Áyem ádzwée anu
3
É bɔbédzaŋ bam,
abwiññ bot ye ébe mína é táa dzéŋ ná é bɔ beyágale,
amú mína yem ná bía bía ye ñɔŋ nkíkgán misaŋ wa daŋ.
2 Amú ná bía bésesé bía bía bɔ fe bivuzá memvála ya memvála.
Ngé mot enziŋ a ne ná ăá bɔ evuzá á nkɔ́bɔ,
a ne tételé mot,
a ne fe ya nguu ye áfét ñúu ngúrá.
3 Ve ngé bía dzwée mikalbeñ bíí vé myɔ akofet ménu,
néa éñe myá bɔ bía mewók,
véa bí ŋga wulu fe ya é ñúu deba áse.
4 Dággán fe bora mébyéa,
atwaa mé ne bidedea menén,
bívúŋ bí ne nguu ébyɔ fe byá byá tsíni mɔ,
ve oyomm mwann angáp éwɔ wá fét mɔ á mfá áke é vóm ndulu byéa aa kómo ná ó ke.
5 Néa fe anu dá é ne,
oyomm asúk ñúu,
ve dá vága ya bora bé mam.
Dággán,
nzá amvála bora áfan dá dzík ya oyomm ndúán!
6 Éde anu dá e ne ndúán,
édí é ne éniŋ áse ye é ne ekúkwát;
dá é tɔɔ́ énzénzaŋ mesúk mé ñúu mea,
ve dá bwala ñúu ngúrá,
é ŋga bwaa nzenn ye éniŋ ngúrá ndúán,
é ŋga yóŋ fe ya ndúán ye ébéññ ndúán.
7 Akála ná amvála tsít ye áfan áse,
ya anwann,
ya bétsít bá dulu mebum ósí,
ya fe ébá béye á máŋ été,
bé ne bɔ́ dzwée,
mwann mot a dzwée yaá fe bɔ́.
8 Ve mwann mot enziŋ a sés dzwée anu.
É ne ábé bé sés báma,
é ne fe ndzálánn ya nsu ye áwú.
9 Ya édɔ bía vé ya dɔ Ntí ya Éséá olugú,
ya fe édɔ bía boŋle ya dɔ bot,
ébá bé ne mvelann ye éfonann Nzamá.
10 Ébe anu avɔ́ɔ́ ya avɔ́ɔ́,
olugú,
ya fe biboŋ byá kwíñ.
É bɔbédzaŋ bam,
édí te dăá yian bɔban néa.
11 Ye ná afɔ́m dá kúlu mendzímm mé ne avwéñ ya fe émá mé ne eyós ébe anu etam avɔ́ɔ́ ya avɔ́ɔ́?
12 Á bɔbédzaŋ,
ye elé igera é ne vé ebumá olíba,
ngé ki ndzík vino wá ebumá igera?
Éde anu etam avɔ́ɔ́ dá é sés ki bɔ ya eyós ya avwéñ.
Kén ye ó yóp
13 Nzá a ne ya kén ya nyemann énzénzaŋ denan?
Mot te á léregé dɔ ya é mbamba fúlú deñ ébe míbɔann myeñ á kén ya évwévwé nlém été.
14 Ve ngé mílém myenan myá mí ne ya mbéa abéánn ya aléránn,
míní táa bɔ engúŋ,
míní táa ki bɔ mineá ébe bébélá.
15 Amvála kén te dăá sɔ́ á yóp été,
fáve ná éñí ye é sí ñí,
éñí ye á nlém mot binam,
ya fe éñí déble.
16 Amú ná é vóm abéánn ya aléránn bí ne,
ó véa a ne ya nzamzámánn mam ya fe mbɔann óse ó ne abé.
17 Ve kén ye á yóp été,
ósúsúá e ne mfúbánn,
é belan véa,
édziŋŋ mvwaá,
ya añep,
ya fe nló ntakgán,
ndzálánn ya nlém engóngɔ́ɔ́,
ya bembamba bibumá,
kaa átsígán,
kaa bɔ meduk.
18 Ve ébumá ye á nzósoó bá beñ dɔ á mvwaá été,
ébe é bot bá tɔɔ bot mvwaá.