4
É tám ngaá ye áñíi áwaabé deñ é ngén dá laŋan,
bí tɔbɔgán ya nkée ná mot enziŋ ye á nsámá wenan a nza súp.
2 Amú ná bía bé kat yaá fe mbamba fwéñ ntéññ mbɔ́ɔ́ ané ébɔ́;
ve éfíá bé ngá kat bɔ́,
deé ndzí bɔ ya bɔ́ abúánn,
akála ná ébá bé ngá wók dɔ,
béé ndzí dɔ fulan ya mbwínánn.
3 Éde bía é bot bí bwíni yaá,
bí ñíi yaá fe áwaabé te,
ámvála a dzó yaá ná:
“Ané me ngá kan sɔŋ ébe méyéá mam ná:
‘Băá ye ñíi áwaabé dam été.’ ”
Afáŋbɔ ná míbɔann myeñ myá bem mana atéé ye á mvelann éniŋ ngúrá.
4 Amú ná vóm enziŋ a kɔ́bɔ yaá aaná,
ébe álú zaŋgbéá:
“Nzamá a ngá waabe álú zaŋgbéá ébe bíséññ byeñ bíse.’
5 Ya fe ná:
“Băá ye ñíi áwaabé dam été.”
6 Dá é tɔɔ́ ná,
é ngén dá dzéŋ ná bot benziŋ bé ñíi été,
ébá bé ngá tára wók mbamba fwéñ béé ndzí ñíi ákála melɔ́.
7 Éde Nzamá a bera yaá téle mos ofé:
“Émuú”,
eé kɔ́bɔ ébe David,
niané abwiññ tám é lot yaá,
ámvála bé tára yaá dzó ná:
“Ngé mína wók é kíŋŋ deñ émuú,
míní táa bɔ mílém myenan aleét.”
8 Akála ná,
ngé Josue á vé bɔ́ áwaabé,
ngé băá bera kɔ́bɔ ya mos mfé ébe melú méye ósú.
9 Édɔ é ne ná,
Sátará enziŋ ye áwaabé a ngén á mfá áyɔŋ Nzamá.
10 Amú ná é mot a ñíi yaá áwaabé deñ été,
émyen ñí a waabe yaá ébe bíséññ byeñ,
ntéññ mbɔ́ɔ́ fe ané Nzamá ñí a ngá waabe ébe áabyeñ.
11 Édɔ ná bí bíragán ádzéŋ ná bí ñíi ébe áwaabé te,
a nza bɔ ná mot enziŋ eé vú efonann melɔ́ te aa kpéñ.
12 Amú ná éfíá Nzamá é ne ntétéá,
dá dzéa fe eséññ mvéáñ,
é ne fe akáp ádaŋ é nzwaokeŋ ése é ne ya nzep é beáñ;
dá túgan akekwíñ dá kána nlém ya nsísim,
moŋ mé ñúu ya nsɔ́msɔ́mŋá,
á mfá ábíli asímánn ya mikómánn míye á nlém été.
13 Éde dzam enziŋ ye é ne mvelann dăá sɔbɔ ébe ású deñ,
ve mam mése mé ne éndendaŋ ya swéswéññ ébe ású é mís éñí bía yian ke ávé táŋ.
Yesus, mora ntébosú befára
14 Dá é tɔɔ́ ná bía bí belé é mora ntébosú befára a ngá ñíi á dzóp été,
Yesus,
é Mwán Nzamá,
éde bí biñŋán nguu mbwínánn wea bía mem.
15 Amú ná bĭí belé ntébosú befára a ne bɔ kaa áwórán áteák dea,
fáve éñí a yén yaá mebóblé memvála mése ané bía,
ve ñí kaa nsémm.
16 Édɔ ná,
ya mebúnn bí keŋán étɔɔ́ édzwée ye abwará bebeñ,
á mfá ye ná bí ñɔŋ nyénánn engóngɔ́ɔ́,
bí koan fe ya ábwará dá vwála bía,
é tám bí ŋga yi yaá dɔ.