Ebꞌnaj titna yinh yaꞌ Judá
4
Haꞌ ebꞌnaj tiꞌ iskꞌahol yaꞌ Judá: Naj Fares, naj Hezrón, naj Carmi, naj Hur yebꞌ naj Sobal. 2 Naj Sobal, iskꞌahol naj ye naj Reaía, naj Reaía iskꞌahol naj ye naj Jahat, naj Jahat, iskꞌahol naj ye naj Ahumai yebꞌ naj Lahad. Haꞌ hunmajan ebꞌnaj tiꞌ haꞌ ton ebꞌnaj zoratita.
3 Haꞌ ebꞌnaj iskꞌahol naj Etam, haꞌ ton ebꞌnaj tiꞌ: naj Jezreel, naj Isma yebꞌ naj Ibdas, ay xin huneꞌ yanabꞌ ebꞌnaj chiyij Haze-lelponi.
4 Naj Punuel, haꞌ naj ismam naj Gedor, haxa naj Ezer haꞌ naj ismam naj Husa. Haꞌ ebꞌnaj tuꞌ titna yinh naj Hur, bꞌabꞌel yunin ix Efrata, yichmam ebꞌnaj ah Belén.
5 Naj Asur, ismam naj Tecoa, kawanh yixal naj, haꞌ ton ix Hela yebꞌ ix Naara. 6 Ebꞌnaj yunin ix Naara, haꞌ ton ebꞌnaj tiꞌ: naj Ahuzam, naj Hefer, naj Temeni yebꞌ naj Ahastari. Haꞌ ebꞌnaj tuꞌ yinh ix Naara pitzkꞌa ebꞌnaj. 7 Haxa ebꞌnaj yunin ix Hela haꞌ ton ebꞌnaj tiꞌ: naj Zeret, naj Jezoar yebꞌ naj Etnán.
8 Naj Cos iskꞌahol naj ye naj Anub yebꞌ naj Zobeba; yuninal yuninal naj Cos ye naj Aharhel, iskꞌahol naj Harum. 9 Naj Jabes kaw ay yelapno elkaniko naj xol yuxhtaj, hayet ispitzkꞌa naj, Jabes, yij isbꞌi naj yu ismiꞌ, yu yal ix hakaꞌ tiꞌ: «Yinh isyaꞌtajil pitzkꞌa huneꞌ wunintiꞌan,» xhi ix.a 10 Naj Jabes tuꞌ txahli naj tet Komam Dios, isDiosal Israel, yalni naj yinh istxah hakaꞌ tiꞌ: «Mamin, chinqꞌanan tawet tato chawayo hayaxil wibꞌanhan, chawaqꞌni niman intxꞌotxꞌan, kat hawok wetbꞌihojan, chinhakolnihan yul isqꞌabꞌ istxꞌojal, hak tuꞌ xin mach chul istxꞌojal winhan,» xhi naj. Ispajtzen Komam tzet isqꞌan naj Jabes yinh istxah tuꞌ.
11 Naj Quelub yuxhta naj Súa, iskꞌahol naj ye naj Mehir, haꞌ xin naj Mehir, haꞌ naj ismam naj Estón. 12 Haꞌ naj Estón, iskꞌahol naj ye naj Bet-rafa, naj Paseah, yebꞌ naj Tehina. Naj Tehina tuꞌ, haꞌ naj watxꞌenkanh konhobꞌ Nahas. Haꞌ ton ebꞌnaj tuꞌ ay yul konhobꞌ Reca.
13 Ebꞌnaj iskꞌahol naj Cenaz, haꞌ ton ebꞌnaj tiꞌ: yaꞌ Otoniel yebꞌ naj Seraías. Haxa ebꞌnaj iskꞌahol yaꞌ Otoniel haꞌ ebꞌnaj tiꞌ: naj Hatat, 14 yebꞌ naj Meonotai. Naj Meonotai iskꞌahol naj ye naj Ofra. Naj Seraías iskꞌahol naj ye naj Joab, haꞌ naj Joab tuꞌ yichmam ebꞌnaj ay bꞌey akꞌal Carisim, hak tuꞌ isbꞌi iskonhobꞌ ebꞌnaj yuto iswatxꞌe ebꞌnaj tzettaj ye tuꞌ kaw kꞌulchꞌan jilni.b 15 Ebꞌnaj iskꞌahol yaꞌ Caleb, iskꞌahol yaꞌ Jefone haꞌ ton ebꞌnaj tiꞌ: naj Iru, naj Ela yebꞌ naj Naam. Naj Ela iskꞌahol naj ye naj Cenaz.c
