Bí belé nkam ébe Tará
2
É bɔ́ŋŋ bam,
ma tsili mína é mam má á mfá ye ná míní nzá bɔ nsémm.
Éde ngé mot enziŋ aa bɔ nsémm,
bí belé ntébe nzaŋŋ ébe Tará,
Yesukristo nzósoó mot.
2 Émyen éñe a ne metúnŋa akála mísémm myea,
se ébe bía etámm,
ve ya fe émí eniŋ ngúrá.
Bía yem ñí ngé bía baale mémvéná
3 Éde é dzam dí édɔ bía yem ya dɔ ná bí yem yaá ñí ngé bía baale mémvéná Meñ.
4 Éñí aa dzó ná:
“Me yem yaá ñí,”
ve ñí a kaa ábaale mémvéná Meñ,
a ne mbɔ mineá;
bébélá ñí a sés ki ébe éñe.
5 Ve é mot aa baale éfíá Déñ,
bébélá,
édziŋŋ Nzamá é dzálában yaá ébe mot te.
Amvála te édɔ bía yem ya dɔ ná bí ne ébe éñe.
6 Éñí aa dzó ná ma laŋan ébe éñe,
émyen aa yian niŋ amvála ané Yesus a ngá niŋ.
7 Á míndzindziŋŋ myám,
măá tsili mína mfefeñ mvéná.
Ve ma tsili mína nnomm mvéná,
éñí míní belé yaá atéé ye átáraga;
nnomm mvéná te ó ne éfíá míní ngá wók.
8 Mfá mbɔ́ɔ́,
ma tsili mína mfefeñ mvéná ó ne bébélá ébe Yesus ya ébe mína,
amú ná dzíbi dá ke dá síbi,
ñá éyéá ñí á ŋga feañ yaá fe.
9 É mot aa dzó ná a tɔɔ́ éyéá été,
ve ñí eé víni mwanñaŋ,
a ne á dzíbi été anzukwíñ áwola dí.
10 Éñí aa dziŋ mwanñaŋ aa laŋan fe éyéá été,
ekɔp obaá é sés ébe éñe.
11 Ve éñí aa víni mwanñaŋ a ne ó dzíbi été,
aa wulu fe ó dzíbi ósí,
ăá yem ki é vóm aa ke,
amú ná dzíbi é mana yaá ñí dzip mís.
Ñá Mbwínánn
12 Á bɔ́ŋŋ,
ma tsili mína,
amú ná mísémm myenan mí ntɔɔ́ ndzámann
akála éyola Déñ.
13 Á beéséá,
ma tsili mína,
amú ná míní yem yaá éñí a ne atéé ye átáraga.
Á bendómán,
ma tsili mína,
amú ná míní wún yaá abé [Sátan]
Á bɔ́ŋŋ,
ma tsili mína,
amú ná míní yem yaá Nzamá Éséá.
14 Á beéséá,
maá tsili mína,
amú ná míní yem yaá éñí a ne atéé ye átáraga.
Á bendómán,
maá tsili mína,
amú ná míní ne nguu,
éfíá Tará dá laŋan fe ébe mína,
míní wún yaá abé.
15 Kaa dziŋŋán é sí ñí ngé ki é mam méye é sí ñí.
Ngé mot aa dziŋ é sí ñí,
édziŋŋ Tará é sés ébe éñe.
16 Amú ná é dzam áse é ne é sí ñí;
mbéa nkómánn ye á mison,
nkómánn ye ó mís,
ya engúŋ ye éniŋ,
măá sɔ́ ébe Tará,
fáve émá méye éniŋ.
17 Ve,
sí da lot ya mbéa míkómánn myeñ,
ve é mot áse aa dzálá nkómánn Nzamá aa laŋan mbéámbéá.
Nsíŋ Kristo
18 Á bwán,
á ntɔɔ́ áwola dá súgan,
amvála ané míní ngá wók ná,
nsíŋ Kristo,
aa nzu.
Afáŋbɔ ná abwiññ bésíŋ Kristo bé sɔ́ yaá;
ya dzam te édɔ bía yem ya dɔ ná áwola dá súgan é ntɔɔ́.
19 Bá kólo ébe bía,
ve bĕé mbé éebea.
Amú ná ngé bé bɔ éebea,
ngé bá laŋan bíabe bɔ́.
Ve bé ngá kólo mfá álére ná se bot bése ébɔ́ bé ne éebea.
20 Ve éñí a ne Eki,
Éñí a téle yaá mína,
mína bésesé mína mína yem fe dɔ.
21 Meé ndzí mína tsili ané ngé mínăá yem bébélá,
ve amú ná mína yem ñí,
ya fe ná mineá mí enziŋ myăá sɔ́ ébe bébélá.
22 Nzá a ne mbɔ mineá?
Fáve é mot ăá yébe ná Yesus éñe a ne Kristo.
Mot te a ne nsíŋ Kristo,
mot te aa kat fá Éséá bá Mwán.
23 É mot áse aa kat Mwán ĕé belé ki Éséá.
É mot áse ñí aa mem Mwán a belé fe Éséá.
24 Édí míní ngá wók atéé ye átáraga,
édɔ é tɔbɔgé ébe mína.
Ngé édí míní ngá wók atéé ye átáraga é tɔbɔ ébe mína,
mína mína ye fe tɔbɔ ébe Mwán ya ébe Éséá.
25 Éde,
é ngaá a ngá vé bía édɔ ñí;
éniŋ é ne mbéámbéá.
26 Má tsili mína é mam má mfá é bot bá duk mína.
27 Éde,
ntélán a ngá téle mína,
ó tɔbɔgé ébe mína,
éde mínăá yi fe ná mot enziŋ aa yága mína.
Ve,
amvála ané Nsísim weñ wá yága mína mfá mam mése,
ya fe ná ó sés ki mineá,
fáve ná ó ne bébélá;
ámvála a yága yaá mína,
néa tɔbɔgán ébe éñe.
28 Éndagá,
á bɔ́ŋŋ,
tɔbɔgán ébe éñe,
á mfá ye ná éyɔŋ aa ye váma,
bí bɔ kaa áwú osoán ébe ású Deñ.
Fáve ná bí tɔbɔ ya mebúnn mílém,
á ásɔ́ɔ́ Weñ.
29 Ngé mína yem ná a ne nzósoó;
yemŋán fe ná é mot áse aa bɔ nzósoó,
a byála yaá ébe éñe.