4
Éde,
amvála ané Kristo a dzuk yaá á nson,
mína belégán fe amvála osímánn te ovɔ́ɔ́,
amú ná é mot a dzuk yaá á nson été,
a mana yaá ya nsémm,
2 mfá ábɔ kaa ániŋ míkómánn míye á nson été,
é tám é lígi yaá wa é sí ñí,
fáve ná ániŋ a nkómánn Nzamá été.
3 Amú ná é tám e ngá lot é yian yaá mfá ábɔ míkómánn bot béye meyɔŋ mefé,
éñí míní ngá wulu á tugá été,
bivéé,
mbéa miñamle,
áfían meywa,
mbéa mefét bá yénán befám ya biningá,
ya mbéa nkaŋann biyemá.
4 Ébe dzam te éñe bá yágán ná mínăá wulu fe mínabe bɔ́ á mbéa eniŋ tugá été,
éde bá kɔ́bɔ mína abé;
5 bot béte bá ye ke yalan ya ébe éñí a ntɔɔ́ nkomann ná aa kík miwúán ya betétéá misaŋ.
6 Amú ná akála te,
bé ngá kat atwaa miwúán mbamba fwéñ,
á mfá ye ná ngé bá kík bɔ́ misaŋ amvála ané bot á nson été,
ve bé niŋ á nsísim été amvála ané Nzamá.
Ábelan ya é bot bevɔ́ɔ́
7 Éndagá,
asúgánn ye mam mése é ntɔɔ́ bebeñ.
Édɔ ná tɔbɔgán ya kén,
baalán fe osímánn mvwaá mfá meyaglán.
8 Ádaŋdaŋ ná mína bébyen míníí belé édziŋŋ bɔbéñafwáa énzénzaŋ denan été,
amú ná edziŋŋ dá búru abwiññ misémm.
9 Ñɔŋŋán bevɔ́ɔ́ ya ébá bevɔ́ɔ́ méndá menan kaa miswa.
10 Éde,
ámvála kada mot a ñɔŋ yaá é mvɔmm Nzamá,
á belagán ya wɔ́ eé séan ya ébá bevɔ́ɔ́ ané mbamba bébaale béye abwiññ é mvɔmm Nzamá.
11 Ngé mot enziŋ aa kat fwéñ Nzamá,
á bɔɔ́ge dɔ ané fwéñ Nzamá é né.
Éñí aa belan bot á bɔɔ́ge dɔ amvála ané é nguu Nzamá a ngá vé ñí;
á mfá ye ná ébe mam mése Nzamá á ñɔŋ dúmá amú Yesukristo,
éñí a ne ya dúmá,
ya édzwée,
mbéámbéá ya mbéámbéá.
Amén.
Ásán mídzuúk été
12 Á míndzindziŋŋ myám,
míní táa yágán é ndúán mébóblé dá nzu énzénzaŋ denan été,
amvála ané eyágán dzam é bɔban yaá mína.
13 Ve,
é tɔɔ́ ná mína ñɔŋ fufúlu mídzuúk Kristo,
sánŋán,
á mfá ye ná éyɔŋ é dúmá Déñ dá ye léreban mína míní sán fe ya abwiññ mesán.
14 Ngé bá kpógo mína amú éyola Kristo,
abwará ya mína,
amú ná nsísim ye á dúmá,
éwí Nzamá,
ó nzu yaá tɔbɔ ébe mína.
[Ná á mfá weba a ne mbyanann,
ve dea á mfá wenan a ne ya dúmá.]
15 Amú ná mot enziŋ ye ébe mína ăá yian yén midzuúk amvála ané nywíñbot,
ngé ki ndzídzíp,
ngé ki mbɔ abé,
ngé ki ané é mot aa duman éyá medzó.
16 Ve,
ngé aa yén midzuúk amvála ané Krísten,
a táa wú osoán,
fáve ná á vá Nzamá dúmá amú dzam te.
17 Amú ná á kwíñ yaá é tám bá tára nkíkgán misaŋ é ndá Nzamá;
éde ngé dá tára ébe bía,
ásúgánn é bot bá bé ngá bɔ é mbamba fwéñ Nzamá melɔ́ dá ye bɔ á yá?
18 Éde,
ngé é mot a ne nzósoó aa koroban ya ndzuúk,
é mot a ne kaa ákɔ Nzamá wɔŋŋ,
ya é mot a ne mbɔ misémm,
bá bá ye tébe ó vé?
19 Édɔ ná é bot bá yén midzuúk amvála ané nkómánn Nzamá ó ne,
bé keegé bíniŋ byeba béé bɔ mvéáñ ébe Ntéñ byém a ne éñí bá tɔbɔ ya ñí mebúnn.