4 Haꞌ yaꞌ Esdras, tzꞌibꞌlom tuꞌ, ayahto yaꞌ yibꞌanh huneꞌ bꞌay nahat yekanh watxꞌebꞌilkanh yu ebꞌnaj; yinh iswatxꞌqꞌabꞌ yaꞌ Esdras tuꞌ linhankanh naj Matatías, naj Sema, naj Anías, yaꞌ Urías, yaꞌ Hilcías yebꞌ naj Maasías; haxa yinh ismekqꞌabꞌ yaꞌ Esdras tuꞌ, linhankanh naj Pedaías, naj Misael, naj Malquías, naj Hasum, naj Hasbadana, naj Zacarías yebꞌ naj Mesulam. 5 Ishajni yaꞌ Esdras yumal chejbꞌanile sata sunil konhobꞌ, wal xin linhankanh yaꞌ bꞌay nahat yekanh, haxa yet yawten yaꞌ tuꞌ sunil konhobꞌ ok tukno yabꞌeni. 6 Yalni yaꞌ Esdras kꞌul-la tzotiꞌ yinh Komam Jahawil, Komam niman yelapnoj, istaqꞌwi sunil konhobꞌ tuꞌ hakaꞌ tiꞌ: «¡Yubꞌojabꞌi! ¡Yubꞌojabꞌi!» xhi. Yanikanh isqꞌabꞌ, yinayo isbꞌa, yaniko ismay Komam Jahawil, yay jahnoj, yay xulnoj, yanayo ispalanh sat txꞌotxꞌ.

7 Haxa ebꞌnaj levita, haꞌ ton naj Jesúa, naj Bani, naj Serebías, naj Jamín, naj Acub, naj Sabetai, naj Hodías, naj Maasías, naj Kelita, naj Azarías, naj Jozabed, naj Hanán yebꞌ naj Pelaía, haꞌ ebꞌnaj ok halno tet konhobꞌ tzet chal yelapno chejbꞌanile tuꞌ, kaw xin huneꞌnhe bꞌay linhan konhobꞌ tuꞌ yabꞌeni. 8 Yawten ebꞌnaj yumal chejbꞌanile yet Komam Dios tuꞌ yinh kaw habꞌan, yalni ebꞌnaj yinh tzet chal yelapnoj yinh yabꞌxubꞌal anma, yu istxumniloj.^b

9 Haꞌ xin yaꞌ Nehemías gobernador, yebꞌ xin yaꞌ Esdras sacerdote yebꞌ tzꞌibꞌlom yinh chejbꞌanile, yebꞌ ebꞌnaj levita, haꞌ ok halno tzet yelapno ye chejbꞌanile tuꞌ tet konhobꞌ, yalni ebꞌnaj tet konhobꞌ tuꞌ hakaꞌ tiꞌ: «Haꞌ huneꞌ tzꞌayik tiꞌ, yet Komam Jahawil, yet koDiosal yehi, yuxin mach cheyiqꞌ bꞌiskꞌulal yebꞌ mach chexoqꞌi,» xhi ebꞌnaj. Yal ebꞌnaj hakaꞌ tuꞌ, yuto sunil konhobꞌ chiꞌoqꞌ yabꞌen yet yawtelax chejbꞌanile yet Komam Dios. 10 Lahwi tuꞌ yalnipaxo ebꞌnaj tet konhobꞌ: «Asiꞌwej, kat hewaꞌ yinh kaw kꞌul, kat heyukꞌni vino chiꞌ, kat heyawten mak matzet chislo waꞌo tekꞌatanh, yuto haꞌ huneꞌ tzꞌayik tiꞌ yet Komam Dios yehi, yuxin mach cheyiqꞌ bꞌiskꞌulal, yuto haꞌ tzalahilal yet Komam Dios Jahawil, jip chukoj,» xhi ebꞌnaj.

