Yesus aa yian ya ngaŋŋ álot Moisés
3
Á mítɔ́pbán mí bɔbédzaŋ,
amú dzam te,
mína é bot míní ñɔŋ yaá fufúlu ekígá ye á dzóp nsámá mbɔ́ɔ́,
túgán dága Yesus,
ápostol ya ntébosú befára ye á mbwínánn wea bía mem.
2 Éñí a ngá téle ñí,
á mbé a tɔɔ́ ya ñí mebúnn ntéññ mbɔ́ɔ́ fe ané Moisés ébe é ndá bot áse Nzamá.
3 Amú ná é láŋban yaá ná aa yian ya dúmá ádaŋ Moisés;
ntéññ mbɔ́ɔ́ fe ané nlóŋndá a belé ngaŋŋ ádaŋ ndá ébyen.
4 Akála ná ndá ése e ne nlóŋán ya mot enziŋ,
ve éñí aa bɔ mam mése éñe a ne Nzamá.
5 Éde Moisés a mbé éñí bá tɔbɔ ya ñí mebúnn ébe é ndá bot áse ané mbɔ biséññ ébe é ngañiá ye é mam bá ye súgan kɔ́bɔ.
6 Ve Kristo ñí a tɔɔ́ ané Mwán ébe é ndá dzeñ;
é ndá dzeñ te édɔ e ne bía,
ngé bía túga biñ kaa ádzɔgɔ,
mebúnn ya mevágá méye oyan.
Áwaabé é bot Nzamá
7 Dzam te édɔ,
ámvála Mfúfúp Nsísim aa dzó ná:
“Ngé mína wók é kíŋŋ deñ émuú,
8 kaa ábɔan mílém myenan aleét;
amvála ané é tám nsɔŋán méyéá,
é tám mebóblé éyáŋŋ été;
9 é vóm beésúá bé ngá bóble ma,
baá kyak ma,
afáŋbɔ ná bé ngá yén míbɔann myám
táŋ mibú mewóm mé nii.
10 Amú dzam te édɔ me ngá yéá ya myee bot te,
éde me ngá dzó ná,
‘bá vus nzenn mílém myeba été eyɔŋ ése,
béé ndzí ki yem míkómánn myam.’
11 ané me ngá kan sɔŋ ébe méyéá mam ná:
‘Băá ye ñíi áwaabé dam été amvála enziŋ.’ ”
12 Á bɔbédzaŋ,
dággán ná mot enziŋ ye ébe mína a nza tɔbɔ ya ekúkwát nlém ye kaa ábwíni,
á mfá ákánan ya é Nzamá a ne ntétéá.
13 Ve ná,
kada mos,
mína bébyen lépgánán bevɔ́ɔ́ ébe ébá bevɔ́ɔ́,
éyɔŋ bé ngén bá dzó ná,
“Émuú”,
a nza bɔ ná mot enziŋ ye ébe mína a ntɔɔ́ ya nlém aleét akála meduk mé nsémm.
14 Amú ná ébe Kristo bí sɔ́ yaá bɔ beñɔŋ ngap fufúlu,
ngé e ne ná bía biñ nguu mébúnn mea bí ngá tára ya mɔ kaa áfógan akekwíñ asúgánn,
15 éyɔŋ bé ngén bá dzó ná:
“Ngé mína wók é kíŋŋ deñ émuú,
kaa ábɔan mílém myenan aleét amvála ané é tám nsɔŋán méyéá.”
16 Akála ná,
benzá bé ngá wók ñí,
ná baá sɔŋ fe ñí ya meyéá?
Nde se ébá bésesé bé ngá kólo Égipto ya Moisés?
17 Benzá ki Nzamá a ngá yéá ya bɔ́ ébe mibú mewóm mé nii?
Nde se ya ébá bé ngá bɔ nsémm,
míbim myeba myá mí ngá lígi fe mí bóo éyáŋŋ été?
18 Benzá ki a ngá kan ya bɔ́ sɔŋ ná băá ye ñíi áwaabé deñ?
Nde se fáve ébá bé ngá bɔ melɔ́?
19 Éde,
bí téa ná bĕé mbé ñíi été ákála é kaa mbwínánn weba.