Kaa ádzálá mikómánn míye éniŋ dzí
4
Melúmán ya mitéé byá sɔ́ óvé énzénzaŋ denan?
Nde se éñe byá sɔ́ bívéé bíye á nlém wenan été,
ébí byá lúman mésúk mé ñúu menan été?
2 Mína ñamle,
ve mínĭí belé.
Ákála evínn mína ywíñ bot,
ve míní sés ki ñɔŋ;
amú dzam te,
édɔ mína bɔ mikéá ya melúmán.
Mínĭí belé,
amú ná mínăá dzaa.
3 Mína dzaa,
ve mínăá ñɔŋ;
amú ná mína dzaa ya mbéa nlém,
ná mína ke ywíñ ntuk ébe bívéé byenan.
4 Á bebɔ medzíán!
Nde mínăá yem ná átsinan amvwíññ ya éniŋ dzí,
é ne ásiŋ Nzamá?
Amú dzam te,
é mot aa kómo tsinan amvwíññ ya eniŋ dzí,
aa veŋan nzínzíŋŋ Nzamá.
5 Ye mína tém ná Ntsili wá dzó á nzeze ná,
“Ya ededea abéánn,
Nzamá aa dziŋ Nsísim a ngá tɔɔ bía mílém été?”
6 Ve aa vé é mvɔmm dá daŋ.
Amú dzam te édɔ,
aa dzó ná,
“Nzamá a téle é bot bé ne bingúŋ
á ngamm áyát,
ve,
aa vé é bot bé ne nsilann ñúu ósí mvɔmm.
7 Édɔ ná,
kpáán Nzamá ásí,
ve míní tɔɔ́ fe kaa fógan ébe ású déble,
véa aa ye túp mbíí ébe mína.
8 Yitgán Nzamá bebeñ,
véa éñe fe ñí aa ye mína yit bebeñ.
Á bebɔ misémm,
fúbugán é mó menan,
tunŋán fe milém myenan,
mína é bot míní ne ya milém mí beáñ.
9 Tɔbɔgán ya eywiññ,
ya meyep,
yigán fe.
É lweñ denan dá súgan ebi,
mésán menan má eywiññ
10 Ásilann ñúu ósí ósú Ntí,
véa éñe aa ye mína bére ó yóp.
Mvé metsiŋŋ a ne fáve mbɔ́ɔ́
11 Á bɔbédzaŋ,
míní táa kɔ́ban abé bevɔ́ɔ́ ya ébá bevɔ́ɔ́.
É mot aa kɔ́bɔ mwanñaŋ abé ngé ki ákík ñí nsaŋ,
nkɔɔ́ metsiŋŋ éwɔ aa kɔ́bɔ abé,
nkɔɔ́ metsiŋŋ fe aa kík nsaŋ;
ve ngé wa wa kík nkɔɔ́ metsiŋŋ nsaŋ,
o sés fe éñí aa dzálá nkɔɔ́ metsiŋŋ,
fáve nkík misaŋ.
12 Mot mbɔ́ɔ́ éñe ñí a ne mvé metsiŋŋ ya fe nkík misaŋ;
éñe a ne ewólo á mfá ya ná a ne koro ya fe áywíñ.
Ve wa o ne nzá á mfá ye ná wa kík é mot mbɔ́ɔ́ nsaŋ?
Kaa ábɔ mevágá ya dzam ye ookírí
13 Túgán béá éndagá,
mína é bot mína dzó ná,
“Émuú ngé ki ná ookírí,
bía ye ke é kísoan ñí,
ngé ki éñí fɔ́ɔ́,
bía ye fe tɔbɔ ó véa táŋ mbú mbɔ́ɔ́,
bíí bɔ akira,
bíí wún fe miséŋŋ.”
14 Dá é tɔɔ́ ná mína kaa áyem ámvála éniŋ dá ye mína bɔ ookírí,
amú ná bíniŋ byenan bí ne amvála ané ebúbút ye ótsírá édí dá yéne fáve oyomm abɔ́ŋŋ tám,
véa dá é dzáŋ fe.
15 Ve mína míní lígi dzó ná,
“Ngé Ntí aa yébe,
bía ye niŋ,
véa bí bɔ dzam osí ngé ki dzam okee.”
16 Ve,
mína míní ŋga vága yaá ébe áléran denan.
Amvála mevágá méte mé ne ekúkwát.
17 Édɔ ná é mot aa yem bɔ édí é ne mvéáñ,
ve ñí kaa dɔ bɔ,
bá láŋ ñí dɔ nsémm.