10
Amú ná,
nkɔɔ́ metsiŋŋ ó belé evagle ye bembamba bé mam mé nkún nzu,
se mam méte mébyen;
éde é bot bá kaŋ kada mbú bá vé metúnŋa mevɔ́ɔ́ ya mevɔ́ɔ́,
émá bá bé sés koan ya mɔ é dzam bébyen bá sóŋ amvála enziŋ.
2 Ngé éñe é bɔ néa,
nde ngé mvéán metúnŋa wá kígi yaá?
Dá é tɔɔ́ ná bekaŋ Nzamá,
niané bé tɔbɔ yaá mifúbánn eyɔŋ evɔ́ɔ́,
bá kaa ki fe ábera ábelé nsémm ósímánn.
3 Fáve ná ébe metúnŋa méte,
kada mbú má nzu ya misémm ósímánn.
4 Amú é sés bɔban ná,
mékií beyóm beñát ya émá beyóm bikélá mé vea misémm.
5 Ya dzam te édɔ é tám aa nzu é sí ñí,
aa dzó ná:
“We ndzí kómo metúnŋa ya bivévé,
ve ñúu édɔ ó koman yaá á mfá wɔm.”
6 Bívévé bá dzígi ya metúnŋa ákála nsémm,
weé ndzí byɔ yén mvéáñ.
7 Véa éñe me ngá dzó ná:
“Dággán
‘é ntɔɔ́ ntsilann mítsili été á mfá wɔm ná’
Á Nzamá me sɔ́ yaá a mfá ádzálá nkómánn we.”
8 Éde á tára yaá dzó ná:
“Metúnŋa ya bivévé ya édí bá dzígi ákála nsémm,
weé ndzí kómo,
ngé ki áyén byɔ mvéáñ;
ébí bíte ébyɔ bá vé ámvála nkɔɔ́ métsiŋŋ wá mánan.”
9 Véa éñe,
aá dzó ná:
“Dággán me sɔ́ yaá ná me dzálá nkómánn we.”
Néa éñe aa vea édí ósúá,
ná a téle édí beáñ.
10 Ya nkómánn te,
édɔ bía bí ntɔɔ́ ntélán eki ébe metúnŋa méye é ñúu Yesukristo,
eyɔŋ evɔ́ɔ́ akekwíñ mbéámbéá.
11 Éde ngúrá mfá,
fára áse a téle kada mos eé bɔ ásúk éséññ deñ,
eé vé metúnŋa mevɔ́ɔ́ ya mevɔ́ɔ́ abwiññ biyɔŋ,
émá má mé sés vea misémm amvála enziŋ.
12 Ve ébe ñí te,
niané a ngá vé metúnŋa mevɔ́ɔ́ ákála misémm eyɔŋ evɔ́ɔ́ akekwíñ mbéámbéá.
Éde a ngá tɔbɔ ósí á mfá meyóm Nzamá,
13 atéé ye ó véa,
eé yana,
akekwíñ ané mínzínzíŋŋ myeñ myá bɔ étéle mebɔ deñ.
14 Amú ná ya metúnŋa mevɔ́ɔ́ a dzálá yaá édí bá sóŋ akekwíñ mbéámbéá ébe ébá bé ne ntélán eki.
15 Éde Mfúfúp Nsísim ñí aa vé fe bía ngañiá;
amú aa dzó ná:
16 “Ntí á kɔ́bɔ yaá ná,
élat ma ye bɔ bíabe bɔ́ éyɔŋ melú méte mé lot yaá édɔ dí:
Ma ye tɔɔ métsiŋŋ mam milém myeba été,
ma ye fe mɔ tsili ásímánn deba été.
17 Ma kaa ki fe ábera ábelé amvála enziŋ ósímánn mísémm myeba ya ntsamann metsiŋŋ weba.
18 Ve é vóm bidzwiigá bí ne ébe é mam má,
băá bera vé metúnŋa ákála nsémm.
Angɔmm ya Nzamá
19 Á bɔbédzaŋ,
dá é tɔɔ́ ná bí ntɔɔ́ ya mebúnn á mfá áñíi é Vóm wá daŋ ya Mfúfúp,
amú mékií Yesus.
