SANTIAGO
É Kálara Santiago
1
Santiago óloá Nzamá ya éwí Ntí Yesukristo;
ébe méyɔŋ awóm ya mé beáñ,
émá mé ne áyóp ya áyóp:
Mibóló.
Mbwínánn ó ne kaa meyep
2 É bɔbédzaŋ bam,
éyɔŋ míní ku yaá míkat été memvála ya memvála,
ñɔŋŋán mɔ ya abwiññ mesán,
3 míníí yem ná nkyabán míkat ye á mbwínánn wenan,
wá sɔ́ ya etɔɔ́ mbán.
4 Édɔ ná,
etɔɔ́ mbán dá é dzálágé éséññ deñ,
á mfá ye ná míní tɔbɔ ñá mot ya ndzálánn,
dzóm enziŋ dá kaa mína ádzéŋ.
5 Ve ngé kén da dzéŋban ébe mot enziŋ ye ébe mína,
á dzaagé dɔ Nzamá,
éñe aa vé mot áse ya añep kaa ki ná aa lére bivuzá,
véa bá ye fe ñí dɔ vé.
6 Ve á dzaagé ya mbwínánn kaa áyep,
amú ná é mot aa yep a ne amvála ané nkebá máŋ,
éwɔ evúŋ wa dulu weé ke ya wɔ áká ya áká.
7 Amú ná é mot a ne néa,
a táa tém ná aa ye ñɔŋ dzóm enziŋ ébe Ntí;
8 ñí a tɔɔ́ é mot á ne ya milém mí beáñ,
ñí ăá yíli ki dzam ye é mam mése aa tára.
9 Édɔ ná,
mwadzaŋ ébe nsilann ñúu weñ ósí,
á vággé éyɔŋ a ntɔɔ́ ededea mbélánn ó yóp,
10 ya fe nkúkúmm ébe nsilann ñúu weñ ósí,
akála ná akúmm dá ye mana amvála ané samm ye élwá.
11 Amú ná nlódzóp wá kwíñ ya ayóŋ dá dzígan,
éde elwá é kót,
é samm deñ dá é kpéñ,
é dzímle fe é mbamba éfonann deñ.
Amvála te fe nkúkúmm wá wá ye dzáŋ ébe é mam meñ mése.
Mikat ya mebóblé
12 Abwará ya é mot aa nzomo mebóblé,
amú ná niané a mana yaá kyaba mikat aa ye ñɔŋ korona ye éniŋ,
éñí Ntí a kyaa yaá é bot bá dziŋ ñí.
13 Mot enziŋ ye áyén mebóblé a táa dzó ná,
“Nzamá éñí aa bóble ma”;
amú ná Nzamá á sés tɔbɔ mebóblé ya abé,
émyen ñí ăá bóble ki mot enziŋ.
14 Ve fáve ná,
kada mot aa yén mebóblé éyɔŋ évéé deñ émyen dá dulu ñí,
é dzéŋ fe ná é wún ñí.
15 Véa,
éyɔŋ evéé dá ñɔŋ abum,
dá é byéñ nsémm;
niané nsémm wá ó ntɔɔ́ ewólo,
wá wá byéñ awú.
16 Á mindzindziŋŋ mí bɔbédzaŋ myam,
bé táa mína duk.
17 Mbamba mvéán óse,
ya ñá dás áse,
byá sigi bíí sɔ́ ó yóp ébe Tará ye á biyéá,
ya ébe éñí nzelann dzam enziŋ e sés,
ngé ki ávwéñ dá tsén.
18 Ébe nkómánn weñ,
aá byéñ bía ákála éfíá é ne bébélá,
á mfá ye ná bí bɔ é ngap ósúá ye é byém bí ne mvelann.
Bedzálá efíá
19 Á mindzindziŋŋ mí bɔbédzaŋ myam,
yemŋán é dzam dí ná,
mot áse á bɔɔ́ge avóó á mfá áwók,
ve otaktak á mfá ákɔ́bɔ,
ya otaktak á mfá méyéá
20 amú ná méyéá mot binam măá sɔ́ ya é nzósoó Nzamá.
21 Ákála dzam te,
míníí vea mvin ése ya ékúkwát é lígi yaá,
éde ya evwévwé nlém ñɔŋŋán éfíá é tɔbɔ yaá mbeñann ébe mína,
édí é ne koro bíniŋ byenan.
22 Ve bɔgán ébá bá dzálá efíá,
se fáve ébá bá wók,
béé duk fe mína bébyen.
23 Amú ná ngé mot enziŋ a ne fáve nwók efíá,
ve kaa dɔ ádzálá,
mot te aa fonan ya éñí aa dága ású déñ a ngá byála ya dɔ á ngɔɔ́p été,
24 amú niané a mana yaá dága ású deñ émyen,
a kéñ fe,
etéññ te ébyen a vwían amvála mot á tɔɔ́.
25 Ve éñe ñí aa dága ñá atsiŋŋ ya nkée,
éñí ye étɔɔ́ filí,
a tɔbɔ fe mbán été,
kaa súgu fáve nwók aa vwían;
ve éñí aa dzálá eséññ.
Mot te aa ye bɔ ya abwará ébe édí aa bɔ.