BEEBREO
É kálara Beebreo
Nzamá a kɔ́bɔ yaá ébe nzenn ye é Mwán weñ
1
Nzamá aá kɔ́bɔ ya betará ókuá abwiññ biyɔŋ,
ya abwiññ memvála ébe bekúlu medzó,
2 mélú má súgan má,
a kɔ́bɔ yaá ya bía ébe é Mwán weñ,
éñe a ngá téle ñɔŋ tsígá ye byém bíse,
ébe éñe fe a ngá vele ya ñí dzóp ya eniŋ ngúrá.
3 Éñe a ne mikwikwiñ míye é dúmá deñ,
nswánn ye é ñúu deñ émyen ná tsás.
Éñe fe aa baale byém bíse ya efíá ye é nguu deñ.
Niané a ngá mana tun misémm,
éde a ngá tɔbɔ ósí á yóp été á mfá meyóm étɔɔ́ édzwée Nzamá;
4 Éñe a súgan yaá daŋ ábɔ nnén álot baángel,
dá é tɔɔ́ ná éñe a ñɔŋ yaá tsígá éyola dá daŋ ya ngaŋŋ álot ébɔ́.
Mwán aa lot baángel
5 Amú ná,
á ángel mbé ye baángel Nzamá a ngá dzó eyɔŋ enziŋ ná:
“Wa o ne é Mwán wɔm,
me byéñ yaá wa émuú;”
Aa bera dzó ná:
“Ma ye bɔ Éséá á mfá weñ,
Ñí aa ye fe bɔ Mwán á mfá wɔm?”
6 Éde aa bera fe kɔ́bɔ,
éyɔŋ aa nzu ya ntóó mwán weñ éniŋ dzí ná:
“É baángel bése Nzamá bé kaŋŋe ñí.”
7 Éde,
á mfá baángel aa dzó ná:
“Éñe aa bɔ é baángel beñ bivúŋ,
bébɔ biséññ béñ bá míkaba mí ndúán.”
8 Ve á mfá Mwán aa dzó ná:
“Á Nzamá,
étɔɔ́ édzwée dwe é ne akekwíñ mbéámbéá;
ntúmm édzwée ye á nzósoó éwɔ wá ó ne ntúmm ye édzwée ngɔ́mán dwe.
9 O dziŋ yaá nzósoó,
o víni yaá fe ntsamann metsiŋŋ;
ya dzam te édɔ,
Nzamá,
é Nzamá we,
ya mbwánn mésán
a tɔ́p yaá wa ádaŋ ébá béye nsámá we.”
10 Ya fe ná:
“Á Ntí,
atéé ye átáraga,
wa o ngá téle míbókga míye é sí ñí.
Dzóp dá e ne mbɔann ye é mó mwe;
11 byá ye fe dzáŋ,
ve wa wa lígi;
byém bíse byá ye bɔ miyomm ané etóp,
12 éde amvála ané ekót bá ye vígile,
ya ané etóp byá ye tɔbɔ ntsénán;
ve wa,
o ne kaa átsén,
míbú mywe myá myăá mana ki.”
13 Ve,
á ángel mbé ye baángel a dzó yaá eyɔŋ enziŋ ná:
“Tɔbɔgé ósí á mfá meyóm wɔm akekwíñ ané
ma bɔ mínzínzíŋŋ mywe étéle mebɔ dwe?”
14 Nde se ná ébɔ́ bésesé bé ne mísísim myá bɔ biséññ,
milómán á mfá ávwála ébá bé nkún ñɔŋ akoroga tsígá?