20 Ébe mfefeñ ya ntétéá nzenn a ngá túp bía,
a túgán étóp áyát,
dá yíli ná,
ya é ñúu deñ.
21 Éde bía bí belé é mora fára a ne ntébosú é ndá bot Nzamá,
22 bí yitgán bebeñ ya nlém mbɔ́ɔ́,
ndzálánn ya mébúnn má sɔ́ ákála mbwínánn;
bíí tɔbɔ fe ya milém ntunán ébe mbéa ósímánn,
é ñúu dea da nsopbán ya mendzímm mé ne mfúbánn.
23 Bí biñŋán oyan bía mem kaa áfógan.
Amú ná éñí a ngá kyaa a ne éñí bá tɔbɔ ya ñí mebúnn.
24 Éde bí túgán dága bevɔ́ɔ́ ébe ébá bevɔ́ɔ́ á mfá ávéán nguu ébe edziŋŋ,
ya ébe bembamba mibɔann.
25 Kaa ádzɔgɔ bíkóánn byea amvála ané bot benziŋ bé mbelé dɔ fúlú,
fáve ná bí lépgánán bevɔ́ɔ́ ébe ébá bevɔ́ɔ́;
ádaŋdaŋ bí ntéa ná mos te ó ŋga yit yaá bebeñ.
26 Amú ngé bía tsini ya nkómánn ná bía bɔ nsémm éyɔŋ bí ñɔŋ yaá nyemann ye édí é ne bébélá,
metúnŋa mé sés fe ákála mísémm,
27 fáve áyana mbéa áŋgónó nkíkgán misaŋ ya é ndúán ndén e nkún dzéa é bot bá síŋ Nzamá.
28 É mot áse aa tsam nkɔɔ́ metsiŋŋ Moisés aa wú kaa engóngɔ́ɔ́ ákála bengañiá bé beáñ ngé ki bé léa.
29 Nzá mora endáglé mína mína tém ná,
aa yian ya dɔ,
éñí aa tsibi é Mwán Nzamá,
aa ñɔŋ fe ané mvin mékií méye élat mé ngá tɔɔ ñí ntélán eki,
aa tea fe Nsísim ye á mvɔmm?
30 Amú bía yem é mot a ngá kɔ́bɔ ná:
“Akunŋa é ne éedam,
ma ma ye dɔ búlu.”
Aa bera kɔ́bɔ ná:
“Ntí aa ye kík áyɔŋ deñ misaŋ.”
31 “Nzá áŋgónó dzam a ne ná o ku é mó é Nzamá a ne ntétéá!”
32 Ve símaŋán mélú ó mvús,
émá niané míní ngá ñɔŋ eyéá,
véa mínaá nzomo bora meyítán ya midzuúk;
33 akekwíñ ané míní tɔɔ́ ané ébá bá ñú meteá ya bindáglé éndendaŋ;
ya fe ná míní nzu yaá saŋan fufúlu mínabe ébá bá bé ngá belan ya bɔ́ ntéññ mbɔ́ɔ́ néa.
34 Amú ná míní ngá yén mibok engóngɔ́ɔ́,
mínaá yébe fe ya mesán ná bé dut mína é byém byenan;
mína bébyen míníí yem fe ná míní mbé míní belé é byém byá daŋ ya mvéáñ,
bíí laŋan fe.
35 Akála te édɔ míní táa ádzɔgɔ mébúnn menan,
émá mé ne ya mora obéá.
36 Amú ná mína yi edzíp,
á mfá ye ná niané míní mana yaá bɔ nkómánn Nzamá,
míní ñɔŋ é ngaá bé kyaa yaá mína.
37 “Akála ná nia avítsaŋ tám,
Éñí aa nzu,
aa ye sɔ́ kaa ki ábem.
38 Ve é nzósoó mot wɔm aa ye niŋ ya mbwínánn;
ngé a búlán ó mvús,
nlém wɔm wá wăá ye ñí yén mvéáñ.”
39 Ve bía bí sés ébá bá búlán ó mvús ná bá dzáŋ fáve ébá bé belé mbwínánn á mfá ábaale bíniŋ byeba.