6 Haxa yet yekꞌto tiempo xin yaqꞌni mohyo naj Judá naj Er, naj isbꞌabꞌel kꞌahol yebꞌ huneꞌ ix chiyij Tamar. 7 Naj Er tuꞌ, kaw mach kꞌulo isbꞌeybꞌal naj yul sat Komam Dios yuxin pet kam naj yu Komam. 8 Lahwi tuꞌ yalni naj Judá tet iskꞌahol Onán hakaꞌ tiꞌ:

—Wal tinanh chawiqꞌ yixal hawuxhta tiꞌ hakaꞌ yalni koley, haxinwal ay yunin ix hawu kat yok yuninalo hawuxhta tuꞌ, xhi ismam naj tuꞌ tet.

9 Wal naj Onán tuꞌ mach chisje iskꞌul naj tato ay yuninal naj yebꞌ ix, yuto mach yuninalo naj chukoj. Yuxin hunta el chiway naj yebꞌ ix mach chisje naj ta chipitzkꞌati yunin ix yebꞌ naj. 10 Wal Komam Dios xin mach chitzala Komam yinh huneꞌ chute naj tuꞌ, yuxin yipaxilo Komam isqꞌinal naj. 11 Lahwi tuꞌ yalni naj Judá tet ix Tamar, ix yixal iskꞌahol hakaꞌ tiꞌ:

—Wal tinanh asiꞌ iskꞌatanh hamam, wal haweh bꞌey tuꞌ jabꞌ tzehbꞌikanh inkꞌaholan naj Sela, xhi naj.

(Yal naj Judá hakaꞌ tuꞌ yuto istxum naj tato kꞌuxantaxka iskampaxo naj Sela yet chiqꞌni naj yixal yuxhtaj, hakaꞌ yu iskamto ebꞌnaj yuxhta naj Sela tuꞌ.)

Isto ix Tamar iskꞌatanh ismiꞌ yebꞌ ismam, haꞌ tuꞌ xin ehayo ix.

12 Haxa yet yekꞌto tiempo xin iskam yixal naj Judá, ix iskutzꞌin naj Súa. Naj Judá yiqꞌ naj bꞌiskꞌulal yinh yixal. Haxa yet yekꞌto isbꞌiskꞌulal naj tuꞌ, isto naj bꞌey konhobꞌ Timnat, haꞌ bꞌey tuꞌ xin ay ebꞌnaj chiꞌinilo xil ismeꞌ naj. Tzujanpaxo xin huneꞌ yamigo naj chiyij Hira yintaj, naj ah Adulam. 13 Hayet yabꞌen ix Tamar ta to naj Judá, ismam yichamil ix, bꞌey konhobꞌ Timnat yiqꞌalo xil ismeꞌ, 14 yinilo ix xil isqꞌap yet bꞌiskꞌulal, iswatxꞌen isbꞌa ix, yaniko ix huneꞌ qꞌap qꞌap yinh sat yunhe mach chitxumchalo ix. Lahwi tuꞌ isto ix istzꞌonhbꞌano isbꞌa istxam konhobꞌ Enaim, ayayo yul isbꞌelal konhobꞌ Timnat. Yute ix hakaꞌ tuꞌ yuto kaw tzehxa naj Sela, machi bꞌaqꞌinh xin chiꞌaqꞌlax mohyo ix yebꞌ naj yu naj Judá.

15 Hayet yilni naj Judá ix, istxumni naj tato ham hunu ebꞌix txꞌoj ye iswiꞌ yalni naj, yuto ayko yenhel sat ix. 16 Ishekꞌnilo isbꞌa naj hanikꞌ yul bꞌeh, ishitziko naj iskꞌatanh ix. Machi xin istxum naj tato haꞌ ix yixal iskꞌahol naj. Yalni naj tet ix:

—¿Chimhaje chinwayan takꞌatanh? xhi naj tet ix. Istaqꞌwi ix:

—¿Tzet xin chawaqꞌ wetan? xhi ix. Yalni naj:

17 —Chiwaqꞌatijan hunu noꞌ nichꞌan chiw tawet, xhi naj Judá tuꞌ. Istaqꞌwi ix:

—Kꞌultikꞌa, yajaꞌ akano hunu tzet iqꞌbꞌil hawu tuꞌ wetan. Yet chawaniti noꞌ chiw tuꞌ, kat waqꞌni meltzohojan tawet, xhi ix.

