Mélépgá Ntí
12
Édɔ é ne ná,
é tám bí mbelé ábímm mora nsámá bengañiá ó yala bía méféŋŋ wí,
bí weagán ó féñ é mvaba ése,
ya nsémm wá mana bía ká.
Bí máragán ya edzíp é nzenn dá swée bía ósú;
2 mís má mé bem bía ébe Yesus,
éñí a ngá téñ ya á sóŋán mbwínánn wea;
éñe a ne é mot a ngá nzomo osoán ye á krús,
aá ñɔŋ dɔ ané avítsaŋ,
ákála mésán mé mbé ñí ósú,
éde a ke yaá tɔbɔ ósí á mfá méyóm étɔɔ́ édzwée Nzamá.
3 Túgán ádága é mot a ngá nzomo ébe émyen ámvála meteá é ngá sɔ́ ñí ébe bebɔ misémm,
á mfá ye ná míní nza teak,
ngé ki ákílán á milém myenan été;
4 atwaa mélúmán míní belé ya nsémm,
mínăá bé mɔ ánzomo akekwíñ ané mína kúlu mekií.
5 Éde míní vwían yaá mfoŋann mílém aa vé mína ané bwán ná:
“É Mwán wɔm,
o táa ñɔŋ ané avítsaŋ áyágalé Ntí,
o táa ki ákílán ya ñí éyɔŋ aa bwaale wa;
6 akála ná Ntí aa yála ya melépgá é mot aa dziŋ,
aa vé fe akira éñí áse aa ñɔŋ amvála ané mwán.”
7 Éde ébe melépgá mína nzomo,
é ne ná,
Nzamá ñí aa belan fe ya mína amvála ané bwán.
Amú ná Mwán mbé a ne ná éséá ăá vé ñí melépgá?
8 Ve ngé mínăá ñɔŋ melépgá,
émá bwán bése bé ñɔŋ yaá,
míní ntɔɔ́ éyá bwán,
mína kaa fe bɔ é bwán beñ.
9 Ya fe ná,
bía bí mbé fe bí belé betará éniŋ dzí,
béé vé bía melépgá ané beyágale bea,
bía bí ngá vé fe bɔ́ ngaŋŋ.
Ntéññ avé bía bía yian daŋ áku éséá ye á misísim ásí,
éde véa bía ye niŋ?
10 Amú ná ébɔ́,
bé ngá vé bía melépgá ámvála bé ngá yén dɔ mvéáñ fáve ayomm melú;
ve ñí aa bɔ dɔ akála é mvéáñ dea,
ná bía bí ñɔŋ ngap fufúlu bíabe bɔ́ ébe eki deñ.
11 Ve melépgá menziŋ ye é tám ñí mé sés é dzam bá sán ya dɔ,
fáve ná mitéñ;
véa dá wúm bibumá bíye á mvwaá ya éniŋ é ne tételé,
ébe ébá bé mana yaá vébán ya dɔ.
12 Éde mína mitéteák mí mó,
ya fe mebɔ́ŋŋ mé teak yaá,
ñɔŋŋán nguu;
13 yɔ́ɔgán ménzenn mé ne tételé á mfá mébɔ menan,
ná éñí aa fígle a nza filan,
fáve ná a let.
14 Dzéŋŋán etɔɔ́ mvwaá ya bot bése,
ya fe átɔbɔ eki,
kaa édí te,
mot enziŋ ăá ye yén Ntí.
15 Túgán dága ná mot enziŋ a nza súp é mvɔmm Nzamá;
ndzi ye nlém eywiññ enziŋ wá ó nza féá ná ó nzu ya midzuúk,
ó mana fe kop abwiññ bot.
16 Mbɔ nsémm eveák enziŋ ñí a táa ki ábɔ,
ngé ki éñí aa niŋ tugá amvála ané Esau,
éñe a ngá kuan étɔɔ́ ntóó deñ ya námm mbɔ́ɔ́.
17 Amú mína yem fe ná ósú véa,
éyɔŋ a ngá kómo ñɔŋ tsígá abwará,
éde bé ngá tep ñí,
é mbé fe koan ya afóo ye édzoban,
afáŋbɔ ná á ngá bíra dɔ ádzéŋ ya míige.
18 Akála ná míníí ndzí yit bebeñ á nkoó,
éwí bé ngá nama,
ngé ki é ndúán e ngá yóŋ,
ngé ki ya nkút dzíbi,
ngé ki edwá dzíbi,
ngé ki okos,
19 ngé ki elɔ́ŋŋ tɔ́ŋ,
ngé ki á nkɔ́bɔ ó ngá sɔ́,
akekwíñ ná ébá bé ngá wók wɔ́,
bé ŋga dzaa engóngɔ́ɔ́ ná bé táa bera kɔ́bɔ ya bɔ́.
20 Amú ná bĕé mbé nzomo édí bé ngá mánan bɔ́ ná:
“Atwaa é tsít ye áfan ése,
ngé da nama nkoó te,
da ye wú ya nlúmán mekwá.”
21 Édí bé ngá yén é mbé ededea áŋgónó,
ané Moisés ñí a ngá dzó ná:
“Ma fógan beñeñeá ákála wɔŋŋ.”
22 Ve mína,
míní yit yaá á nkoó Sión bebeñ,
é kísoan é Nzamá a ne ntétéá,
é Yerusalen ye á dzóp,
ékóánn binzuk bí baángel,
23 ékóánn bebwíni mitóó mí bot,
ébá bé ne ntsilann á dzóp été,
ya é Nzamá a ne nkík misaŋ bot bése,
ya mísísim benzósoó bé bot ébá bé mana yaá dzálá édí bá sóŋ,
24 ya Yesus,
mvaŋ ye á mfefeñ elat,
ya mékií mé myaman yaá,
émá má kɔ́bɔ mvéáñ álot émá Abel.
25 Dággán ná míní táa tep éñí aa kɔ́bɔ ya mína.
Amú ná ngé ébá béte béé ndzí sáale éyɔŋ bé ngá tep éñí a ngá lép bɔ́ é sí ñí,
ntéññ avé bía,
bía bĭá ye ki sáale ngé bía lúm mvús éñí aa lép bía atéé ye á dzóp.
26 É kíŋŋ deñ e ngá suk sí melú méte,
ve a kyaa yaá éndagá eé dzó ná:
“Ma ye bera suk,
se fáve sí etámm,
ve ná ya fe dzóp.”
27 Éde nkɔ́bɔ wí ná:
“Ma ye dɔ bera,”
dá lére ná é byém byá sukban,
é byém bí ne mvelann byá ye kólo;
á mfá ye ná é byém bí ne kaa sukban ébyɔ bí tɔbɔ.
28 Ya dzam te édɔ,
bía ñɔŋ ya dɔ édzwée ngɔ́mán é ne kaa sukban,
bí biñŋán mvɔmm,
éñí bía kaŋ ya dɔ Nzamá ya wɔŋŋ ye éki,
ya fe ededea ngaŋŋ ámvála dá vé ñí nlém mesán.
29 Akála ná é Nzamá wea a ne é ndúán da dzéa ásesé.