Ma tsili mína é bot míní mana yaá ñɔŋ mbwínánn ó ne ya eban amvála ané bía,

ébe é nzósoó é Nzamá wea ya Nkoro wea Yesukristo.

2 Mvɔmm ya mvwaá bí vémŋe ébe mína,

ébe nyemann Nzamá ya Ntí wea Yesus.

3 É nguu Deñ é vé yaá bía mam mése á mfá éniŋ ya bébélá nyébé,

ébe nyemann ye éñí a ngá lwée mína amú é dúmá ya biyágán bí mam Byeñ.

4 Amú mam méte,

a vé yaá bía mengaá má daŋ ya eban ya fe menén,

á mfá ye ná mína,

ya akála émɔ míní nzu yaá bɔ beñɔŋ ngap béye nswánn Nzamá fufúlu,

á mfá ye ná míní sáale bembéa bé mam bé ne éniŋ dzí amú bembéa mikómánn.

5 Ya amú dzam te,

wulugán ya akéŋŋ áse,

kɔglán á mbwínánn wenan esós,

esós dá nyemann,

6 nyemann wá ndzwéán nlém,

ndzwéán nlém dá álaŋan,

álaŋan dá bébélá nyébé,

7 bébélá nyébé ñá edziŋŋ bɔbéñafwáa,

edziŋŋ bɔbéñafwáa dá ñá edziŋŋ.

8 Amú ná éyɔŋ mam méte mé ne ébe mína meé fwíige fe,

mínăá ye bɔ bivovoba ngé ki kaa bibumá ébe nyemann Ntí wea Yesukristo.

9 Amú ná é mot éĕ belé mam méte ébe émyen,

a ne ndzíndzímm,

ăá yén ki oyaáp,

a vwían yaá ntunán misémm myeñ míye ómvús.

10 Ya dzam te,

á bɔbédzaŋ,

beragán daŋ bɔ akéŋŋ á mfá ye ná ékígá ya ntɔ́pbán wenan bí bɔ kaa áfógan;

amú ná míníí bɔ mam méte mínăá ye kɔp obaá amvála enziŋ.

11 Ya amú ná dzam te édɔ bá ye mína bíra vé ná míní ñíi édzwée ngɔ́mán mbéámbéá Ntí wea ya Nkoro wea Yesukristo.

12 Édɔ ná,

măá ye lík ná ma síman mína é mam má eyɔŋ ése,

afáŋbɔ ná mína yem mɔ,

míní yémbe yaá fe ébe é bébélá a ne éndagá.

13 Ve,

é ne nzósoó ná ntéññ me ngén é ñúu ñí été,

me suk mína osímánn,

14 míníí yem ná avítsaŋ tám ma yian lík é ñúu dam amvála ané Ntí wea Yesukristo a lére yaá ma dɔ;

15 éde,

ma ma ye fe daŋ ádzéŋ á mfá ye ná,

niané me ke yaá,

míní síman é mam má eyɔŋ ése.

16 Akála ná bíí ndzí mína lére é nguu ya ásɔ́ɔ́ Ntí wea Yesukristo bíí belan ya ákéŋŋ mengann meduk,

fáve ná bí tɔɔ́ béngañiá bá yén ábímm nnén Nzamá a ne.

17 Amú ná niané a ngá ñɔŋ dúmá ya ngaŋŋ ébe Nzamá Éséá,

kíŋŋ dá sɔ́ ñí á bora dúmá été,

deé dzó ná:

“Ndzindziŋŋ Mwán wɔm éwɔ wí,

éñí aa vé ma mesán á nlém.”

18 Éde bía wók kíŋŋ éñí é ngá sɔ́ á dzóp,

é tám bí mbé á nkoó ó ne eki bíabe bɔ́.

19 Éde bí mbelé nkúlánn éfíá wá daŋ ya bébélá,

éwɔ mína bɔ mvéáñ ná mína bɔ wɔ́ mewók,

amvála ané é láma aa feañ é vóm dzíbi é ne akekwíñ ané kírí da léne,

ótéteñ ya biléne bí kírí wá ó kwíñ fe mílém myenan été.

20 Táragán yem ná nkúlánn adzó enziŋ ye Mítsili ó sés éwí mot émyen aa kelan;

21 amú ná nkúlánn adzó weé ndzí sɔ́ eyɔŋ enziŋ akála nkómánn mot,

fáve ná mífúfúp mí bot Nzamá mí ngá kɔ́bɔ ya é nguu Mfúfúp Nsísim.