9
Ve ngúrá mfá,
élat ósúá é mbé é belé édí atsiŋŋ dá mánan á mfá nkaŋann,
ya fe é templo e ne eki á sí ó vá.
2 Amú ná etɔbɔga é mbé nkomann aaná,
mfá ósúá éwɔ bé ngá lwée ná é Vóm ó ne Mfúfúp;
été éñe ebele nduná,
téble,
ya mifémm mí ne ya ntélán mam áyát.
3 Éde étɔbɔga,
á mfá beáñ étóp áyát,
éwɔ wá bé ngá lwée ná é Vóm wá daŋ ya Mfúfúp;
4 été éñe á mbé ya áltar koŋ bá dzígi mbwánn enum,
ya árka ye élat é tɔɔ́ mbomann ya koŋ ásesé,
árka été éñe á mbé ya é kɔ́p koŋ e mbé e belé manná ya ntúmm Aarón ó ngá féá,
ya fe bifas mekwá,
ébí bíye élat;
5 árka áyóp ñí ya Kerobín béye á dúmá bé búru áyóp ya ávwéñ deba,
é vóm ndzámann misémm wá dzálában;
ébe mam méte bé sés mɔ táŋele ya nkɔ́bɔ éndagá.
6 Ve mam méte mé mbé nkomann aaná;
tám ése befára bá ñíi étɔbɔga á mfá ósúá ná bá dzálá nkaŋann weba.
7 Ve mfá beáñ,
ntébosú befára etámm éñe aa ñíi été eyɔŋ evɔ́ɔ́ á mbú,
kaa ki áñíi kaa ná a belé mékií á mfá ávé metúnŋa ákála deñ émyen,
ya fe ébe mísémm míye á ndzímán ayɔŋ.
8 Mfúfúp Nsísim aa lére ya dzam te ná,
nzenn ye é Vóm wá daŋ Mfúfúp dăá bé yɔ́ŋbe,
ébe é tám ásesé étɔbɔga ósúá é ngén é téle.
9 Édí te dá e ne ndem ye é tám ñí ná bá vé bivévé ya metúnŋa é byém bí sés tɔɔ kaa bidzo ósímánn éñí aa kaŋ ya byɔ Nzamá;
10 amú e ne fáve bidzí,
ya biñúñú,
ya ásop ya mendzímm mendzaŋ ya mendzaŋ;
ngé ki ná,
édí metsiŋŋ mé bot má mánan,
émá mé ne ntélán akekwíñ é tám mam má ye tɔbɔ nkomann.
11 Ve Kristo ñí a sian yaá ané ntébosú befára ye bembamba bé mam mé ntɔɔ́ mbɔann akála ñá etɔbɔga dá eé daŋ fe ya ndén;
éñí é ne kaa nkomann ya mó mé bot,
dá yíli ná,
se éñí ye mvelann ye é sí ñí;
12 se ki ya mékií beyóm bíkélá,
ngé ki émá bwann beyóm béñát,
ve fáve ya mékií meñ émyen.
Éde a ñíi yaá é Vóm wá daŋ ya Mfúfúp eyɔŋ déá akekwíñ kɔ́mm áse,
néa éñe a ngá mana dzálá akoroga ye á mbéámbéá.
13 Amú ná mékií beyóm bíkélá,
ya émá beyóm beñát,
ya ásuúp mwann ngéá ñát bá fwíi é bot bé kop yaá mvin,
ngé byá tɔɔ́ eki á mfá etɔɔ́ mfúbánn ye ó ñúu,
14 ntéññ avé mékií Kristo,
ñí ya ákála Nsísim o ne mbéámbéá,
a ngá vé émyen ané metúnŋa mé ne kaa ayeŋŋ,
éñe aa ye fúbu ósímánn wenan ébe biwúwúa míbɔann á mfá ye ná míní kaŋ é Nzamá a ne ntétéá?
15 Akála te édɔ,
éñe a ne mvaŋ ye á mfefeñ elat;
éde niané a ngá wú ákála ákoro bot ébe ntsamann metsiŋŋ ó ngá bɔban élat ósúá,
á mfá ye ná ébá bé lwée yaá bé ñɔŋ ngaá ye é tsígá e ne mbéámbéá.
16 Amú ná é vóm tsígá e ne,
dá yian ná é mot aa lík tsígá te á wú.
17 Akála ná tsígá dá nzu bɔ ya eban fáve ya áwú,
amú ná éyɔŋ é mot aa vé tsígá a ngén ntétéá băá búán ya dɔ.
18 Édɔ ná,
atwaa élat ósúá dá deé ndzí ki tára kaa mekií.
19 Amú ná,
niané Moisés a ngá mana táŋele ayɔŋ áse memvéná,
amvála ané nkɔɔ́ métsiŋŋ wá lére,
éde a ngá ñɔŋ mekií beñát,
ya émá beyóm bikélá,
fufúlu ya mendzímm,
bivélé mívwaát mí ntómá ya memvwía mé isopo;
éde a ngá myaman byɔ mítsili nkɔɔ́ metsiŋŋ ya áyɔŋ áse,
20 eé dzó ná:
“Mékií méye élat Nzamá a mánan yaá mína émɔ má.”
21 Amvála te fe a ngá myaman etɔbɔga mekií ya fe é byém bíse bá belan ya byɔ á mfá éséññ ye á nkaŋann.
22 Ya fe bebeñ ná dzóm ése dá tɔbɔ mfúbánn ya mekií amvála ané nkɔɔ́ métsiŋŋ wá mánan.
Éde ngé kaa nkúlánn mekií,
ndzwiiann misémm wá ó sés ki.
Métúnŋa Kristo má vea nsémm
23 Ngúrá mfá,
e ngá yian ná bifonann bí byém bíye á dzóp été bí tɔbɔ mfúbánn amvála te.
Ve mfá mbɔ́ɔ́,
byém bíye á dzóp été bíbyen,
byá byá yian ya metúnŋa má daŋ ya mvéáñ álot émá méte.
24 Amú ná Kristo eé ndzí ñíi Mífúfúp mí Vóm,
émí mí mbé nkomann ya mó mé bot,
émá mé ne bifonann bíye ébí bí ne bebébélá,
fáve ná á dzóp été ébyen,
á mfá áke átébe ósú Nzamá éndagá ákála dea;
25 se ná aa vé émyen ané metúnŋa abwiññ biyɔŋ,
ámvála ntébosú befára aa ñíi é Vóm wá daŋ ya Mfúfúp kada mbú ya éyá mekií.
26 Da é tɔɔ́ ná,
é ngá ye yian ná a yén midzuúk abwiññ biyɔŋ atéé ye é tám eniŋ é ngá tɔbɔ mvelann;
ve áwola dí,
métám méye ásúgánn má,
ñí a váma yaá eyɔŋ evɔ́ɔ́ akekwíñ mbéámbéá,
ná aa tsam nsémm ébe mvéán émyen ané metúnŋa.
27 Éde ámvála dá é ntɔɔ́ ntélán ná bot bá wú eyɔŋ evɔ́ɔ́,
véa,
nkíkgán misaŋ.
28 Ntéññ mbɔ́ɔ́ fe Kristo bé ngá vé ñí ané metúnŋa eyɔŋ evɔ́ɔ́,
ná aa vea mísémm abwiññ bot;
ané aa ye váma éyɔŋ beáñ,
se ákála ávea nsémm,
fáve á mfá ákoro é bot bá yana ñí bé tɔɔ́ evévéñ.