Mbwínánn
11
Éde,
mbwínánn ó ne átɔbɔ ya mebúnn ná édí bá yana é dzálában,
bébélá ebánn ye édí băá bé yén.
2 Amú ná ya éwɔ,
éde mikúkúmá míye ókuá mí ngá ñɔŋ mbamba ngañiá.
3 Akála mbwínánn,
édɔ bía yem ya dɔ ná eniŋ ngúrá dá tɔbɔ mvelann ya nkɔ́bɔ Nzamá;
dá lére ná,
édí dá yéne deé ndzí sɔ́ ébe é mam má yéne.
4 Akála mbwínánn,
édɔ Abel a ngá vé ya dɔ Nzamá métúnŋa má daŋ ya mvéáñ álot émá Kaín;
amú dzam te édɔ a ngá ñɔŋ ngañiá ná a mbé nzósoó mot,
Nzamá eé vé ngañiá ébe bívévé byeñ.
Akála éwɔ,
afáŋbɔ nwúán,
a ngén aa kɔ́bɔ.
5 Akála mbwínánn,
édɔ bá ke ya dɔ Enok á dzóp,
éñe kaa áwú;
béé ndzí ki koan ya ñí,
amú ná Nzamá aá ke ya ñí;
éde kaa ná bé vea ñí,
aá ñɔŋ ngañiá ná Nzamá a ngá yén ñí mvéáñ.
6 Ve,
kaa mbwínánn bé sés vé Nzamá nlém mesán amvála enziŋ;
amú dá yian ná é mot aa yit Nzamá bebeñ aa yian bwíni ná Nzamá éñe a ne,
ya fe ná a ne Mvé meyáán ye ébá bá dzéŋ ñí.
7 Akála mbwínánn,
niané Nzamá a ngá vé Noé mbámm ébe é mam mé mbé kaa ná mé yéne,
éde ya mewók mé nkaŋann a ngá lóŋ Árka á mfá ákoro é ndá bot dzeñ;
akála te édɔ a ngá vé ya dɔ é sí ñí meku;
ané a ngá nzu ñɔŋ tsígá é nzósoó aa sɔ́ ákála mbwínánn.
8 Akála mbwínánn,
niané Nzamá a ngá lwée Abraam,
éde a ngá bɔ mewók,
eé kólo é vóm á mbé ná a nkún ñɔŋ ané tsígá,
éde a ngá kólo kaa áyem é vóm aa ke.
9 Akála mbwínánn,
aá tɔbɔ ané nnéŋ é sí Nzamá a ngá kyaa ñí amvála ané éyá sí,
eé ke aa tɔbɔ bíbemm bá Isaak ya Jakob,
beñɔŋ tsígá fufúlu béye ngaá fɔ́ɔ́ ya fɔ́ɔ́;
10 Amú ná a ngá yana kísoan,
éñí e belé mbókga ó ne mbéámbéá,
éñí Nzamá éñe a ne nkékéŋŋ ya nlóŋ kísoan.
11 Akála mbwínánn fe,
Sara émyen ñí a tɔɔ́ ekom,
a ngá biñ nguu ye áñɔŋ abum,
atwaa ákoan ná tám miningá é lot yaá ñí;
amú aá ñɔŋ ná éñí a ngá vé ñí ngaá a ne éñí bá tɔbɔ ya ñí mebúnn.
12 Ya dzam te fe,
ébe mot mbɔ́ɔ́ ákoan ñí a ntɔɔ́ fe ané nwú,
mvɔŋ bot e ngá féá amvála ané nɔmɔ atéteñ ye á dzóp,
ya fe kaa táŋ amvála ané nséléga ó ne á nsá máŋ.
13 Bésesé béte baá wú á mbwínánn,
kaa ná bé ñɔŋ méngaá bé ngá kyaa bɔ́;
ve ákoan bé yén yaá mɔ oyaáp,
bé ñɔŋ mɔ ya mesán;
béé mem fe ná bé ne beyéŋ ya belot nzenn é sí ñí.
14 Amú ná ébá bá kɔ́bɔ amvála mam méte,
bá lére éndendaŋ ná bá dzéŋ é sí deba bébyen.
15 Éde ngé é bɔ ná bé ngá bɔ béé síman é sí bé ngá kólo,
ngé bá belé fe tám ye ábúlán.
16 Ve éndagá bé ngá dzéŋ é sí dá daŋ ya mvéáñ;
éñí é ne éñí ye á dzóp.
Ya dzam te édɔ Nzamá ñí ăá wók ki osoán ná bé lwée ñí ná é Nzamá weba;
ákála ná ñí a koman yaá fe bɔ́ ngúrá kísoan.
17 Ákála mbwínánn,
édɔ niané bé ngá kyak Abraam,
ané a ngá vé Isaak ané metúnŋa,
éde á ŋga vé metúnŋa é mwán mbɔ́ɔ́ ya mbɔ́ɔ́ weñ é ngá ñɔŋ mengaá;
18 ébe mwán te éñe bá bé ngá kɔ́bɔ ya ñí ná:
“Ébe Isaak éñe bá ye lwée ná é mvɔŋ dzwe.”
