꞌomal tawet, islutꞌnhen yanma ebꞌnaj, matxa xin isje ebꞌnaj yabꞌeꞌ tzet chawala.
30 Kaw txꞌiꞌal tiempo hawaqꞌ techaho istxꞌojal ebꞌnaj,
hatzotel tet ebꞌnaj yu hawespíritu yu ebꞌnaj hachejabꞌ, yajaꞌ machi yabꞌe ebꞌnaj;
yuxin hawako ebꞌnaj yul isqꞌabꞌ konhobꞌla ay sat txꞌo txꞌotxꞌ tiꞌ.
31 Yajaꞌ yu hanta chitzꞌay hakꞌul yinh ebꞌnaj yuxin mach hatanhtzekanilo ebꞌnaj yinh hunelnhe yebꞌ mach habꞌejkano ebꞌnaj,
yuto hach tiꞌ Dios, kaw aykano hanimankꞌulal, yebꞌ kꞌulchꞌankano hakꞌul.
32 Wal tinanh xin Mamin, hach koDiosalanh, hach tiꞌ kaw niman hawelapnoj, yebꞌ kaw ay hawip,
yebꞌ xin kaw istzan isnahnon anma tawet, mach chanahulnheto tzet taqꞌwebꞌil hawu, yebꞌ xin istzꞌay hakꞌul,
machnhehojabꞌ hanikꞌnheho isyaꞌtajil xayaqꞌle ebꞌyaꞌ koreyalanh yul hasat, yebꞌ isyaꞌtajil yaqꞌle ebꞌnaj yahawil kokonhobꞌanh,
ebꞌyaꞌ kosacerdotehanh, ebꞌyaꞌ hachejabꞌ, ebꞌnaj jichmamanh yebꞌ sunil hakonhobꞌ yinhtaxtikꞌa istiempo ebꞌnaj rey Asiria masanto tinanh.
33 Yajaꞌ wal hach tiꞌ istoholal hawatxꞌe yet hawanayo isyaꞌtajil jibꞌanhanh,
yuto kowatxꞌehanh istxꞌojal yul hasat, wal hach xin kaw tohol hachkanoj.
34 Haꞌ ebꞌyaꞌ koreyalanh, ebꞌnaj yahawil kokonhobꞌanh,
ebꞌyaꞌ kosacerdotehanh yebꞌ ebꞌnaj komamanh mach yako ebꞌnaj yinh ismunil istzotiꞌal hum aqꞌbꞌilkano hawu,
mach yabꞌepaxo ebꞌnaj tzet chal chejbꞌanile yebꞌ kuybꞌanile aykano hawu, huneꞌ chikachwa yinh ebꞌnaj.
35 Hayet ay ebꞌnaj sat ismajul, hunteqꞌan kꞌul aqꞌbꞌil tet hawu, yet ay ebꞌnaj sat txꞌotxꞌ kaw yax yebꞌ kaw niman yekoj,
mach isyije ebꞌnaj tzet hawala, mach ispohpaxilo isbꞌa ebꞌnaj yinh istxꞌojal.
36 Mamin, ilkꞌanabꞌ honhanh tinanh, chejabꞌ jekojanh sat txꞌo txꞌotxꞌ hawaqꞌ tet jichmamanh,
hawaqꞌ txꞌotxꞌ xin yu islohni ebꞌnaj sat tzꞌunubꞌ, yebꞌ hunteqꞌanxa tzet chichꞌibꞌ sat txꞌotxꞌ.
37 Haꞌ tinanh xin txꞌiꞌal tzet chiꞌel sat txꞌotxꞌ,
haꞌ xin ebꞌnaj rey bꞌay konhhawakojanh chejabꞌoj haꞌ ebꞌnaj chiꞌochen tzet chiꞌel sat txꞌotxꞌ yu komulanh jakojanh.
Haꞌ tzet choche iskꞌul ebꞌnaj rey tuꞌ, haꞌ chiswatxꞌe ebꞌnaj jinhanh,
chiswatxꞌenpaxo ebꞌnaj tzet chal iskꞌul yinh konoqꞌanh, yuxin ayonhikojanh yinh isyaꞌtajil.
38 »Yu huneꞌ tuꞌ yuxin chikotaqꞌwekojanh jinhanh koyijenanh chejbꞌanile chawaqꞌa, kat istzꞌibꞌnhelaxkanoj tato chikoyijehanh yinh kaw isyelal, kat yokkano sello yinh kat yanikanayo isbꞌi ebꞌnaj jahawilanh yibꞌanh yebꞌ ebꞌnaj levita, yebꞌ ebꞌyaꞌ kosacerdotehanh, xhi ebꞌnaj yinh istxah.