Békúlu medzó bábe béyágale bé ne mineá
2
Ve,
minéneá bekúlu medzó bá bé mbé énzénzaŋ áyɔŋ Israel,
ntéññ mbɔ́ɔ́ fe minéneá beyágale myá myá ye fe bɔ énzénzaŋ denan,
ébɔ́ bá ye sɔ́ ya minéneá miyébé myá tsam ásweññ,
atwaa béé kat Ndzwée a ngá kus bɔ́,
béé sɔ́ ya ntsamann weba bébyen avóó avóó.
2 Édɔ ná abwiññ bot dá ye bee nwulann tugá weba,
ya akála ébɔ́,
é nzenn é ne bébélá bá ye dɔ byana.
3 Éde,
ya amú ónzáŋŋ akúmm weba,
bá ye búán ya mína ya bifíá meduk;
mfá bot béte,
nkíkgán misaŋ weba atéé ye ókuá,
ó sés enákne,
ntsamann weba wá wĕé bóo ki óyó.
4 Amú ná ngé Nzamá eé ndzí dzɔgɔ é baángel bé ngá bɔ misémm,
ve aá wea bɔ́ ébéññ ndúán ya bekalamekéná á bidwá bí dzíbi été,
béé baale bɔ́ mfá nkíkgán misaŋ,
5 eé ndzí ki dzɔgɔ bot béye éniŋ ókuá,
éyɔŋ a ngá sɔ́ ya bora mveŋ mfá éniŋ é bot băá kɔ ñí wɔŋŋ.
Fáve,
a ngá nii Noé nkat é fwéñ é ne nzósoó,
ya bot zaŋgbéá befé.
6 Ya fe bekísoan Sodoma ye Gomora a ngá vé bɔ́ meku,
eé tsam bɔ́,
a lík bɔ́ asuúp ya asuúp,
a téle bɔ́ ané ndem á mfá é bot bé ne kaa ákɔ Nzamá wɔŋŋ.
7 Éde a ngá koro nzósoó mot Lot,
éñí a ngá dzuk amú mbéa ntɔbán é bot bá niŋ á tugá été;
8 amú ná nzósoó mot te,
kada mos eé yén ya áwók,
a tɔɔ́ énzénzaŋ deba été,
é nzósoó nlém weñ a ngá dzuk ya mitéñ akála éniŋ ntsamann métsiŋŋ deba.
9 Ve Ntí aa yem koro benzósoó bé bot mébóblé été,
é bot bá bé ne bikúkwát bá aa baale mfá ávé bɔ́ mekira á mos ye á nkíkgán misaŋ,
10 ádaŋdaŋ ébá bá wulu béé bee mikómánn mí mvin míye míson,
béé byana fe edzwée.
Bé ne aywá ya ábéle bébyen ó yóp,
băá kɔ wɔŋŋ ná bá kɔ́bɔ menguu mé dúmá abé.
11 Éde,
ñí a tɔɔ́ ná baángel ébá bá daŋ ya nguu ya biwólo,
bá băá kík bɔ́ nsaŋ ó ne abé ósú Ntí.
12 Ve bot béte bé ne ané betsít kaa kén,
bé ngá byála ya nswánn tsít mfá ábiñ ya áywíñ bɔ́,
bá kɔ́bɔ abé é mam băá yem,
éde ná bá ye wú bé dzáŋ amvála avɔ́ɔ́ avɔ́ɔ́,
13 béé dzuk ané ntáŋ ye ékúkwát deba;
bá sán éyɔŋ bá dzálá é mam bá wórán mvéáñ kada mos.
Bé ne meyeŋŋ ya metwánn,
béé sán méduk meba été,
éyɔŋ bá dzémle mefét bídzí mínabe bɔ́.
14 Bé belé mís ndzálánn ya bibwan,
băá vwat ki ya nsémm,
béé dzéŋ ná bé wún é bot bé ne ateák,
bé belé milém ndzálánn ya onzáŋŋ akúmm;
bé ne bwán béye bíboŋ.
15 Bé lík yaá éniŋ e ne tételé bé lés,
béé bee éniŋ Balaam é mwán Beor,
éñí a ngá dziŋ ntáŋ ye ékúkwát.
16 Ve,
bá vé ñí mbámm akála ntsamann métsiŋŋ weñ;
mvúmvúk edzakás wá ó ŋga kɔ́bɔ ya kíŋŋ é mot,
ó ngá sim ákút nkúlu medzó.
17 Bot béte bé ne mefɔ́m kaa mendzímm,
ya míkút okos wá tsíni,
á mfá weba édwá dzíbi dá daŋ dá yana bɔ́.
18 Amú ná bá dzéŋ ná bé wún é bot bé ndem sáale,
ébe é bot bá niŋ évuzá été,
ya nzenn ye mbéa mikómánn míye míson ébe nwulann tugá,
béé kɔ́bɔ bifíá bí elaŋ ya kaa eban.
19 Bá kyaa bɔ́ filí,
ve bébyen bá bé tɔɔ́ aloá ye mbéa eniŋ;
amú ná mot a ne oloá ébe é mot á wún yaá ñí.
20 Amú niané bá mana sáale mam mé mvin méye éniŋ akála nyemann bá yem Ntí ya Nkoro wea Yesukristo,
véa bé bera mana ke tsinibe mam méte été,
bé wúnban yaá,
éniŋ dzeba dá ye súgan áŋgónó álot édí ósúá.
21 Amú é ngá daŋ bɔ́ ya mvéáñ ná bé bɔ kaa áyem nzenn e ne é nzósoó,
ye ná,
niané bá yem yaá dɔ,
véa bé dzɔgɔ ná bá bee mfúfúp mvéná bé ngá kee bɔ́.
22 É dzam bébélá nkaná aa dzó é kwíñ yaá ébe bɔ́ ná,
“Mvú da búlán béndólo béñ émyen.
É ngéá ngwiññ a ne nsopbán ñí aa bera ke ábíŋán á ntɔ́p été.”