Yet yalnilo naj José yinh tzet chalilo iswayik kawanh ebꞌnaj presowom
40
Yet hunel xin ay kawanh ebꞌnaj yako ismul xol ebꞌnaj chimunla yul palacio yinta naj rey Egipto. Huneꞌ naj yahawil yinh ebꞌnaj chibꞌatxnikꞌo vino tet naj rey, hunxa naj xin yahawil yinh ebꞌnaj watxꞌem pan. 2 Yu huneꞌ tuꞌ, yuxin tit ishowal naj rey yinh naj yahawil yinh ebꞌnaj chibꞌatxnikꞌo vino tuꞌ, yebꞌpaxo yinh naj yahawil yinh ebꞌnaj watxꞌem pan. 3 Yanito naj ebꞌnaj yul huneꞌ preso ay bꞌey yatut naj Potifar, naj yahawil yinh ebꞌnaj soldado chitanhen naj rey. Haꞌ yul huneꞌ preso tuꞌ xin ayikto naj José. 4 Yet yapni ebꞌnaj kawanh tuꞌ yul preso, istaqꞌenkano naj Potifar tuꞌ ebꞌnaj tet naj José. Wal ebꞌnaj kawanh tuꞌ kaw nahatil okto ebꞌnaj yul preso.5 Yet huneꞌ aqꞌbꞌal xin, waykel ebꞌnaj kawanh chitikꞌa munla yinta naj rey tuꞌ, hunun iswayik ebꞌnaj tuꞌ ay tzet chal yelapnoj. 6 Hayet kaw sahabꞌ sakꞌayalil xin yul naj José yilno ebꞌnaj, kaw xin bꞌiskꞌulal ye ebꞌnaj. 7 Isqꞌambꞌen naj José tet ebꞌnaj:
—¿Tzet yinh kaw bꞌiskꞌulal wilnihan hesat? xhi naj.
8 Istaqꞌwi ebꞌnaj:
—To ay hunun kowayikanh hunun honhanh. Machi xin mak chu yalnilo yinh tzet chal yelapnoj, xhi ebꞌnaj. Yalni naj José tuꞌ xin:
—Hanhechꞌan Komam Dios chu yalniloj yinh tzet chalilo wayike. Halwe hewayik tuꞌ wetan, xhi naj.
9 Yichiko naj yahawil yinh ebꞌnaj chibꞌatxnikꞌo vino yalni iswayik tet naj José tuꞌ hakaꞌ tiꞌ:
—Yinh inwayik tuꞌan mawilan huneꞌ yoj teꞌ uva. 10 Oxebꞌ xin isqꞌabꞌ teꞌ, hantanhepaxo iswol teꞌ, yebꞌ xin hantanhe isxumak teꞌ maꞌelikoj. Kaw xin yinh anhe maschaybꞌako teꞌ sat, maqꞌanbꞌinalo sat teꞌ. 11 Tzabꞌil xin iscopa naj rey wuhan, maxininbꞌixnilojan sat teꞌ tuꞌ, manyatzꞌnaytojan yal teꞌ yul chꞌen copa, maxinwaqꞌnihan chꞌen copa tuꞌ yul isqꞌabꞌ naj rey. Hak tuꞌ mayu inwaykenan, xhi naj tet naj José. 12 Yalni naj José tet naj:
—Hak tiꞌ chal yelapno hawayik hakaꞌ tilah: Teꞌ oxebꞌ isqꞌabꞌ uva tuꞌ yechel oxebꞌ tzꞌayik ye teꞌ. 13 Hayet oxe tinanh chaxhok sata naj rey kat yilni naj tzet chaxhelikoj. Yajaꞌ xin chaxhmeltzoko yinh hamunil yu naj, kat hawok habꞌatxnokꞌo vino tet naj hakaꞌtikꞌa hamunil yet yalanhtokanoj. 14 Yet chaxhmeltzo yinh hamunil tuꞌ, kaw chinhanatininojan. Kaw chitzꞌay nino hakꞌul winhan kat hatzotel nino winhan tet naj rey tuꞌ kat weltijan yul preso tiꞌ. 15 Hanintiꞌan elqꞌabꞌil intijan sat txꞌotxꞌ bꞌay ay ebꞌnaj hebreo. Machi xin nino inmulan, yajaꞌ ayiniktijan yul preso tiꞌ, xhi naj.
16 Yet yabꞌen naj yahawil yinh ebꞌnaj watxꞌem pan tato kaw kꞌul chal yelapno iswayik naj yetbꞌi naj tuꞌ, yokpaxo naj yalno iswayik tet naj José, yalni naj hakaꞌ tiꞌ:
—Manwaykehan tato ayahto oxebꞌ nixhte motx ixim pan saj yinh inwiꞌan. 17 Yajaꞌ teꞌ motx aykanh yibꞌanh kaw hantanhe ej ixim pastel ayayto yul teꞌ. Haꞌ ixim tuꞌ xin yet naj rey ixim, yajaꞌ hul noꞌ chꞌik islohno ixim ayayto yul teꞌ motx tuꞌ. Hak tuꞌ mayu inwaykenan, xhi naj.
18 Yalni naj José xin:
—Hawayik tuꞌ hak tiꞌ chal yelapnoj: Teꞌ nixhte oxebꞌ motx tuꞌ yechel oxebꞌ tzꞌayik ye teꞌ. 19 Yet oxe tinanh chaxhok sata naj rey yu yilni naj tzet chaxhelikoj. Wal xin chischej naj elo hawiꞌ kat hatꞌunhbꞌalaxkanh yinh huneꞌ te teꞌ, haꞌ xin noꞌ usmij chul tꞌohnoto hanimanil, xhi naj José tet naj.
20 Haxa yet yapni yinh yox tzꞌayik xin, yekꞌtzen naj rey huneꞌ niman qꞌinh yebꞌ sunil ebꞌnaj chimunla yinta yul palacio, yuto tzꞌajna naj yinh ishabꞌilal. Yinh sat sunil ebꞌnaj kutxaniko tuꞌ, ischej naj ilaxoti ebꞌnaj kawanh ayikto yul preso, naj yahawil yinh ebꞌnaj chibꞌatxnikꞌo vino, yebꞌ naj yahawil yinh ebꞌnaj watxꞌem pan. 21 Wal naj yahawil yinh ebꞌnaj chibꞌatxnikꞌo vino, ok naj yinh ismunil hunelxa yu naj rey, hakaꞌtikꞌa ismunil naj yet yalanhtokanoj. 22 Yajaꞌ wal naj yahawil yinh ebꞌnaj watxꞌem pan xin, tꞌunhbꞌalaxkanh naj hakaꞌtikꞌa yu yalni naj José. 23 Haxa yet ayxako naj yahawil yinh ebꞌnaj chibꞌatxnikꞌo vino yinh ismunil, machi isnahti naj naj José.