E Iesu e hanour u 4,000 tara katuun
8
Tara pöata teka u katuun u parpara i gono poni me möana ta kannou tegi noueien,
be Iesu e ngö rena u katunun tsitsilo i tanen me poeiena,
Mak 8:1-21
2 “Alia e taatagi koru regu u katuun teka,
taraha nori i ka gono meiou lia turu topisa u lan na kannou i taren e kapa.
3 Te hala besbes pouts ragoien lia turu han i taren ba nori te tuhatupu la ranoua i maroro.
Taraha,
a palai i lama turu han i lehana koru.”
4 Bu katunun tsitsilo i tanen e ranga palise ren me poeier,
“Ime temar sabe mena roira ta kannou tara makum a palaka teka tegi hanou raira u katuun teka?”
5 Be Iesu e rangatana,
“A lahisa beret te ka memi limiou?”
Ba nori e poeier,
“A tohit.”
6 Be Iesu e ranga merena u katuun egi gum ia turu tsiktsiki.
Ba nonei e luena a tohit a beret teka me haniga uana tere Sunahan me posepose nen.
Ba nonei e hala raneien u katunun tsitsilo i tanen egi molamola raien u katuun.
7 Nori i ka has mei a matsi iena mats tetenei,
ba i murina te haniga uu e Iesu tere Sunahan ba nonei e hala raneien u katunun tsitsilo egi molamola has naien.
8 U katuun hoboto i nou me masulur.
Ba u katunun tsitsilo e goneier a man nouba me antunena a tohit a kalobaka a saputu.
9 U katuun teka i antunaia tara 4,000 a katuun.
10 Be Iesu e hala ba ranen ba nonei e osa gono meraiena u katunun tsitsilo i tanen tara tolaala ba nori e la uaier tara provins i Dalmanuta.
U Parasi i ngilin tarein tu mirakol
11 U Parasi i lama memi tanian hia raharaha gono meren.
Nori i ngilin torohaneien me rangate rien tego haröto menaien ta hatöatongo tega lama i Kolö tere Sunahan.
12 Be Iesu e sökana koru ranen me poeiena,
“Taraha ba limiou u katunura i romana te ngilin tara namiou tu mirakol tega harötein,
a nitagala tere Sunahan?
Alia e hatei hamana ragou limiou,
alia ema antunan haröto ragi limiou u katunura i romana tu mirakol.”
13 Ba nonei e laba ranen,
mena osa pouts na turu bout me la uana i hapalana a ramun a perperere.
U is turu Parasi na tere Herot
14 U katunun tsitsilo i solopalema tegi söata mena meien ta beret.
Nori i kamei a töa puku a beret turu bout.
15 Be Iesu e ranga hatagalana i taren tegima hengo menaien u hihatuts u gamo turu katuun me poeiena,
“Tarakap haniga noaiam bate hanei silemiou u is turu Parasi na e Herot.”
16 Ba nori e hiararangar me poeier,
“Nonei e ranga menei a ka teka taraha ara i möa ta beret.”
17 E Iesu e atei sil nori i rangein u is tuun me poeier,
“E hana ba limiou te hiararanga namiou te möa uana ta beret?
Alimiou ema atei halesala noa hasmi na ema atei noami na baku milimiou e tutu noalasina?
18 Alimiou e ka memiou u mata kaba limiou ema tara mi na limiou e ka memiou u talinga kaba limiou ema hengo mi,
e hana alimiou u solopala hakapaiam?
19 Pöata tu poseposeia lia a tolima beret tara 5,000 turu katuun,
a lahisa kalobaka nouba tu ongeiam limiou?”
Ba nori e ranga palise ren me poeier,
“A maloto na huol a kalobaka.”
20 Be Iesu e rangata lenina,
“Na tara pöata tu poseposeia lia a tohit a beret tara 4,000 turu katuun,
a lahisa kalobaka nouba tu ongeiam limiou?”
Ba nori e ranga palisir me poeier,
“A tohit.”
