Mvaŋ ye á mfefeñ élat
8
Éde nsámá medzó bía kɔ́bɔ,
édí dá daŋ é ne ná,
bí belé ámvála ntébosú befára é ngá ke tɔbɔ ósí á mfá meyóm étɔɔ́ édzwée Nzamá á dzóp été;
2 ané mbɔ biséññ ye é byém bí ne eki ya bébélá etɔbɔga,
éñí Ntí émyen a ngá téle,
se mot binam.
3 Amú ná ntébosú befára áse,
a ne ntélán á mfá ávé Nzamá bivévé ya metúnŋa,
édɔ fe dá dá yian ná émyen ñí á belé dzóm ye ávé.
4 Édɔ é ne ná ngé á tɔbɔ é sí ñí,
ngé a sésés ki fára,
akála ná ébá bé ne ntélán ya metsiŋŋ ná bá vé bivévé,
5 ébá béte bé ne bekaŋ béye ovakga ya efonann ye mam méye á dzóp été,
amvála ané bé ngá vé Moisés mbámm eyɔŋ a ngá bɔ ná a nkún téle etɔbɔga,
amú baá dzó ñí ná:
“Túga bɔ byém bíse amvála évagle bé ngá lére wa á nkoó ó yóp.”
6 Ve éndagá,
éñe á mbelé ásúk éséññ fára dá daŋ ya mvéáñ,
amú dá é ntɔɔ́ ná éñe fe a ne mvaŋ ye élat dá daŋ ya mvéáñ,
édí é ntɔɔ́ ntélán amú mengaá má daŋ ya mvéáñ.
7 Amú ná ngé élat ósúá é mbé dzálá édí bé ngá sóŋ,
ngé édí beáñ deé ndzí biñ afóo.
8 Amú ná eé koan ná deé ndzí dzálá,
aa dzó bɔ́ ná,
“Ntí aa kɔ́bɔ ná,
dággán,
melú má nzu
émá ma ye téle mfefeñ elat bíabe é ndá bot Israel
ya fe é ndá bot Judá.
9 Se ámvála elat me ngá bɔ bíabe beésúá
é mos me ngá biñ bɔ́ ó mó,
ná ma vea bɔ́ á sí ye Égipto;
akála ná béé ndzí tsíni ya élat dam,
ané ma me ngá lama fe bɔ́,
néa éñe Ntí aa kɔ́bɔ.”
10 Ya dzam te,
éde Ntí aa dzó ná:
“Niané melú méte má ye lot,
élat dí édɔ ma ye bɔ bíabe é ndá bot Israel;
ma ye tɔɔ métsiŋŋ mam mésímánn meba été,
ma ye fe bɔ́ mɔ tsili mílém myeba été.
Ma ye bɔ é Nzamá weba,
bá bá ye fe bɔ áyɔŋ dam.
11 Éde kada mot ye ébe bɔ́ ăá ye fe vé mɔ́ŋanam weñ ayágalé,
ngé ki kada mot ébe mwanñaŋ,
eé dzó ná:
‘Dzéŋŋe ná o yem Ntí’,
akála ná bésesé bá ye Ma yem,
atéé ye á mɔ́ŋŋ akekwíñ é ñá mot ye énzénzaŋ deba.
12 Amú ná ma ye yén bíkúkwát byeba engóngɔ́ɔ́,
ma kaa ki ábera belé amvála enziŋ mísémm myeba ósímánn.”
13 Éde éyɔŋ aa dzó ná “mfefeñ elat”,
aa lére ná édí ósúá é ntɔɔ́ nnomm,
é dzóm dá é ntɔɔ́ nnomm,
deé ke fe dá bɔ ya ábɔ nnomm,
é ntɔɔ́ bebeñ ye ádzáŋ.