19 Ñí a ngá ñɔŋ ná Nzamá a ne téle mot atwaa béwú été;
éde édí te fe,
é tɔɔ́ amvála ané efonann,
ñí aá bera ñí ñɔŋ.
20 Ákála mbwínánn fe,
édɔ Isaak a ngá bwárán ya dɔ ya Jakob bá Esau,
atwaa ébe mam mé mbé ná mé nkún nzu.
21 Ákála mbwínánn,
édɔ Jakob a tɔɔ́ ná á ŋga wú yaá,
a ngá vé kada mwán ye é bwán José abwará,
éde a ngá kaŋ Nzamá aa yágá á ntúmm weñ áyóp.
22 Ákála mbwínánn,
édɔ José a tɔɔ́ ná á ŋga wú yaá,
a ngá kɔ́bɔ á mfá nkólánn bwann bé Israel,
a lík fe bɔ́ meyáán ébe bíveés byeñ.
23 Ákála mbwínánn,
édɔ niané Moisés a ngá byála,
beéséá baá swala ñí táŋ ngwan é léa;
amú bá yén ná mwán te a mbé mbeŋ,
bá kaa ki ákɔ átsiŋŋ Kéza wɔŋŋ.
24 Ákála mbwínánn,
édɔ niané Moisés a ngá ku mot,
aá tep ná bé lwée ñí ná é mwán Faraón ngwan deñ.
25 Ve aá tɔ́p ná aa yén bindáglé fufúlu bábe áyɔŋ Nzamá álot ná áyén é mvéáñ da sɔ́ ya nsémm ye é ne kaa átɔbɔ.
26 Éde aá ñɔŋ ná méteá Kristo émɔ mé ne ákúmm dá daŋ mitam míye Égipto;
amú ná é mís meñ mé mbé mé bem óbéá.
27 Ákála mbwínánn,
édɔ a ngá kólo ya dɔ Égipto,
éñe kaa ákɔ méyéá Kéza wɔŋŋ.
Amú ná a mbé a yém ná séŋŋ amvála ané é mot a téa éñí a ne kaa áyéne.
28 Ákála mbwínánn,
édɔ a ngá téle ya dɔ Paskua ya ámyam mekií,
á mfá ye ná éñí a ngá ywíñ mitóó mí bwán á nza nama éebeba.
29 Ákála mbwínánn,
édɔ bé ngá kígán ya dɔ Évélé Máŋ été ané á nkót sí;
éde niané Begipsio byá bí ngá vak dɔ,
ané bé ngá mana wú méndzímm été.
30 Ákála mbwínánn,
édɔ mífim mékwá míye á Jerikó mí ngá ku ya dɔ,
niané bé ngá mana myɔ aboman táŋ melú zaŋgbéá.
31 Ákála mbwínánn,
édɔ endendea miningá Raab é ngá bɔ kaa áwú ya dɔ fufúlu bábe bebɔ melɔ́;
amú ná aá ñɔŋ ya mvwaá nsámá bot ó ngá ke fas sí asweññ.
32 Nzá dzam afé ma ye bera kɔ́bɔ?
Amú ná tám da ye ma dzéŋ á mfá ye ná me kaŋle édí Gedeón,
ya Barák,
ya Sansón,
ya Jefté,
ya David,
ntéññ mbɔ́ɔ́ ané édí Samuel,
ya fe édí bekúlu medzó;
33 ébá béte ákála mbwínánn,
édɔ bé ngá wún ya dɔ bidzwée bí ngɔ́mán bíye mésí,
éde bé ngá bɔ édí é ne nzósoó,
ané bé ngá ñɔŋ ndzálánn mengaá,
éde bé ngá dzip bemgbemgbem menu;
34 ané bé ngá dzím nguu ndúán,
éde bé ngá sáale nzep nzwaokeŋ,
ané bé ngá veŋan mingungúú áteák été,
éde bé ngá veŋan biywá bí bot á melúmán,
ané bé ngá tsílán fe ya mísámá mélúmán beyín.
35 Éde biningá bé ngá yén béwú beba béé wómo míwúán;
ve ébá bevɔ́ɔ́ bé ngá wú ákála eyíra,
bá kaa ki áyébe akoroga,
á mfá ye ná bé ñɔŋ áwómó dá daŋ ya mvéáñ.
36 Ve ébá bevɔ́ɔ́ bé ngá ñú kpógo ya eyíra,
akekwíñ nkáán ya bekalamekéná ya fe mibok.
37 Ébá bevɔ́ɔ́ bá bé ngá lúm mekwá,
ásik bɔ́ ya sɔɔ,
ané bé ngá yén mebóblé,
éde bé ngá wú ya nzwaokeŋ,
ané bé ngá wulu bé sɔ́ áká bé ne áká bé baga bikop mítómá ya bikop bikélá,
bá kaa mam ó mó,
awú ya midzuúk ya fe bindáglé.
38 Éniŋ dí dĕé ngá yian ya amvála bot béte.
Ébɔ́ béé wulu kaa áke simsim vóm,
bíyáŋŋ été,
mikoó été,
mífuu mékwá ósí,
ya míbií míye á sí été.