21 Ba nonei e rangata ranen,
“Ga limiou ema atei noa hasmi?”
Iesu e kato haniga poutsi a katuun a matakiou
22 Nori i tukuia i Betsaida bu katuun e la merima a töa katuun a matakiou.
Ba nori emi piou narien tere Iesu me ranga hataatagi ria tere Iesu tego sebele menaien a katuun teka.
Mak 8:22-38
23 Be Iesu e pile nena a limana a katuun a matakiou me lase nen me la halakasa ba ner a han teka.
Be Iesu e sahi nena u kinahus i matana a katuun me hatakopena a limanen i tanen me rangate nen,
“Alö e tara hasem ta ka?”
24 Ba katuun teka e tara seiena me poeiena,
“Alia e tara raiegu u katuun,
kaba nori e here rari a ruei te hula lar.”
25 Be Iesu e hatakopo lelena a limanen i matana a katuun ba nonei e tara haniga talena a mamanaka.
26 Ba nonei e hala pouts mena neien i luma i tanen me poeiena,
“Möa tu la pouts uu tara han te lakasa ruma ra.”
E Pita e ngöei e Iesu e Mesaia
27 E Iesu na u katunun tsitsilo i tanen i la uu tara han i rehina i Sisaria i Pilipai.
Pöata ti la noaien i maroro ba nonei e rangata ranen,
“U katuun e ngöeri lia esi?”
28 Ba nori e ranga palisir me poeier,
“A palair u katuun e poeier alö e Jon a Tsonun Baptais,
na palai e poeier alö e Ilaitsa,
na palai e pei haser alö a töa turu propet.”
29 Ba nonei e rangata ranen,
“Ga limiou e ngöe milia esi?”
Be Pita e ranga palise nen me poeiena,
“Alö e Mesaia.”
30 Be Iesu e ranga hatagala koru mera nen,
egima hate ii ta töa ta katuun.
E Iesu e ranga mamin a tou mate na nitöatöa i tanen
31 Be Iesu e tanian hatuts raneien tega lu menai a Pien Tson te butun Katunuma a kamits a kapan koru,
na tegima ngil menaien u tson hihatuts tara Lo na pal kapan turu pris.
Ba nonei e poeiena,
“Alia ena atung hamatie riou romana,
ba i murina u topisa u lan balia te takei pouts gou.”
32 Nonei e ranga halesala koru meraien a ka teka.
Be Pita e lu hatalisena e Iesu me tanian ranga hapiou nanen.
33 Kaba e Iesu e habirits me tara uana turu katunun tsitsilo i tanen me ranga hapiou nena e Pita me poeiena,
“O Satan,
la hatalisila.
Alö ema hakats nami a manka tere Sunahan.
Alö e hakats tuun nem a manka turu katuun tuun.”
34 Be Iesu e ngö rena u katuun na u katunun tsitsilo i tanen egi la uama i tanen.
Ba nonei e poeiena,
“Te ngilin kukute nama lia ta katuun,
nonei ega solopali a peisanen,
bate haniga nena tego sagoho menaien a kamitsina te kukute mena neien lia te markato uana a katuun te söatena a kuruse na tara tou mate i tanen,
bate la gono mena moulia.
35 Taraha,
a katuun te peits nena a nitöatöa i tanen ena hatia nouen romana.
Kaba a katuun te hatia sile nei a nitöatöa i tanen te ngil koru mena neien lia na u Bulungana u Niga,
nonei ena sabie nou a nitöatöa hamana.
36 Gaha te lue nou a katuun te ka menou a mamanaka na i puta bate hataie nou a nitöatöa i tanen?
37 U mana koru aha te antunan hala palise roui a nitöatöa i tanen?
38 E resi te matsingolo nariou lia na u Bulungana u Niga i tar turu katunura i romana te katoeier a mamanaka a omi,
a Pien Tson te butun Katunuma ena matsingolo has ranouen romana tara pöata te la gono menamen romana u angelona turu ualesala pan tere Tamar.”