Ásɔ́ɔ́ beáñ Ntí
3
Á míndzindziŋŋ myám,
é kálara beáñ,
éñe má tsili mína ñí éndagá,
á bé beáñ béte,
ya melépgá ma bɔ mína ná míní tém tételé,
2 á mfá ye ná míní síman bífíá mitɔ́pbán bekúlu medzó bé ngá tára kɔ́bɔ,
ya fe é mvéná Ntí ya Nkoro wea,
éñí é baapostol benan bé ngá kat mína.
3 Táragán yem é dzam dí,
ná melú méye ásúgánn bekpógo bot bá ye sɔ́ ya kpógo,
béé wulu á mbéa mikómánn myeba été.
4 Béé síli fe ná:
“É ngaá ásɔ́ɔ́ deñ e ne ó vé?”
Amú ná atéé ye betará bé ngá ke óyó [áwú] ya fe atéé ye eniŋ é ngá téñban,
dzam áse é ngén amvála avɔ́ɔ́ ya avɔ́ɔ́.
5 Amú ná bá vwían ya nkómánn weba ná dzóp é mbé atéé ye ókuá,
ya fe ná sí e ngá sɔ́ méndzímm ya énzénzaŋ mendzímm,
akála efíá Nzamá,
6 ya efíá te fe,
éniŋ é mbé tám te,
é ngá ñíŋ ya mendzímm é mana dzáŋ.
7 Ve,
é dzóp ya sí bí ne éyɔŋ dí,
bí ne mbaalann amú efíá evɔ́ɔ́ ya evɔ́ɔ́,
mfá é ndúán e ne ntélán á mos nkíkgán misaŋ ya ntsamann é bot băá kɔ Nzamá wɔŋŋ.
8 Ve,
á mindzindziŋŋ myám,
míní táa vwían édí ná,
mfá Ntí mos mbɔ́ɔ́ ó ne ané enzuk mibú,
enzuk mibú dá ané mos mbɔ́ɔ́.
9 Ntí ăá bem ná a dzálá é ngaá deñ,
amvála ané bot benziŋ bé tém yaá ná aa bem,
fáve ná a ne edzíp ya mína,
éñe kaa ákómo ná mot enziŋ á dzáŋ,
fáve ná bésesé bé nzu dzoban.
10 Ve,
é mos Ntí wá ye sɔ́ amvála ané ndzídzíp,
mos te,
dzóp dá ye mana ya mora eduŋŋ,
ané byém byá ye ñem ya bora ayóŋ,
éde sí ya míbɔann mí ne été,
byá ye dzík.
11 Éde,
é tɔɔ́ ná byém bíte bíse byá ye tsaman amvála te,
nzá amvála bot mína yian bɔ,
á ntɔbán eki,
ya bébélá nyébé été,
12 míníí yana ya ovep á nlém mfá ásɔ́ɔ́ é mos Nzamá,
akála mos te dzóp dá ye tɔbɔ ntsamann ya ndúán,
ané é byém byá byá dzík byá ye ñem!
13 Ve,
amvála ané é ngaá deñ e né,
bía yana mfefeñ dzóp ya mfefeñ sí,
mévóm nzósoó a tɔɔ́.
14 Édɔ ná,
á mindzindziŋŋ myám,
míníí yana mam méte,
bɔgán akéŋŋ ná á koan ya mína á mvwaá été,
kaa meyeŋŋ kaa ki ya bidzo.
15 Éde símaŋán édzíp Ntí wea édɔ é ne akoroga,
amvála ané ndzindziŋŋ mwadzaŋ wea Pablo ñí a ngá tsili fe mína,
ya amvála fak bé vé yaá ñí,
16 amvála te fe békálara béñ bése,
eé kɔ́bɔ é mam má été,
ébe ébɔ́ mam menziŋ mé ne ayéñ ye áwók,
émɔ bedzími mam ya é bot bé ne ateák bá lés,
ané bá viri fe Mítsili mivɔ́ɔ́ mfá ntsamann weba bébyen.