16 Ebꞌnaj iskꞌahol naj Jehalelel haꞌ ebꞌnaj tiꞌ: naj Zif, naj Zifa, naj Tirias yebꞌ naj Asareel.
17 Haxa ebꞌnaj iskꞌahol naj Esdras, haꞌ ebꞌnaj tiꞌ: naj Jeter, naj Mered, naj Efer, yebꞌ naj Jalón. Haxa naj Mered ay huneꞌ iskutzꞌin naj chiyij María yebꞌ kawanh iskꞌahol naj, huneꞌ naj chiyij Samai, hunxa naj chiyij Isbꞌa. Naj Isbꞌa haꞌ naj ismam naj Estemoa. 18 Haxa ebꞌnaj yunin ix Jehudaía hunxa yixal naj Mered, haꞌ ton ebꞌnaj tiꞌ: naj Jared ismam naj Gedor, naj Heber ismam naj Soco, yebꞌ naj Jecutiel ismam naj Zanoa. Haꞌ ebꞌnaj tuꞌ yunin ix Bitia, iskutzꞌin naj faraón yixal naj Mered.
19 Haꞌ ix yixal naj Hodías yanabꞌ naj Naham, haꞌ yunin ix haꞌ ton naj ismam naj Keila, ah garmita yebꞌ naj Estemoa, naj ah maacateo.
20 Ebꞌnaj iskꞌahol naj Simón haꞌ ton ebꞌnaj tiꞌ: naj Amnón, naj Rina, naj Ben-anán yebꞌ naj Tilón. Ebꞌnaj iskꞌahol naj Isi haꞌ ebꞌnaj tiꞌ, naj Zohet yebꞌ naj Benzohet.
21 Haxa ebꞌnaj iskꞌahol naj Sela, iskꞌahol yaꞌ Judá, haꞌ ton ebꞌnaj tiꞌ: Naj Er naj ismam naj Leca, naj Laada ismam naj Maresa. Yinh naj Sela tuꞌ titpaxo hunmajanxa ebꞌnaj chimunla yinh iswatxꞌen qꞌap lino bꞌey Bet-asbea. 22 Iskꞌahol naj Sela tuꞌ yepaxo naj Joacim yebꞌ ebꞌnaj ay bꞌey Cozeba yebꞌ naj Joás yebꞌ naj Saraf; ebꞌnaj tiꞌ ekꞌle ebꞌnaj yahawilo yinh txꞌotxꞌ Moab, lahwi tuꞌ ismeltzopaxo ebꞌnaj bꞌey Lehem, hak tuꞌ yekanayo yul hum tzꞌibꞌnhebꞌilkano yettax kaw payat. 23 Ebꞌnaj tuꞌ tzꞌajom xi ebꞌnaj, ehayo ebꞌnaj xolaj tzꞌunubꞌ yebꞌ yulaj peyabꞌ iskꞌatanh isreyal, chixin isyije ebꞌnaj tzet chal isreyal tuꞌ.
Ebꞌnaj titna yinh yaꞌ Simeón
24 Ebꞌnaj iskꞌahol yaꞌ Simeón, haꞌ ebꞌnaj tiꞌ: naj Nemuel, naj Jamín, naj Jarib, naj Zera, naj Saúl. 25 Naj Saúl iskꞌahol naj ye naj Salum, naj Salum iskꞌahol naj ye naj Mibsam, naj Mibsam iskꞌahol naj ye naj Misma. 26 Ebꞌnaj iskꞌahol naj Misma haꞌ ebꞌnaj tiꞌ: naj Hamuel, naj Hamuel iskꞌahol naj ye naj Zacur, naj Zacur iskꞌahol naj ye naj Simei. 27 16 (Wajlahonhwanh) iskꞌahol naj Simei yok wajwanh iskutzꞌin naj, yajaꞌ ebꞌnaj isnoh ebꞌix tuꞌ mach txꞌiꞌalo yuninal ebꞌnaj, yuxin mach pohchakanh ebꞌnaj hakaꞌ yuninal yaꞌ Judá.