18 Isqꞌambꞌen naj:

—¿Tzet chawoche chiwakanojan tawet? xhi naj. Yalni ix:

—Akano hasello yebꞌ istxꞌanhal yebꞌ haqꞌojoch wetan, xhi ix. Yaqꞌni naj Judá hunteqꞌan tzet isqꞌan ix tuꞌ, isway naj yebꞌ ix. Ispitzkꞌati nichꞌan unin yinh ix. 19 Lahwi tuꞌ ispaxto ix Tamar yatut, yinilo ix qꞌap qꞌap ayko yenhelo sat, yanipaxiko ix xil isqꞌap, qꞌap chako ebꞌix hunix. 20 Haxa yet tzujanxa xin yanito naj Judá noꞌ nichꞌan chiw tet ix yinta naj Hira ah Adulam, yamigo naj, yunhe yaqꞌnipaxo ix issello naj yebꞌ isqꞌojoch, yajaꞌ matxa ilcha ix yu naj. 21 Isqꞌambꞌen naj Hira tuꞌ tet ebꞌnaj ay yul huneꞌ konhobꞌ tuꞌ hakaꞌ tiꞌ:

—¿Bꞌaytuꞌwal ay huneꞌ ix ix txꞌoj ye iswiꞌ ay yul konhobꞌ Enaim tiꞌ, ix ayayo istiꞌ bꞌeh? xhi naj. Istaqꞌwi ebꞌnaj:

—Bꞌey tiꞌ machi ebꞌix ix txꞌoj ye iswiꞌ, xhi ebꞌnaj. 22 Lahwi tuꞌ ispaxto naj bꞌay ay naj Judá, yalni naj hakaꞌ tiꞌ:

—Machi maꞌilcha ix wuhan, yebꞌpaxo xin tolabꞌ machi hunu ebꞌix ix txꞌoj ye iswiꞌ yul huneꞌ konhobꞌ tuꞌ, xhi naj. 23 Istaqꞌwi naj Judá:

—Yilaꞌxam ix, okojabꞌkano hunteqꞌan tuꞌ yu ix, hak tuꞌ xin machi mak txꞌoj istzotel jinh. Tanhe maxawito noꞌ tet ix yaj machi maꞌilcha ix hawu, xhi naj.

24 Oxebꞌxa ixahaw yuni huneꞌ tuꞌ, yul hal-laxo tet naj Judá hakaꞌ tiꞌ:

—Wal ix hawalibꞌ, ix Tamar, xaissay ix iswinaj, yuto ayxa tzet ye ix, xhi. Yabꞌenhe naj Judá huneꞌ tuꞌ, yalni naj yinh kaw ip:

—¡Iwelto ix istxam konhobꞌ kat henhusnito ix! xhi naj.

25 Haxa yet lanhan yilaxilti ix, ischejnito ix yal-laxo tet naj ismam yichamil ix tuꞌ hakaꞌ tiꞌ: «Haꞌ naj ay yet huneꞌ sello yebꞌ istxꞌanhal yebꞌ huneꞌ qꞌojoch tiꞌ, haꞌ naj ay yet nichꞌan unin ijbꞌiliko wuhtiꞌan. Kam ilah mak ay yet hunteqꞌan tiꞌ,» xhito ix. 26 Hayet yilni naj Judá tato yet naj hunteqꞌan tuꞌ, yalni naj: «Wal ix tiꞌ haꞌ ye yu ix, kꞌul maswatxꞌe ix, wal hinan mach inwatxꞌehan istoholal, yuto machi waqꞌ mohyojan ix yebꞌ inkꞌaholan, naj Sela,» xhi naj. Wal naj Judá tuꞌ matxa hunelo way naj yebꞌ ix.

27 Haxa yet yapni istiempohal xin, iswatxꞌi iskꞌul ix Tamar, tioxh unin yunin ix pitzkꞌahi. 28 Hayet lanhan iswatxꞌi iskꞌul ix tuꞌ yulikꞌo isqꞌabꞌ huneꞌ nichꞌan. Hayet yilni ix iyawom huneꞌ tuꞌ, iskꞌalniko ix nichꞌan txꞌal kaj yinh isnuqꞌ isqꞌabꞌ nichꞌan neneꞌ tuꞌ, yalni ix: «Haꞌ huneꞌ nichꞌan tiꞌ bꞌabꞌel,» xhi ix. 29 Ismeltzoto isqꞌabꞌ nichꞌan unin tuꞌ, haxa huneꞌxa nichꞌan haꞌ pitzkꞌa bꞌabꞌel. Yu huneꞌ tuꞌ yuxin Fares yij isbꞌi nichꞌan unin tuꞌ, yuto yal ix hakaꞌ tiꞌ: «Watxꞌebꞌilxa isbꞌeh,» xhi ix. 30 Lahwi tuꞌ ispitzkꞌa naj nichꞌan kꞌal-laxiko txꞌal txꞌal kaj yinh isnuqꞌ isqꞌabꞌ, Zara ok isbꞌiho naj.