11 Istukbꞌalaxpaxo konhobꞌ tuꞌ yu ebꞌnaj levita hakaꞌ tiꞌ: «Mach chexoqꞌi yuto huneꞌ tzꞌayik tiꞌ yet Komam Dios yehi, wal xin mach cheyiqꞌ bꞌiskꞌulal,» xhi ebꞌnaj.

12 Hak tuꞌ yu isto sunil konhobꞌ tuꞌ waꞌoj, yukꞌni tzet chiyukꞌ yibꞌanh yoch, yawten yet anmahil waꞌo iskꞌatanh, yok huneꞌ niman tzalahilal yul yanma, yuto haꞌ tzet aqꞌlax iskuyuꞌ yinh ischejbꞌanil Komam Dios txumchalo yu.

13 Haxa yet hunxa tzꞌayik iskutxbꞌaniko isbꞌa ebꞌnaj iswiꞌehal ye yinh hunun majan anma yuxhta isbꞌa ay yul konhobꞌ, yebꞌ ebꞌyaꞌ sacerdote, yebꞌ ebꞌnaj levita iskꞌatanh yaꞌ Esdras, yaꞌ kuywawom yinh chejbꞌanile, yu iskuyni yaꞌ ebꞌnaj yinh tzet chal yelapno chejbꞌanile tuꞌ. 14 Hak tuꞌ yu yilchati yul yumal chejbꞌanile tuꞌ yu ebꞌnaj tato halbꞌilkano yu Komam Jahawil tet yaꞌ Moisés tato chiꞌehayo ebꞌnaj Israel yul lexhpat yet chiyekꞌtzen qꞌinh kaw ay yelapnoj, chiꞌekꞌtzelax yinh ishuj ixahaw. 15 Yebꞌ xin ta chiꞌaqꞌlax yohtanhelo anma Israel ay yulajla konhobꞌ yebꞌ bꞌey Jerusalén, tato chito anma yiqꞌati isqꞌabꞌ teꞌ olivo, yebꞌ isqꞌabꞌ teꞌ xoltelajil olivo, yebꞌ isqꞌabꞌ teꞌ arrayán, yebꞌ isqꞌabꞌ teꞌ palma, yebꞌ isqꞌabꞌ teꞌ qꞌebꞌtaj qꞌubꞌanxanhe xaj, kat iswatxꞌenkanh ebꞌnaj islexhpat yu teꞌ, hakaꞌ yalni chejbꞌanile ayayo yul hum. 16 Hak tuꞌ yu yelto konhobꞌ issayno isqꞌabꞌ te teꞌ, iswatxꞌenkanh hunun mak islexhpat yibꞌanh yakꞌalil yatut, yebꞌ yamaqꞌil Yatut Komam Dios, yebꞌ bꞌey txonhbꞌal ayko sata ispultahil ha Haꞌ, yebꞌ bꞌey txonhbꞌal ayko sata pulta chiyij Efraín. 17 Sunil anma Israel meltzoti bꞌey Babilonia iswatxꞌekanh islexhpat yehikꞌo anma yul. Kaw tzalahilal yu yekꞌtzen konhobꞌ qꞌinh lexhpat tuꞌ, yuto hatax yinh istiempohal yaꞌ Josué, iskꞌahol yaꞌ Nun, machi bꞌay yekꞌtze ebꞌnaj Israel qꞌinh lexhpat hakaꞌ tuꞌ.

18 Haꞌ yulbꞌal qꞌinh tuꞌ, hunun tzꞌayik yilni yaꞌ Esdras istzotiꞌal chejbꞌanile masanto yinh islahobꞌal tzꞌayik qꞌinh; hujebꞌ tzꞌayik xin ekꞌtzelax qꞌinh, haxa yinh iswaxajebꞌ tzꞌayik iskutxbꞌan isbꞌa konhobꞌ, huneꞌ kutxbꞌabꞌahil tuꞌ kaw ay yelapnoj. Isyije ebꞌnaj sunil tuꞌ hakaꞌtikꞌa isbꞌeybꞌalnhe yichmam ebꞌnaj.