Mikúkúmm myá ñɔŋ mbámm
5
Á mikúkúmm!
Túgán béá éndagá,
yigán,
lɔ́ŋŋán fe bibi,
ákála ná eniŋ midzuúk é ntɔɔ́ ná dá nzu ébe mína.
2 Akúmm denan é mana yaá bweñ,
bitóp byenan byá bí ntɔɔ́ fe ndzíán ya sígbém.
3 É koŋ ya é ngoós denan,
bí mana yaá biñ míngéle,
míngéle te éñe aa ye mína bɔ é ngañiá a ne mína á ngamm áyát,
éñe fe aa ye mína dzí ñúu ané ndúán.
Amú ná ébe melú ma súgan,
míní mana yaá kóán akúmm.
4 Dággán,
ntáŋ bebɔ biséññ bé mvá mína bɔ eséññ méfúp,
míní ñím yaá bɔ́ wɔ,
wá wá yón fe mína á ngamm áyát,
míyónn bebɔ biséññ béte myá mí kwíñ yaá fe melɔ́ Ntí ye á misámá melúmán.
5 Míní mana yaá niŋ biniŋ bíye á mefét,
ya fe biniŋ bíye ndzálánn bívéé tugá á sí ó vá.
Néa éñe míní mana yaá fe átɔbɔ ya mevɔ́ŋ mína bébyen amvála ané é tsít bá ye kík ngúrá mos.
6 Míní vé yaá nzósoó mot meku,
míní ywíñ yaá fe ñí,
ve ñí kaa ávagle ná aa kam ya émyen.
Edzíp dá vé mbamba asúgánn
7 Édɔ ná,
á bɔbédzaŋ,
belégán edzíp akekwíñ ásɔ́ɔ́ Ntí.
Yénŋán amvála ané mbeñ afúp aa yana bembamba bibumá bíye ó sí,
a tɔɔ́ ya dɔ edzíp akekwíñ ná aa ñɔŋ é mveŋ ósú ya éñí da súgan.
8 Mína belégán fe edzíp.
Yémŋán mílém myenan nguu akála ná ásɔ́ɔ́ Ntí é ntɔɔ́ bebeñ.
9 Á bɔbédzaŋ,
míní táa bɔ miswa bevɔ́ɔ́ ya ébá bevɔ́ɔ́ ná bá bé nza fe mína kík nsaŋ.
Dággán ná nkík misaŋ á ntéle á mbéñ!
10 Á bɔbédzaŋ,
ñɔŋŋán ané efonann ye mbéa midzuúk ya edzíp édí bekúlu medzó bé ngá kɔ́bɔ éyola Ntí.
11 Dággán ná bía ñɔŋ ná bé ne abwará é bot bé ngá nzomo.
Míní wók yaá édzíp Job,
míní yén yaá fe édí Ntí a ngá súgan ñí bɔ,
ná Ntí a ne ndzálánn ya añep ya fe nlém engóngɔ́ɔ́.
12 É bɔbédzaŋ bam,
édí dá daŋ é ne ná,
kaa kanan sɔŋ,
ané á dzóp,
ngé ki á sí,
ngé ki amvála nkanann sɔŋ enziŋ afé;
ve é “ma yébe” wenan a bɔɔ́ge “ma yébe”,
é “móamó” wenan ñí á bɔɔ́ge fe “móamó”,
á mfá ye ná míní nza ku á nkíkgán misaŋ été.
Meyaglán má vé mbamba asúgánn
13 Ngé mot enziŋ ye énzénzaŋ denan aa dzuk,
á bɔɔ́ge meyaglán.
Ngé mot enziŋ aa sán,
á yeegé byeá bí olugú.
14 Ngé mot enziŋ énzénzaŋ denan aa kwan,
á lwéegé betébosú béye ékóánn bebwíni bé yaglan fe ya ñí,
béé wáa ñí mbwánn ébe éyola Ntí.
15 Éde meyaglán méye á mbwínánn má ye koro nkúkwann,
Ntí ñí aa ye fe ñí téle;
ngé e ne bɔ tám enziŋ ná a bɔ yaá misémm,
myá myá ye fe ñí tɔbɔ ndzwiiann.
16 Édɔ ná,
memŋán mísémm myenan bevɔ́ɔ́ ya ébá bevɔ́ɔ́,
míní yaglan fe bevɔ́ɔ́ ya ébá bevɔ́ɔ́ á mfá ye ná míní tɔbɔ mvwaá.
Méyaglán nzósoó mot mé ne ededea nguu ébe éséññ má bɔ.
17 Elías ñí a mbé fe mot ntéññ mbɔ́ɔ́ ané bía,
a ngá bíra yaglan á mfá ye ná mveŋ é táa nɔ́ŋ,
mveŋ dá deé ndzí ki ku ó sí táŋ mibú mí léa ya ngwan é saman.
18 Ve éde a ngá bera yaglan,
ané dzóp é ngá vé mveŋ,
sí da eé ŋga vé fe bíbumá byeñ.