Melkisedek a mbé é fára Nzamá
7
Amú ná Melkisedek te,
kéza ye á Salem,
é fára é Nzamá a ne Oyaáp Óyóp,
éñe a ngá ke tóban ya Abraam,
ané a ngá vé ñí abwará éyɔŋ Abraam a ngá búlán ná aa sɔ́ áywíñ bekéza.
2 Éde fe Abraam ñí a ngá kee ñí ngap awóm ye byém bíse.
Éyola deñ,
dá tára yíli ósúá ná,
kéza ye á nzósoó;
véa,
kéza ye á Salem,
é ne ná,
kéza ye á mvwaá;
3 kaa éséá,
kaa ñiá,
kaa mebárán;
mélú meñ mé sés ya atáraga,
éniŋ dzeñ dá kaa ki ya asúgánn,
ve ñí a tɔɔ́ ané é Mwán Nzamá,
aa laŋan fára mbéámbéá.
4 Dággán,
nzá amvála nnén mot te á mbé,
éñí emvámvámm Abraam a ngá vé ngap awóm é byém a ngá dut.
5 Éde e ne ná,
é bwán Leví bá ñɔŋ asúk éséññ fára,
ébɔ́ bé belé mvéná ná bé ñɔŋ méyɔŋ meba été ngap awóm amvála nkɔɔ́ métsiŋŋ wá lére;
dá yíli ná,
ébe bɔbéñaŋ;
afáŋbɔ ná ébá béte bá sɔ́ mékií Abraam.
6 Ve éñí mébárán meñ măá sɔ́ ébe bɔ́,
a ngá ñɔŋ ngap awóm ébe Abraam,
ané a ngá vé fe éñí á mbé a belé mengaá abwará.
7 Éde kaa bisó binziŋ,
é mot a ne omomot aa ñɔŋ ábwará ébe éñí aa daŋ ya nnén.
8 Édɔ ná ó vá,
é bot bá wú bá ñɔŋ ngap awóm;
ve ó wéñ éñí ñí bá vé ngañiá ná a ne ntétéá.
9 Bá dzó fe dɔ néa,
ná ébe Abraam,
Leví éñí aa ñɔŋ ngap awóm,
ñí aá yáán fe dɔ.
10 Amú ná ákoan a ngén á mékií éséá été éyɔŋ Melkisedek a ngá ke tóban ya ñí.
11 Amú ná ngé á bɔ ná édí te é mbé dzálá édí bá sóŋ ya dɔ ébe ásúk éséññ bwann Belevita,
(akála ná ébe mbókga te éwɔ ayɔŋ dá ñɔŋ nkɔɔ́ métsiŋŋ).
É ngá ye bera ábɔ ya asweññ á yá ná,
fára mfé á tébe ané Melkisedek,
bá kaa ki ñí ánɔ́man amvála Aarón?
12 Amú ná éyɔŋ bá tsén ásúk éséññ befára,
dá yian fe ná tsén nkɔɔ́ métsiŋŋ da eé bɔ fe.
13 Akála ná ébe éñí bá kɔ́bɔ ya ñí é mam má a ne éñí ye áyɔŋ afé,
édí ye mbɔ́ɔ́ enziŋ ăá bé bɔ éséññ áltar.
14 Amú é ne éndendaŋ ná Ntí wea a váma yaá ébe Judá,
ébe áyɔŋ Moisés eé ndzí kɔ́bɔ dzam enziŋ á mfá édí dá nama befára.
15 Éde édí dá dá daŋ fe bera tɔbɔ éndendaŋ ná,
ngé fára mfé aa sian ébe éfonann Melkisedek;
16 éñí a veŋan yaá ñí se ébe ákála nkɔɔ́ metsiŋŋ éwí mot binam,
fáve ébe ákála é nguu ye éniŋ é sés mana amvála enziŋ.
17 Amú bá vé ngañiá ná:
“O ne fára mbéámbéá
amvála ané nsámá Melkisedek.”
18 Akála ná,
véa é mvéná ósúá eé kígi yaá,
dá é tɔɔ́ ná e ne ateák ya fe kaa eban.
19 Akála ná nkɔɔ́ métsiŋŋ weé ndzí dzálá édí bá sóŋ,
éde véa bá lére óyan wá daŋ ya mvéáñ,
ébe éwɔ bía yit ya wɔ Nzamá bebeñ.
20 Éde,
dá é tɔɔ́ ná dá deé ndzí ki bɔ kaa nkanann sɔŋ,
21 [ve ébá bevɔ́ɔ́ bé ngá tébe befára kaa nkanann sɔŋ],
ve éñe,
ya nkanann sɔŋ éñí a ngá dzó ná:
“Ntí Nzamá a kan yaá sɔŋ,
ăá ye ki tsén kíŋŋ,
‘wa o ne fára mbéámbéá.’ ”
22 Ya dzam te édɔ Yesus a sɔ́ yaá veŋan ebánn ye élat dá daŋ ya mvéáñ.
23 Ya fe ná,
befára béte bé ngá bɔ abwiññ akála ná awú é ngá dzip bɔ́ ná bé tsíni ya asúk éséññ.
24 Ve ñí aa tsíni mbéámbéá a belé ásúk éséññ fára e ne kaa átsén.
25 Ya dzam te édɔ a ne koro ébá bá ke ébe Nzamá amú éñe,
eyɔŋ evɔ́ɔ́ akekwíñ mbéámbéá,
dá é tɔɔ́ ná aa niŋ mbéámbéá á mfá áyaglan ákála deba.
26 Amú é ngá yian ná bí belé amvála ntébosú befára te:
é mot a ne eki,
kaa bidzo,
kaa mvin,
nkánán ya bebɔ misémm,
a tɔɔ́ fe ededea mbélánn á dzóp été;
27 Ñí ăá yi ná á vé metúnŋa melú mése ané betébosú befára bevɔ́ɔ́;
ósúá ákála mísémm myeba bébyen,
é belan véa ya ákála émí bot;
amú ná éñí te,
ñí aá bɔ édí te eyɔŋ evɔ́ɔ́,
é tám a ngá vé é ñúu deñ émyen metúnŋa.
28 Akála ná nkɔɔ́ métsiŋŋ wá téle mitéteák mí bot ané betébosú befára,
ve nkanann sɔŋ,
éwí ó ngá sɔ́ nkɔɔ́ metsiŋŋ ómvúmvúa wá wá téle Mwán,
éñí aa dzálá édí bá téle ñí ya dɔ,
mbéámbéá.