Ákyak misísim
4
Á mindzindziŋŋ,
míní táa bwíni nsísim óse,
ve kyakgán misísim ngé mí ne émí Nzamá.
Amú ná éndagá minéneá bekúlu medzó mí kúlu yaá é sí ñí abwiññ.
2 É dzam dí édɔ mína yem Nsísim Nzamá:
Nsísim óse wá mem ná Yesukristo a sɔ́ yaá mot binam,
ó ne éwí Nzamá.
3 Éde,
nsísim óse wá wăá mem Yesus [á sɔ́ yaá amvála ané mot binam],
ó sés éwí Nzamá,
ve,
ó ne éwí nsíŋ Kristo,
éñí míní wók yaá ná a nzu;
éde éndagá,
a ntɔɔ́ é sí ñí.
4 Á bɔ́ŋŋ,
míní ne ébá Nzamá,
míní wún yaá fe myɔ,
amú ná éñí a ne ébe mína,
Aa ne nnén ádaŋ éñí a ne é sí ñí.
5 Bé ne ébá béye é sí ñí;
édɔ fe bá kɔ́bɔ mam méye é sí ñí,
sí da da wók fe bɔ́.
6 Éde,
bía bí ne ébá Nzamá;
é mot aa yem Nzamá éñe aa wók bía;
é mot a sés éñí Nzamá,
ăá wók bía.
Dzam te édɔ bía yem ya dɔ nsísim ó ne bébélá,
ya éwí ó ne nsísim meduk.
Nzamá a ne edziŋŋ
7 Á mindzindziŋŋ,
bí dziŋŋán bía ya bía,
amú ná edziŋŋ é ne édí Nzamá;
é mot áse aa dziŋ a ne mbyálánn Nzamá,
aa yem fe Nzamá.
8 Éñí a ne kaa ádziŋ ăá bé yem Nzamá,
amú ná Nzamá a ne edziŋŋ.
9 É dzam dí édɔ édziŋŋ Nzamá é léreban yaá ébe bía ná:
Nzamá a lóm yaá é Mwán mbɔ́ɔ́ ya mbɔ́ɔ́ weñ é sí ñí á mfá ye ná bí belé éniŋ amú ñí.
10 É dzam dí édɔ é ne édziŋŋ:
Se ná bía bía dziŋ Nzamá,
fáve ná,
éñe a ngá dziŋ bía,
éde a ngá lóm é Mwán Weñ ané metúnŋa mfá mísémm myea.
11 Á mindzindziŋŋ,
ngé Nzamá a ngá dziŋ bía amvála te,
bía bía yian fe dziŋan bía ya bía.
12 Mot enziŋ ăá bé yén Nzamá eyɔŋ enziŋ.
Ngé bía dziŋan bía ya bía,
Nzamá aa laŋan ébe bía,
édziŋŋ deñ dá é ntɔɔ́ fe ndzálánn ébe bía.
13 É dzam dí édɔ,
bía yem ná bía laŋan ébe éñe,
ñí aa tɔbɔ fe ébe bía ná:
A vé yaá bía mfá Nsísim weñ.
14 Éde bí yén yaá,
bía vé fe ngañiá ná Éséá aá lóm Mwán,
Nkoro é sí ñí.
15 É mot áse aa mem ná Yesus éñe a ne é Mwán Nzamá,
Nzamá aa laŋan ébe éñe,
ñí fe ébe Nzamá.
16 Éde,
bí yem yaá,
bí bwíni yaá fe édziŋŋ Nzamá a belé ébe bía.
Nzamá a ne edziŋŋ,
éde éñí aa laŋan edziŋŋ te été,
aa laŋan fe ébe Nzamá,
Nzamá ñí aa laŋan fe ébe éñe.
17 É dzam dí édɔ édziŋŋ dá dzálában ya dɔ ébe bía,
á mfá ye ná bí tɔbɔ ya mebúnn á mos ye á nkíkgán misaŋ,
amú ná,
amvála ané A né,
bía bí ne fe dɔ ntéññ mbɔ́ɔ́ é sí ñí.
18 Ébe edziŋŋ wɔŋŋ ó sés,
ve,
ñá edziŋŋ aa kúlu wɔŋŋ átán;
amú ná wɔŋŋ ó belé mekira,
éde é mot aa kɔ wɔŋŋ ĕé belé ñá edziŋŋ.