5
Amú ná ntébosú befára áse bá tɔ́p,
aa sɔ́ bot été,
ná a bɔ ntébe nzaŋŋ amú bot,
á mfá ye ná ébe é mam Nzamá,
aa ye vé bivévé ya metúnŋa ákála misémm.
2 Éde ñí a ne fe dɔ bɔ ya añep á mfá ébá bé ne midzímán ya ébá bá vus nzenn,
é tɔɔ́ ná émyen ateák dá dá dzwée fe ñí;
3 ya dzam te édɔ aa yian vé ya dɔ metúnŋa ákála misémm,
ané éemyeñ émyen ané émí bot.
4 Éde mot enziŋ ñí ăá ñɔŋ ki ngaŋŋ te ébe émyen,
fáve niané Nzamá a lwée yaá ñí ámvála é ngá bɔ fe ébe Aarón.
5 Néa fe Kristo eé ndzí vé émyen dúmá ná átɔbɔ ntébosú befára,
fáve éñí a ngá dzó ya ñí ná:
“O ne é Mwán wɔm,
mé byéñ wa émuú.”
6 Ámvála aa dzó fe vóm mfé ná:
“O ne fára mbéámbéá
ámvála nsámá Melkisedek.”
7 Éde mélú Kristo á mbé émo éniŋ dzí,
a ngá dzaa ya meyaglán ya míige ya mora dú ébe éñí á mbé ñí koro áwú.
Ané Nzamá a ngá wók ñí ákála ná a mbé belé ya ñí wɔŋŋ ye éki.
8 Éde afáŋbɔ ná a mbé Mwán,
ébe mídzuúk aá yén,
a ngá yága mbɔann mewók;
9 éyɔŋ a ngá mana dzálá édí a ngá yian bɔ,
ané a ngá nzu bɔ nzenn ye ákoroga é ne mbéámbéá ébe ébá bésesé bá bɔ ñí mewók,
10 Ñí a tɔɔ́ ntélán Nzamá ané ntébosú befára,
amvála ané nsámá Melkisedek ó ne.
Ábɔ melɔ́ a ne áŋgónó dzam
11 Ébe édí te,
bí belé abwiññ mam ye ádzó,
ve ayéñ ye ákelan,
dá é tɔɔ́ ná mína míní nzu yaá bɔ miló aleét á mfá áwók.
12 Amú ná ábímm tám é lot yaá dí,
dá é tɔɔ́ ná mína míní ŋga yian yaá bɔ beyágale,
ve dá dá yian ná mot enziŋ a bera mína yágale metáraga mé mam méye bífíá Nzamá,
ya fe ná míní nzu yaá bɔ ébá bá yian ya meñáŋ,
se beñá bidzí.
13 Akála ná éñí áse a ngén aa ñú meñáŋ,
ăá vébán ya nzósoó éfíá,
amú ná a ne nkéŋá mwán.
14 Ve beñá bidzí bí ne á mfá beñá bot,
ébá béte bé mana yaá yem ákála evébánn,
bé ntɔɔ́ fe nkɔkgán á mfá ábíli abé ya mvéáñ.