Mbwínánn wá wún
5
Éñí áse aa bwíni ná Yesus éñe a ne Kristo,
a byála yaá ébe Nzamá.
Éde éñí áse ñí aa dziŋ Éséá,
aa dziŋ fe éñí a ne mbyálánn ébe Éséá.
2 É dzam dí,
édɔ bía yem ná bía dziŋ é bwán Nzamá;
eyɔŋ bía dziŋ Nzamá ye ádzálá mémvéná Meñ.
3 Amú ná édziŋŋ Nzamá édɔ dí,
ná bí baale mémvéná Meñ.
Mémvéná Meñ má mé sés ki adziít.
4 Amú ná édí áse é ne mbyálánn ébe Nzamá dá wún é sí ñí;
ndaŋán wí éwɔ wá wún é sí ñí,
mbwínánn wea.
5 Éde nzá aa wún é sí ñí?
Fáve é mot aa bwíni ná Yesus éñe a ne é Mwán Nzamá.
6 Yesus te,
éñí a ngá sɔ́ á méndzímm ya mekií se fáve á méndzímm etámm,
fáve ná méndzímm ya mekií.
Éde Nsísim éwɔ wá vé ngañiá,
amú ná Nsísim éwɔ ó ne bébélá.
7 Amú ná bé léa ébɔ́ bá vé ngañiá á dzóp été:
[Éséá,
Efíá,
ya Mfúfúp Nsísim.
Bé léa béte bé ne mot mbɔ́ɔ́.
8 Bé léa ébɔ́ fe,
bá bá vé ngañiá á sí:]
Nsísim,
mendzímm,
ya mekií,
bé léa béte bá kwíñ fe kíŋŋ fɔ́ɔ́.
9 Ngé bía yébe é ngañiá bot,
éñí Nzamá aa daŋ áaweba;
amú é ngañiá Nzamá éñe ñí ná,
a vé yaá ngañiá mfá é Mwán weñ.
10 É mot aa bwíni é Mwán Nzamá,
a belé ngañiá ébe émyen;
éñí ñí a ne kaa ábwíni Nzamá,
a bɔ yaá Nzamá nnéneá,
amú ná eé ndzí bwíni é ngañiá Nzamá a vé yaá mfá é Mwán Weñ.
11 Ngañiá éñe ñí:
Nzamá a vé yaá bía éniŋ é ne mbéámbéá,
eniŋ te dá é ne ébe é Mwán Weñ.
12 É mot a belé Mwán,
a belé eniŋ;
éñí ñí ĕé belé Mwán Nzamá,
ĕé belé eniŋ.
Áyem eniŋ é ne mbéámbéá
13 Me tsili yaá mína é mam má mína é bot mína bwíni éyola é Mwán Nzamá,
á mfá ye ná míní yem ná míní belé éniŋ é ne mbéámbéá.
[Ya fe ná míní tsíni ná mína bwíni éyola é Mwán Nzamá].
14 Éde,
mébúnn má émɔ bí belé ébe éñe,
ná ngé bí dzaa dzam enziŋ amvála ané nkómánn Weñ ó ne,
Aa wók bía.
15 Éde,
ngé bía yem ná aa wók bía ébe é dzam áse bía dzaa,
bía yem ná bí mbelé é mam bía dzaa ñí.
16 Ngé mot enziŋ aa yén mwanñaŋ aa bɔ nsémm,
éwí ó sés éwɔ ye áwú,
mot te aa ye dzaa,
éde aa ye ñí vé eniŋ,
édí é ne ébá bá bɔ nsémm,
éwí ó sés éwɔ ye áwú.
Nsémm ye áwú ó ne,
ve măá dzó ná bé dzaa amú nsémm te.
17 Ekúkwát áse é ne nsémm;
nsémm ó ne ná ó sés éwí ye áwú,
wá ó ne fe.
18 Bía yem ná é mot áse a byála yaá ébe Nzamá ăá bɔ nsémm;
amú éñí a byála yaá ébe Nzamá aa baale ñí,
abé dá dăá nama ki ñí.
19 Bía yem ná bí ne ébá Nzamá,
eniŋ ngúrá dá é ne ábé été.
20 Ve,
bía yem fe ná é Mwán Nzamá a sɔ́ yaá,
a vé yaá fe bía nyemann,
á mfá ye ná bí yem éñí a ne bébélá.
Édɔ ná bí ne ébe éñí a ne bébélá,
é Mwán Weñ Yesukristo.
Éñe a ne ñá Nzamá ya éniŋ é ne mbéámbéá.
21 Á bɔ́ŋŋ,
tɔbɔgán nkánán ya biyemá.