6
Dá é tɔɔ́ ná,
bí lík yaá ómvús meyágalé méye ósúá ébe Kristo,
bí keŋán ósú á mfá beñá bot,
se ábera ábwíi mbókga ye édzoban biwúwúa míbɔann,
ya édí ye á mbwínánn ébe Nzamá,
2 ya édí ye áyágalé á mfá meduubán,
ya édí ye ábere bot mó,
ya édí ye á nwómán miwúán,
ya édí nkíkgán misaŋ ó ne mbéámbéá.
3 Éde bía ye bɔ dzam te,
ngé Nzamá aa yébe dɔ.
4 Amú ná,
ébá bé tára yaá tɔbɔ éyéá été,
bé kyak dás ye á dzóp,
fufúlu bé ñɔŋ Mfúfúp Nsísim,
5 bé kyak fe é mbamba éfíá Nzamá ya menguu méye mbéámbéá éniŋ á nkún nzu;
6 véa,
bé búlán ómvús,
bot béte bé sés bera búlán á mfá édzoban;
akála ná bébyen bá bera kele é Mwán Nzamá á krús á mfá weba bébyen,
béé lére ñí osoán éndendaŋ.
7 Amú ná,
é sí é ñú yaá é mveŋ da bɔ deé ku été,
niané da féá fe bilwá bí ne ya abúánn á mfá ébá bá beñ dɔ,
da ñɔŋ fe ábwará Nzamá.
8 Ve ngé dá féá miséé ya biyɔɔ́,
dé sés fe ya abúánn eé ntɔɔ́ ná dá ñɔŋ biboŋ,
ané bá súgan dɔ dzígi.
9 Á mindzindziŋŋ atwaa bía kɔ́bɔ néa,
bía bía yem bébélá é mam má daŋ ya mvéáñ,
mé tɔɔ́ fe émá méye ákoroga á mfá wenan.
10 Amú ná Nzamá a sés ekúkwát ye a ne vwían éséññ denan,
ya édziŋŋ míní lére yaá ébe éyola deñ,
é tám mína bɔ míní séan,
míní ngén fe mína séan ya mítɔ́pbán mí bot.
11 Ve bía kómo ná kada mot ye ébe mína,
á léregé amvála nkómánn te,
ná á bwíni,
á tɔbɔ fe ya oyan óse,
akekwíñ asúgánn,
12 á mfá ye ná míní nza bɔ mindéndeát,
ve fáve é bot bá vú ébá ya mbwínánn ya fe edzíp bá ñɔŋ mengaá tsígá.
13 Amú ná éyɔŋ Nzamá a ngá kyaa Abraam ngaá,
a ngá kan sɔŋ ébe émyen,
ákoan ná ñí ĕé mbé kan sɔŋ ébe é mot mfé aa daŋ ñí,
14 eé dzó ná:
“Bébélá,
ma ye wa bíra vé abwará,
ma ye fe wa bíra bɔ ná ó fwiñ.”
15 Éde,
néa éñe Abraam a ngá yana ya edzíp,
ané a ngá ñɔŋ ngaá te.
16 Amú ná,
niané bot bá kan sɔŋ bé túp éñí aa daŋ bɔ́,
éde á mfá weba,
néa éñe nkanann sɔŋ ó ne ya ayílíga,
ó mana fe bisó bíse.
17 Ya dzam te fe,
Nzamá ñí eé túga fe kómo lére beñɔŋ ngaá tsígá ná,
é mam aa kyaa bé sés mɔ tsén,
éde a ngá vé nkanann sɔŋ amvála ané ebánn;
18 á mfá ye ná,
ébe míbɔann mí beáñ mí ne kaa átsén,
ya ébe émyɔ Nzamá a sés bɔ mineá amvála enziŋ,
éde ya mam méte bía bí ne tɔbɔ ya mɔ ya abwiññ mfoŋann mílém,
bía é bot bí ke ya mbíí ná bía biñ óyan ó ntéle bía ósú.
19 Éde émɔ fe bí mbelé ané akon ye á nlém,
édí é ne kaa áfógan é yém fe,
dá ñíi fe akekwíñ étóp áyát,
20 é vóm Yesus a ngá ñíi ákála dea ané é mot ósúá,
a tɔbɔ ntébosú befára mbéámbéá amvála ané nsámá Melkisedek.