Mídzuúk Ápostol
2
Ve wa,
é mwán wɔm,
ñɔŋŋe nguu ébe é mvɔmm é ne ébe Kristo Yesus.
2 Éde é mam o wók yaá ébe ma ébe ású abwiññ bengañiá,
keegé mɔ bébébélá bé bot bá ye tɔbɔ nkɔkgán,
á mfá ye ná bá bé yágale fe é bot bevɔ́ɔ́.
3 Ñɔŋŋe ngap ébe nyénánn bindáglé amvála ané é mbamba mwann bénzima Kristo Yesus.
4 Mot enziŋ ye a ne eséññ bénzima ăá tsinan ya éséññ okira efé ye éniŋ dzí,
á mfá ye ná á vé é mot a ngá ñɔŋ ñí éséññ bénzima nlém mesán.
5 Ntéññ mbɔ́ɔ́ fe,
é mot aa ke mekatan,
ăá wún ngé ăá ke mekatan amvála ané metsiŋŋ méye été mé ne.
6 Mbeñ mefúp aa bɔ eséññ,
aa yian bɔ é mot ósúá ye aa ñɔŋ ngap bibumá.
7 Túga síman é mam ma kɔ́bɔ ya wa má,
amú ná Ntí éñe aa ye wa vé fak ébe dzam áse.
Mídzuúk Kristo
8 Símaŋán Yesukristo,
éñí a wómo yaá miwúán été,
mot ye é mvɔŋ bot David,
amvála ané é mbamba fwéñ wɔm a ne,
9 Akála te édɔ fe ma dzuk ya bindáglé,
akekwíñ ya nkeán mibok,
amvála ané mbɔ abé.
Ve éfíá Nzamá é sés á mbok.
10 Ya dzam te édɔ,
ma nzomo ásesé ákála mitɔ́pbán mí bot,
á mfá ye ná bá bé ñɔŋ fe akoroga ye mbéámbéá dúmá é ne ébe Kristo Yesus.
11 Bébélá efíá éñe ñí ná:
Amú ná ngé bí wú yaá bíabe bɔ́,
bía ye fe niŋ bíabe bɔ́.
12 Ngé bí tɔbɔ yaá mbán,
bía ye fe dzwée bíabe bɔ́.
Ngé bía kat ñí,
ñí aa ye fe bía kat.
13 Ngé bí sés bebébélá bé bot,
ñí aa laŋan bébélá mot,
amú ná a sés kat émyen.
Minéneá beyágale
14 Vá bɔ́ osímánn é mam má,
weé kpéá bɔ́ ósú Nzamá ná,
bé sáale mikéá mí ne kaa eban,
akála ná mí sés ya abúánn enziŋ,
myá myá ke fe ya é bot bá wók myɔ ádzímlé.
15 Wámyen wa bíragá fe dzéŋ ná o téle wámyen ósú Nzamá o tɔɔ́ nkyabán,
mbɔ biséññ ĕé belé dzam enziŋ ye áwók osoán,
eé túga lére tételé bébélá efíá.
16 Ve sáalé é nzeze nkɔ́bɔ é ne kaa mfí,
amú ná dá ye keéke ya mot á ékúkwát été;
17 é nzeze nkɔ́bɔ deba da ye mana ñeŋ amvála ané mora ebɔɔ́ fóó,
néa éñe Emeneo bá Fileto bé ne,
18 ébá béte bé lés yaá á bébélá été,
béé dzó ná nwómán miwúán ó bɔban yaá,
éde bé ngá nzaman mbwínánn bot benziŋ.
19 Ve,
é ñá mbókga Nzamá ñí á téle kaa áfógan,
wa ó belé sitám te,
“Ntí aa yem é bot bé ne áabeñ,”
ya,
“Édɔ,
éñí áse aa lwée éyola Ntí á kólogé ékúkwát été.”
20 Édɔ é ne ná á mora ndá été dĕé sés fáve ya bibyetga bí koŋ ya ngoós etámm,
ve a belé fe bibyetga bilé ya ébí sí,
bivɔ́ɔ́ binziŋ bí ne á mfá ábelan ya byɔ ya ngaŋŋ,
ébí bivɔ́ɔ́ byá á mfá nzeze mbelán.
21 Ya dzam te,
ngé mot enziŋ aa tɔbɔ mfúbánn ébe é mam má,
aa ye bɔ ébyetga é ne á mfá ngaŋŋ,
ntélán eki,
ya eban ébe Mása,
nkomann á mfá mbamba mbɔann óse.
22 Vé,
túpge bívéé bíye étɔɔ́ ndómán,
dzéŋŋe nzósoó,
ya mbwínánn,
ya edziŋŋ,
ya mvwaá,
fufúlu ya é bot bá lwée éyola Ntí ya nlém mfúbánn.
23 Tépge medzó mé akúkút ya émá midzímán,
weé yem ná má sɔ́ ya mitéé.
24 Éde éñí aa séan ya Ntí ñí ăá yian bɔ mot mikéá,
fáve ná é mot a ne esós ébe bot bése,
nkɔkgán á mfá ávé ayágalé,
ya fe edzíp.
25 Éde eé vé melépgá ya mbamba nlém ébe é bot bá sóánn,
ngé e ne bɔ tám enziŋ ná Nzamá aa vé bɔ́ édzoban dá ke ya bɔ́ ná bé ñɔŋ bébélá;
26 éde ngé bé biñ kén,
bé túp ólám déble,
éñí bé ntɔɔ́ mikómm á nkómánn weñ été.