3
Dággán,
nzá amvála mbamba edziŋŋ Tará a vé yaá bía,
ná bé lwée bía ná é bwán Nzamá;
[ébɔ́ fe bí né].
Akála te édɔ,
bot béye éniŋ dzí,
băá yem bía,
amú ná béé ndzí ki ñí yem.
2 Á mindzindziŋŋ,
éndagá bí ntɔɔ́ é bwán Nzamá,
ya fe ná é dzóm bía ye bɔ,
dá dăá bé ki léreban.
Ve bía yem ná éyɔŋ aa ye léreban,
bía ye fonan ya ñí,
amú ná bía ye ñí yén amvála ané A Né.
3 Éde é mot áse a belé oyan te ébe éñe,
aa tun émyen,
amvála ané Émyen ñí a ne fe Nkeññ.
4 É mot áse aa bɔ á nsémm,
aa tsam fe metsiŋŋ,
amú ná nsémm ó ne ntsamann metsiŋŋ.
5 Éde mína yem ná,
éñí a ngá váma ná ánzu vea misémm,
éde nsémm ó sés ébe éñe.
6 Éñí áse a tɔɔ́ ébe éñe ăá bɔ nsémm,
éde é mot áse aa bɔ nsémm ăá bé ñí yén,
ngé ki áyem Ñí.
7 Á bɔ́ŋŋ,
míní táa lík ná mot enziŋ aa lés ya mína.
É mot aa bɔ nzósoó,
éñe a ne nzósoó,
amvála ané Émyen ñí a ne fe nzósoó.
8 É mot aa bɔ nsémm,
éñe aa sɔ́ ébe déble,
amú ná déble,
atéé ye átáraga aa bɔ nsémm.
Ya dzam te édɔ é Mwán Nzamá a ngá váma ya dɔ ná átsam míbɔann déble.
9 É mot áse a byála yaá ébe Nzamá,
ăá bɔ nsémm,
amú ná é mvɔŋ dzeñ dá laŋan ébe éñe.
Édɔ ná a sés bɔ nsémm,
amú a byála yaá ébe Nzamá.
10 Amvála te édɔ é bwán Nzamá ya é bwán déble bá léreban:
é mot áse a ne kaa ábɔ nzósoó a sés éñí Nzamá,
ntéññ mbɔ́ɔ́ fe éñí a ne kaa ádziŋ mwanñaŋ.
Bí dziŋŋán mbɔ́ɔ́ ya éñí mbɔ́ɔ́
11 Amú ná é fwéñ ñí édɔ míní ngá wók atéé ye átáraga,
ná bí dziŋŋán bevɔ́ɔ́ ya ébá bevɔ́ɔ́.
12 Se ané Kaín,
éñí a mbé é mot déble,
ané a ngá ywíñ mwanñaŋ weñ.
Ya etɔm dzé a ngá ywíñ ñí?
Amú ná míbɔann myeñ mí mbé abé,
émí mwanñaŋ myá nzósoó.
13 Á bɔbédzaŋ,
míní táa yágán,
ngé eniŋ dá víni mína.
14 Bía yem ná bí kólo yaá áwú,
bí ntɔɔ́ éniŋ,
amú ná bía dziŋ bɔbédzaŋ.
É mot a ne kaa ádziŋ,
a ngén áwú été.
15 É mot áse aa víni mwanñaŋ,
a ne nywíññ bot,
éde mína yem ná nywíññ bot enziŋ ĕé belé éniŋ é ne mbéámbéá ébe éñe.
16 Ya é dzam dí édɔ bí yem yaá ya dɔ,
é dzóm é ne ya edziŋŋ,
ná Yesus a ngá vé éniŋ dzeñ ákála dea,
éde bía bía yian fe vé bíniŋ bía ákála bɔbédzaŋ.
17 Ve,
ngé é mot a belé akúmm ye é sí ñí,
aa yén mwanñaŋ aa yi dzóm,
éñe kaa ñí ávé;
nzá ámvála édziŋŋ Nzamá é ne tɔbɔ ébe éñe?
18 Á bɔ́ŋŋ,
edziŋŋ dea é táa bɔ fáve édí ye ánu,
ve édí ye míbɔann ya fe bébélá.
19 Ya é dzam dí édɔ bía ye yem ya dɔ ná bí ne bot béye á bébélá.
Mílém myea myá ye bɔ nguu ébe ású deñ.
20 Éde,
ngé nlém wea wá vé bía meku,
Nzamá aa daŋ nlém wea,
éñe fe aa yem mam mése.
21 Á mindzindziŋŋ,
ngé nlém wea wăá vé bía meku,
bí ntɔɔ́ ya mebúnn ósú Nzamá;
22 ané é dzam áse bía dzaa ñí,
bía ye dɔ ñɔŋ,
amú ná bía baale Mémvéná Meñ,
ya ábɔ é mam má vé ñí mesán á nlém ébe ású Deñ.
23 Éde,
é Mvéná Déñ édɔ ñí ná,
bí bwíni éyola é Mwán Weñ Yesukristo,
ya fe ná bí dziŋŋán bevɔ́ɔ́ ya ébá bevɔ́ɔ́ amvála ané a ngá vé bía mvéná.
24 Éde,
é mot aa baale Mémvéná Meñ,
aa laŋan eyɔŋ ése ébe éñe,
Nzamá ñí fe ébe éñe.
Édí édɔ bía yem ya dɔ ná,
Nzamá a laŋan ébe bía,
e ne Nsísim,
Éwí a vé yaá bía.