Adzó mélúk
3
Amvála te fe,
biningá,
kpáán beñu béyóm ásí,
á mfá ye ná atwaa ngé bevɔ́ɔ́ benziŋ bá bɔ efíá melɔ́,
bé ne wúnban kaa efíá ya amvála beyéá bá niŋ,
2 béé yén ané mína niŋ ya wɔŋŋ ya ngaŋŋ.
3 É ñaŋŋá denan dá e táa ki bɔ átán;
ndzilann miló ya mbwátán byém bí koŋ,
ngé ki bítóp bí ne táŋ ndén,
4 fáve ná ñaŋŋá ye á nlém mot été,
éñí e ne kaa ábweñ,
éñí ye nsísim ó bóo ósí ó dzaga fe,
édɔ dá daŋ ya eban ósú Nzamá.
5 Amú ná néa,
tám fé,
mífúfúp mí biningá mí mbé fe mí belé mebúnn ébe Nzamá,
myá mi ngá bɔ fe ñaŋŋá,
béé ku beyóm ásí.
6 Amvála te,
Sara a ngá bɔ Abraam mewók,
eé lwée ñí ná Ntí;
ébe éñe míní nzu yaá bɔ é bengwan béñ,
ngé mína bɔ mvéáñ,
kaa ákɔ dzam enziŋ wɔŋŋ.
7 Amvála te fe mína beyóm tɔbɔgán beñu beyéá á nyemann été,
amú ná miningá a ne é mot aa daŋ ya ateák,
míníí vé bɔ́ ngaŋŋ ané beñɔŋ tsígá béye mvɔmm ye éniŋ,
á mfá ye ná meyaglán menan mé bɔ kaa átɔbɔ ndzipbán.
É mam bebwíni bése bá yian bɔ
8 Éde mfá ámana,
mína bésesé belégán amvála nwóránn avɔ́ɔ́,
áyén bot engóngɔ́ɔ́,
ya edziŋŋ bɔbéñafwáa,
ya añep,
nsilibán ósí,
9 kaa ábúlu abé ya abé,
ngé ki biboŋ ya biboŋ.
Fáve ná míníí vé abwará,
amú ná míní ngá lwéeban á mfá ánzu ñɔŋ abwará.
10 Amú ná,
“É mot aa kómo dziŋ eniŋ ya áyén mbamba melú,
á biñŋe é dém deñ mfá abé,
ya bíyéá byeñ ná a nzá kɔ́bɔ meduk;
11 á kólogé ábé été,
á bɔ mvéáñ,
á dzéŋŋe mvwaá,
a béé dɔ.
12 Amú ná é mís Ntí má dága benzósoó bé bot,
melɔ́ meñ má má béá ndzaá weba,
ve ású Ntí é ne é bot bá bɔ abé á ngamm áyát.”
13 Éde nzá aa ye mína dzugu,
ngé mína bíra dzéŋ é dzam é ne mvéáñ?
14 Ve ngé mína yén midzuúk akála édí é ne tételé,
bibwárán ya mína.
Ve míní táa bɔ́ kɔ wɔŋŋ,
ngé ki áfógan,
15 éde ná,
Kristo Ntí,
télegán ñí eki mílém myenan été,
tɔbɔgán fe nkomann eyɔŋ ése mfá áyalan ya é mot áse a dzaa mína ákéá á mfá óyan wenan.
Ve bɔgán dɔ ya evwévwé nlém ya fe wɔŋŋ,
16 míní belé mbamba ósímánn ye á nlém,
á mfá ye ná é bot bá kɔ́bɔ é mbamba ntɔbán wenan ébe Kristo abé,
bé wú osoán.
17 Amú dá daŋ ya mvéáñ ná o yén midzuúk akála ábɔ mvéáñ,
ngé é ne nkómánn Nzamá,
ye ná o yén midzuúk akála ábɔ abé.
18 Amú ná Kristo,
nzósoó mot,
a ngá dzuk eyɔŋ evɔ́ɔ́
akála misémm bikúkwát bí bot,
á mfá ye ná a ne ke ya mína ébe Nzamá,
a tɔɔ́ nwúán míson,
ve ntétéá á nsísim été.
19 Éwɔ fe o ngá ke kat fwéñ mísísim mí mbé á mbok.
20 Émí mí ngá bɔ melɔ́,
é tám ó mvús,
édzíp Nzamá deé yana mélú Noé a ngá lóŋ árka,
éñí avítsaŋ bot,
dá yíli ná bot mmom,
bé ngá tɔbɔ nkoránn ya mendzímm.