Ebꞌnaj titna yinh yaꞌ Rubén
5
Yaꞌ Rubén haꞌ yaꞌ isbꞌabꞌel kꞌahol yaꞌ Israel, yajaꞌ yu way yaꞌ yebꞌ yixal ismam, yuxin haꞌ huneꞌ yehobꞌal yaꞌ yet bꞌabꞌel kꞌahole ekꞌto tet yaꞌ José, iskꞌahol yaꞌ Israel, yuxin matxa ok yaꞌ Rubén yul yehobꞌal yinh bꞌabꞌel kꞌahole. 2 Yajaꞌ hayet tzujanilxa haꞌ yaꞌ Judá, haꞌ yaꞌ kaw ay yelapno elkaniko xol ebꞌyaꞌ yuxhtaj, yebꞌ xin haꞌ yaꞌ ok yahawo xol yuxhta tuꞌ; yajaꞌ haꞌ huneꞌ ehobꞌal yet bꞌabꞌel kꞌahole, haꞌ tet yaꞌ José aqꞌlaxi. 3 Ebꞌnaj iskꞌahol yaꞌ Rubén, yaꞌ isbꞌabꞌel iskꞌahol yaꞌ Israel, haꞌ ton ebꞌnaj tiꞌ: naj Hanoc, naj Falú, naj Hezrón, naj Carmi.4 Ebꞌnaj titna yinh naj Joel,a haꞌ ton ebꞌnaj tiꞌ: naj Semaías, iskꞌahol naj ye naj Gog, naj Gog, iskꞌahol naj ye naj Simei, 5 naj Simei, iskꞌahol naj ye naj Micaía, naj Micaía iskꞌahol naj ye naj Reaía, naj Reaía iskꞌahol naj ye naj Baal, naj Baal iskꞌahol naj ye naj Beera. 6 Naj Beera tuꞌ yahawil xol ebꞌnaj titna yinh yaꞌ Rubén, haꞌ xin naj ilaxto preso yu naj Tiglat-pileser, isreyal Asiria.
7 Ebꞌnaj titna yinh naj Beera, haꞌ ebꞌnaj yahawil yinh hunun majan yuxhtanhe isbꞌa, hak tiꞌ yu istzꞌibꞌnhelaxayo isbꞌi yichmam ebꞌnaj, haꞌ ton naj Jeiel, naj bꞌabꞌel, naj Zacarías, 8 naj Bela, ismam naj Bela ye naj Azaz, ismam icham naj ye naj Sema; naj Sema tuꞌ ismam naj ye naj Joel, haꞌ ebꞌnaj tuꞌ ehikꞌo ebꞌnaj bꞌey txꞌotxꞌ Aroer masanta bꞌey txꞌotxꞌ Nebo yebꞌ Baal-meón. 9 Yehpaxayo ebꞌnaj bꞌay yetkꞌulal bꞌay chito tzꞌayik, masanta bꞌay chiꞌichiti txꞌotxꞌ desierto; chitaichiti txꞌotxꞌ bꞌey haꞌ niman Éufrates, yuto kaw nimankano ismeꞌ ebꞌnaj bꞌey txꞌotxꞌ Galaad.
10 Yulbꞌal hunteqꞌan tiempo yet ayko yaꞌ Saúl reyal yaniko ebꞌnaj titna yinh yaꞌ Rubén tiꞌ howal yinh ebꞌnaj agareno, istzabꞌcha ebꞌnaj agareno yu ebꞌnaj, iskankano ebꞌnaj yulaj ismantiado ebꞌnaj sunil yul ismajul txꞌotxꞌ Galaad yinh yetkꞌulal bꞌay chito tzꞌayik.
Ebꞌnaj titna yinh yaꞌ Gad
11 Ebꞌnaj iskꞌahol yaꞌ Gad ehayo ebꞌnaj satakꞌti ebꞌnaj iskꞌahol yaꞌ Rubén, sat txꞌotxꞌ Basán masanta bꞌey Salca. 12 Haꞌ naj Joel, haꞌ naj bꞌabꞌel yahaw bꞌey txꞌotxꞌ Basán, tzujan tuꞌ yok naj Safán, lahwi tuꞌ yok naj Jaanai yebꞌ naj Safat. 13 Haxa ebꞌnaj yuxhta ebꞌnaj yinh hunun majan haꞌ ebꞌnaj tiꞌ: naj Micael, naj Mesulam, naj Seba, naj Jorai, naj Jacán, naj Zía yebꞌ naj Heber, hujwanh ebꞌnaj yinh sunil.
