Naj José yebꞌ yixal naj Potifar
39
Yet yilaxto naj José yu ebꞌnaj ismaelita bꞌey txꞌotxꞌ Egipto, istxonhto ebꞌnaj naj tet huneꞌ naj chiyij Potifar, ay bꞌey Egipto tuꞌ. Naj Potifar tuꞌ chimunla naj yinta naj rey yul palacio, yebꞌpaxo xin yahawil yeko naj yinh ebꞌnaj soldado chitanhen naj rey tuꞌ. 2 Wal naj José kaw ayko Komam Dios yetbꞌiho naj, kaw yayo Komam iskꞌulal yibꞌanh naj yet yok naj ischejabꞌo naj Potifar, naj Egipto tuꞌ. 3 Naj Potifar, yil naj tato kaw ayko Komam Dios yetbꞌiho naj José yuxin sunil tzet chiswatxꞌe naj, kaw ayayo isyaxil Komam yibꞌanh. 4 Yu huneꞌ tuꞌ yuxin kaw kawxi iskꞌul naj Potifar yinh naj José, haꞌ naj xin chischej naj. Naj Potifar tuꞌ yako naj José yahawilo yatut, yebꞌ xin sunil tzet ay naj kaw okkano yul isqꞌabꞌ naj José tuꞌ. 5 Wal Komam Dios xin kaw yakanayo Komam isyaxil yibꞌanh naj Potifar yet yokkano naj José yahawo yinh sunil tzet ay naj. Kaw yayo Komam isyaxilal yibꞌanh ej istzꞌunubꞌ naj yebꞌ yinh tzet ay yul yatut naj. 6 Yet ayxako sunil yul isqꞌabꞌ naj José tuꞌ, matxatikꞌa tzet chal iskꞌul naj Potifar, haxanhe iswaꞌ naj.Wal naj José, kaw kꞌulchꞌan jilni naj yebꞌ kaw kawla winaj naj. 7 Haxa yet yekꞌto tiempo xin, yaniko yanma ix yixal naj Potifar yinh naj. Yet hunel xin yal ix tet naj hakaꞌ tiꞌ:
—Wayanh inkꞌatanhan, xhi ix.
8 Wal naj José tuꞌ mach chisje naj, yalni naj tet ix:
—¿Tom mach hawohtajoj tato sunil tzet ay yaꞌ wahawan aykaniko yul inqꞌabꞌan yu yaꞌ? Yuxin kaw matzet chal iskꞌul yaꞌ. 9 Sunil tzet ay bꞌey tiꞌ yahawil wehikojan yinh, chu intzabꞌnihan. Wal hach xin mach chu kaxhintzabꞌnihan yuto yixal wahawilan hawehi, yuxin mach chu inwatxꞌenan huneꞌ istxꞌojal tiꞌ, kat waniko inmulan yul sat Komam Dios, xhi naj tet ix. 10 Wal ix xin kaw hunun tzꞌayik yeliko yaw ix yinh naj José tuꞌ yunhe isway naj yebꞌ ix, yajaꞌ mach chisyije naj yinh tzet chal ix. 11 Yet hunel xin okto naj José munil yul nha, machi xin hunu mak aykꞌoj, 12 yok tzujnoj ix yinh xil isqꞌap naj, yalni ix tet naj hakaꞌ tiꞌ:
—Ayxikꞌa chaxhwaynino inkꞌatanhan, xhi ix tet naj. Wal naj José tuꞌ istzikilo isbꞌa naj yul isqꞌabꞌ ix, yelkanh naj, iskankano ischumpa naj yul isqꞌabꞌ ix. 13 Hayet yilni ix tato kankano ischumpa naj tet ix, yet yelkanh naj, 14 yawtenti ix ischejabꞌ chimunla yintaj, yalni ix hakaꞌ tiꞌ:
—Ilwekꞌanabꞌ, huneꞌ naj hebreo yiti wichamiltiꞌan, kaw chꞌok naj etlo jinh. Maꞌokto naj bꞌay ay hinan yunhe isway naj inkꞌatanhan yalni, yajaꞌ manawihan yinh kaw ip. 15 Yet manawihan xin maꞌelto naj yinh anhe, masbꞌejnikano naj ischumpa, xhi ix tet ischejabꞌ tuꞌ.
16 Lahwi tuꞌ iskꞌubꞌanto ix ischumpa naj José tuꞌ yunhe isyeni ix tet yichamil yet chiꞌapni naj yatut tuꞌ. 17 Hayet yapni naj xin, yok ix yalno tet naj hakaꞌtikꞌa yute yalni ix tet ischejabꞌ, yalni ix:
—¡Ilkꞌanabꞌ tzet mayute huneꞌ naj hebreo hawitij! Maꞌokto naj bꞌay chinwayan yu isway naj inkꞌatanhan yalni. 18 Yajaꞌ yet makinawihan yinh kaw ip maꞌelkanh naj, masbꞌejnikano naj ischumpa, xhi ix tet yichamil.
19 Yet yabꞌen naj yalni ix huneꞌ tuꞌ, kaw tit ishowal naj. 20 Ischejni naj tzabꞌlaxoyo naj José, yalaxikto naj yul huneꞌ preso bꞌay ayikto ebꞌnaj ispresowom naj rey. 21 Wal Komam Dios xin aynhetikꞌako Komam yetbꞌiho naj José tuꞌ, kaw xin isyelo Komam iskꞌulal yinh naj. Wal naj chitanhen teꞌ preso tuꞌ kawxi iskꞌul naj yinh naj José. 22 Yuxin yaqꞌ naj ismunil naj José yinh istanhen ebꞌnaj presowom ayikto bꞌey tuꞌ. Haxa xin naj José tuꞌ chihalni tzet yilal iswatxꞌelax bꞌey tuꞌ. 23 Wal naj yahaw preso matxa yilalo chiꞌekꞌ naj yilaꞌ munil ayko yalanh ischejbꞌanil naj José, yuto ayko Komam Dios yetbꞌiho naj, yuxin sunil tzet chiswatxꞌe naj kaw kꞌul chiꞌelikoj.