28 Ebꞌnaj tuꞌ ehayo ebꞌnaj yul hunteqꞌan konhobꞌ tiꞌ; konhobꞌ Beerseba, Molada, Hazar-sual, 29 Bilha, Ezem, Tolad, 30 Betuel, Horma, Siclag, 31 Bet-marcabot, Hazar-susim, Bet-birai yebꞌ Saaraim. Haꞌ hunteqꞌan tuꞌ iskonhobꞌ ebꞌnaj masanta yet yok yaꞌ David reyal. 32 Haxa yaldeahil iskonhobꞌ ebꞌnaj haꞌ hunteqꞌan tiꞌ: Etam, Aín, Rimón, Toquén yebꞌ Asán, howebꞌ yinh sunil, 33 yebꞌ sunil yaldeahil hoyaniko yinh hunteqꞌan konhobꞌ tuꞌ, masanta chiꞌapni bꞌey Baal. Haꞌ hunteqꞌan tuꞌ iskonhobꞌ ebꞌnaj yebꞌ haꞌ tuꞌ istxolal isbꞌi yuninal yuninal ebꞌnaj.
34 Naj Mesobab, naj Jamlec, yebꞌ yaꞌ Josías, iskꞌahol naj Amasías ye ebꞌnaj. 35 Naj Joel yebꞌ yaꞌ Jehú iskꞌahol naj Josibías ye ebꞌnaj; naj Josibías tuꞌ iskꞌahol yaꞌ Seraías ye naj, yaꞌ Seraías iskꞌahol naj Asiel ye yaꞌ. 36 Naj Elioenai, naj Jaacoba, naj Jesohaía, naj Asaías, naj Adiel, naj Jesimiel, naj Benaía, 37 yebꞌ naj Ziza iskꞌahol naj Sifi; haxa naj Sifi iskꞌahol naj ye naj Alón, naj Alón, iskꞌahol naj ye naj Jedaías, naj Jedaías iskꞌahol naj ye naj Simri, naj Simri iskꞌahol naj ye naj Semaías. 38 Hak tiꞌ istxolal isbꞌi ebꞌnaj ok yahawo hunun majan ebꞌnaj tuꞌ, kaw xin pohchakanokanh isbꞌisil ebꞌnaj, 39 yuxin masanta apni ebꞌnaj issayaꞌ bꞌay chilow ismeꞌ bꞌay chonhokapno bꞌey Gedor, masanta bꞌey yetkꞌulal bꞌay chiꞌahilo tzꞌayik yinh akꞌal. 40 Haꞌ bꞌey tuꞌ xin ilcha bꞌay kaw ay telaj, yebꞌ telaj kaw kꞌul bꞌay chilow ismeꞌ ebꞌnaj. Haꞌ bꞌey tuꞌ kaw ay txꞌo txꞌotxꞌ yebꞌ kaw haman sat txꞌotxꞌ yebꞌ xin kaw aqꞌankꞌulal ye ebꞌnaj sat txꞌotxꞌ. Haꞌ bꞌey tuꞌ xin ekꞌlena ebꞌnaj yuninal naj Cam yet yalanhtokanoj. 41 Haꞌ xin ebꞌnaj tzꞌibꞌnhebꞌilkano isbꞌi tiꞌ apni ebꞌnaj yinh istiempohal yet ekꞌ yaꞌ Ezequías isreyalo Judá sat istxꞌotxꞌ ebꞌnaj titna yinh naj Cam, yuchkꞌanto ebꞌnaj ismantiado ebꞌnaj aykanh yatutoj yebꞌ iscampamento, istanhtzenkanilo ebꞌnaj masanta tinanh, haxa xin ebꞌnaj kankano sat istxꞌotxꞌ ebꞌnaj tuꞌ yuto kaw ay tzet chislo ismeꞌ ebꞌnaj bꞌey tuꞌ. 42 Yebꞌ xin ay 500 ebꞌnaj titna yinh yaꞌ Simeón, to ehoyo bꞌey txꞌotxꞌ chewal txꞌotxꞌ Seir, yinito ebꞌnaj haywanh ebꞌnaj tiꞌ yahawiloj; naj Pelatías, naj Nearías, naj Refaías yebꞌ naj Uziel; ebꞌnaj tuꞌ iskꞌahol naj Isi ye ebꞌnaj. 43 Haꞌ ebꞌnaj tuꞌ tanhtzenkanilo hunteqꞌanxa ebꞌnaj Amalec kantokano bꞌey tuꞌ, ehayo ebꞌnaj bꞌey tuꞌ masanto tinanh.