14 Ebꞌnaj tuꞌ titna yinh naj Abihail; naj Abihail xin, iskꞌahol naj Huri ye naj, naj Huri, iskꞌahol naj Jaroa ye naj; naj Jaroa, iskꞌahol naj Galaad ye naj; naj Galaad, iskꞌahol naj Micael ye naj; naj Micael iskꞌahol naj Jesisai ye naj; naj Jesisai, iskꞌahol naj Jahdo ye naj; naj Jahdo iskꞌahol naj Buz ye naj. 15 Naj Ahí, iskꞌahol naj Abdiel ye naj, naj Abdiel iskꞌahol naj Guni ye naj. Haꞌ naj Ahí tuꞌ yahaw naj xol ebꞌnaj yuxhtaj. 16 Eyayo ebꞌnaj tuꞌ sat txꞌotxꞌ Galaad yebꞌ sat txꞌotxꞌ Basán yebꞌ yaldeahil bꞌay ay tzet chislo ismeꞌ ebꞌnaj sat txꞌotxꞌ Sarón masanta yinhla istiꞌla ismohonal txꞌotxꞌ. 17 Sunil ebꞌnaj tuꞌ bꞌislax ebꞌnaj yinh hunun majan yuninal yinh istiempohal yet ok yaꞌ Jotam isreyalo Judá yebꞌ yinh istiempohal yet yok yaꞌ Jeroboam isreyalo Israel.
Istzotiꞌal yikta yox majan ebꞌnaj Israel
18 Ebꞌnaj iskꞌahol yaꞌ Rubén yebꞌ ebꞌnaj iskꞌahol yaꞌ Gad yebꞌ yikta majan ebꞌnaj Manasés kaw ay yip yanma ebꞌnaj yaqꞌni howal, yuto ay yescudo ebꞌnaj yebꞌ yespada, yebꞌ helan ebꞌnaj isqꞌojwa yu litꞌ, kaw xin kuybꞌil ebꞌnaj yaqꞌni howal; 44,760 isbꞌisil ebꞌnaj yinh sunil; chixin elto ebꞌnaj yaqꞌaꞌ howal. 19 Ebꞌnaj tuꞌ, yaqꞌ ebꞌnaj howal yinh ebꞌnaj agareno yebꞌ yinh ebꞌnaj ah Jetur, ah Nafis yebꞌ yinh ebꞌnaj ah Nadab. 20 Kolwa Komam Dios yinh ebꞌnaj isqꞌoji ebꞌnaj yinh ebꞌnaj agareno yebꞌ yinh ebꞌnaj ayko yetbꞌiho ebꞌnaj agareno tuꞌ, yaykꞌay ebꞌnaj yul isqꞌabꞌ ebꞌnaj, yuto isqꞌan ebꞌnaj tet Komam Dios tato chikolwa Komam yinh ebꞌnaj. 21 Yokkano isnoqꞌ ebꞌnaj agareno tuꞌ yu ebꞌnaj, 50 (lahonhebꞌ yoxkꞌal) mil noꞌ camello, 250 mil noꞌ meꞌ, kabꞌ mil noꞌ burro, tzabꞌcha 100 mil anma yu ebꞌnaj. 22 Kaw xin txꞌiꞌal ebꞌnaj agareno tuꞌ kami, yuto huneꞌ howal tuꞌ yet Komam Dios yehi; yehayo yikta yox majan ebꞌnaj Israel sat istxꞌotxꞌ ebꞌnaj tuꞌ masanta yet yalaxto ebꞌnaj judío preso yul nan konhobꞌal.
23 Ebꞌnaj yikta majan Manasés tuꞌ kaw pohchakanokanh isbꞌisil ebꞌnaj, yehayo ebꞌnaj bꞌey txꞌotxꞌ Basán masanta bꞌey txꞌotxꞌ Baal-hermón, yebꞌ bꞌey Senir, yebꞌ bꞌey chewal txꞌotxꞌ Hermón. 24 Haꞌ ebꞌnaj iswiꞌehal yinh hunun majan ebꞌnaj xin, haꞌ ton naj Efer, naj Isi, naj Eliel, naj Azriel, naj Jeremías, naj Hodavías, yebꞌ naj Jahdiel. Ebꞌnaj tuꞌ kaw ay yip yanma ebꞌnaj, yebꞌ kaw helan ebꞌnaj, yebꞌ xin kaw chibꞌinakano ebꞌnaj, haꞌ ebꞌnaj ok yahawilo yinh ebꞌnaj titna yinh yichmam. 25 Yajaꞌ xin ok ebꞌnaj manhkꞌomal tet Komam Dios, isDiosal yichmam, yetanto isbꞌa ebꞌnaj, yok ebꞌnaj yinoyo isbꞌa tet istioxh hunteqꞌan konhobꞌ yilo Komam Jahawil yinh sat ebꞌnaj. 26 Yuxin ischej Komam Dios, isDiosal ebꞌnaj Israel naj Pul yebꞌ naj Tiglat-pileser isreyal ebꞌnaj asirio yanoko howal yinh ebꞌnaj, yilaxto ebꞌnaj rubenita, ebꞌnaj gadita yebꞌ yikta majan ebꞌnaj Manasés tuꞌ preso bꞌey Halah, bꞌey Habor, bꞌey Hara yebꞌ bꞌey istiꞌ haꞌ Gozán masanto tinanh.