Nkatann fwéñ ye éban ákoroga é ne ya wɔ́
2
Akála te édɔ dá yian ná bí bíra túga dzálá é mam bí wók yaá,
a nza bɔ ná bí lés nzenn.
2 Amú ná,
ngé éfíá baángel bé ngá kɔ́bɔ é ngá tɔbɔ kaa áfógan,
ané ntsamann metsiŋŋ ya mbɔann melɔ́ óse wá ó ngá ñɔŋ fe nzósoó akira,
3 nzá ámvála bía bía ye sáale,
ngé bía bɔ kaa ábís ábímm mora akoroga dí,
édí Ntí a ngá tára bía kat fwéñ?
Bía bí yém yaá fe nguu amú ébá bé ngá ñɔŋ wɔ́;
4 Nzamá ñí eé vé fe ngañiá etéññ evɔ́ɔ́,
átára méndem,
ya biyágán bí mam,
ya méndzaŋ mé mam má lére nguu,
ya fe medás méye á Mfúfúp Nsísim,
ámvála nkómánn weñ ó ne.
Yesus éñe aa koro bía
5 Amú ná,
se baángel ébɔ́ Nzamá a ngá téle éniŋ é nkún bía nzu,
édzwée deba ásí,
édí bía kɔ́bɔ ya dɔ.
6 Ve,
vóm enziŋ mot enziŋ a ngá vé ngañiá eé dzó ná:
“Mot a ne dzé ná o síman ñí,
ngé ná,
é mwán mot ki,
ná o fép ñí?
7 O bɔ yaá ñí ná á tɔbɔ nsilann ósí avítsaŋ álot baángel,
o bwára yaá ñí korona ye dúmá ya ngaŋŋ,
míbɔann mí mam míye é mó mwe,
myá o vé yaá fe ñí edzwée.
8 Waá tɔɔ mam mése édzwée deñ ásí.”
Amú ná niané a ngá tɔɔ́ mam mése édzwée deñ ásí,
eé ndzí lík dzóm enziŋ ná dé sés édzwée deñ ásí.
Ve ye anzukwíñ éndagá,
bía bĭí téa ná byém bíse bí ntɔɔ́ édzwée deñ ásí.
9 Ve bía bía yén éñí a ngá tɔbɔ nsilann ósí oyomm avítsaŋ álot baángel,
é Yesus a ntɔɔ́ ya korona ye á dúmá ya ngaŋŋ ébe mídzuúk míye awú,
amú é mvɔmm Nzamá,
a kyak yaá awú ákála bot bése.
10 Amú é ngá yian ná,
ébe éñí byém bíse bí ngá veleban ákála deñ,
ákála deñ fe byém bíse bí ne,
a ke yaá ya abwiññ bwán á dúmá,
éñe a mana bɔ́ tɔɔ nkomann amú éndáglé éñí a ngá téñ ákoroga deba.
11 Amú ná ané éñí aa téle eki,
ané ébá bé ntɔɔ́ ntélán eki,
bésesé bá sɔ́ ébe mbɔ́ɔ́,
akála te édɔ ăá wú osoán ye á lwée bɔ́ ná bɔbédzaŋ,
12 eé dzó ná:
“Ma ye kat bɔbédzaŋ fwéñ éyola dwe énzénzaŋ ékóánn bot été,
ma ye wa yee byeá bíye á nkaŋaŋŋ.”
13 Aa bera dzó ná,
“Ma ye tɔbɔ ya ñí mebúnn.”
Aa bera dzó ná:
“Dággán,
ma ñí bíabe é bwán Nzamá a vé yaá ma.”
14 Dá é tɔɔ́ ná,
bwán bé ñɔŋ yaá fufúlu ñúu ya mekií,
Yesus ñí aa ñɔŋ fe byɔ fufúlu ntéññ mbɔ́ɔ́,
á mfá ye ná,
ébe áwú deñ,
á tsam é nguu édzwée éñí a ngá dzwée ya awú,
dá yíli ná,
déble;
15 a tɔɔ́ fe filí ébá bésesé,
bé mbé bé tɔɔ́ áloá wɔŋŋ ye áwú táŋ ntéññ eniŋ ngúrá.
16 Amú ná bébélá,
se baángel ébɔ́ aá nzu vwála,
fáve ná aá vwála é mvɔŋ Abraam.
17 Akála te édɔ,
ñí a ngá yian bɔ ntéññ mbɔ́ɔ́ ya bɔbéñaŋ ébe mam mése,
á mfá ye ná á bɔ ntébosú befára bá tɔbɔ ya ñí mebúnn,
a ne fe ya nlém engóngɔ́ɔ́ á mfá ye ébe é mam Nzamá,
ná ávea mísémm bot.
18 Éde,
dá é tɔɔ́ ná émyen ñí aá dzuk ya nyénánn mebóblé,
a belé nguu á mfá ye á vwála ébá bá yén mebóblé.