1 TIMOTEO
É Kálara Ósúá Timoteo
Pablo aa bérán
1
Pablo ápostol Yesus,
amvála ané é Nzamá nkoro wea á ngá mánan,
ya Ntí Yesus óyan wea,
2 ébe Timoteo,
ñá mwán ye á mbwínánn:
Mvɔmm,
ya nyénánn engóngɔ́ɔ́,
ya é mvwaá Tará Nzamá ya Kristo Yesus Ntí wea bí tɔbɔgé ya wa.
Bembéa meyágalé
3 Me ngá dzaa wa éyɔŋ me ngá ke á Masedonia,
ná ó lígi Éfeso,
á mfá ye ná ó mánan bot benziŋ ná bé táa vé amvála áyágalé afé,
4 bé táa ki béá mengann,
ya mébárán mé bot mé ne kaa kígi,
ébí byá nzu ya bisó bí ne kaa eban,
bí lígi sɔ́ ya mbamba ntélán mam Nzamá,
éwí ó ne ákála mbwínánn.
5 Ve édí ayágalé dá sóŋ,
é ne édziŋŋ dá sɔ́ á nlém ó ne mfúbánn ya mbamba osímánn,
ya fe mbwínánn ó ne kaa meduk.
6 Ébe mam méte,
bot benziŋ bé mana yaá dzími nzenn,
bé ŋga ke bá bee benzeze mikɔ́bɔ;
7 béé kómo ábɔ beyágale métsiŋŋ,
ébɔ́ kaa yemyém édí bá kɔ́bɔ,
ngé é mam bá bán ya nguu.
8 Ve bía bía yem ná nkɔɔ́ métsiŋŋ ó ne mvéáñ ngé mot aa belan ya wɔ ámvála é ne ntélán;
9 béé yem ná,
nkɔɔ́ métsiŋŋ wĕé sés ntélán ákála tételé mot,
ve fáve ákála betsam metsiŋŋ,
ébá bé ne miló abé,
be kaa ngaŋŋ,
bebɔ misémm,
be kaa ákɔ Nzamá wɔŋŋ,
beniŋ tugá,
beywíñ beéséá,
beywíñ beñiá,
beywíñ bot,
10 bebɔ nsémm eveák,
béfám bá yénán bábe ébá bevɔ́ɔ́ amvála ané biningá,
bebɔ okira ya bot,
minéneá,
bekan sɔŋ minéa été,
ya éñí áse mfé á ne bébélá áyágalé á ngamm áyát,
11 ámvála é mbamba fwéñ ye á dúmá ye Nzamá ye ábwará á ne,
éñí bé téle yaá ma.
Pablo aa lugu Kristo
12 Ma vé Kristo Yesus Ntí wea akíba éñe a vé yaá ma nguu.
Amú ná éñe aá ñɔŋ ma ná me ne nzósoó mot,
a téle ma ané mbɔ biséññ Nzamá;
13 afáŋbɔ ná ma tará bɔ mot abyann,
ya ndzéŋŋ bot ásí,
ya mvé bot ekán;
ve aá yén ma engóngɔ́ɔ́ akála ná me ngá bɔ dɔ á ndzímán été,
ya kaa ábwíni.
14 Ve é mvɔmm Ntí wea,
daá bíra fwíige ya mbwínánn,
ya fe édziŋŋ é ne ébe Kristo Yesus.
15 Éfíá dí é ne tételé,
bá yian fe dɔ yébe áse,
ná:
Kristo Yesus aá sɔ́ é sí ñí ná aa nzu koro bebɔ misémm,
éde ébá béte ma me ne éñí ósúá.
16 Ve ya dzam te,
édɔ maá koan ya dɔ nyénánn engóngɔ́ɔ́,
á mfá ye ná ma Kristo Yesus á tára lére édzíp deñ ése,
amvála ané ndem ye ébá bé nkún ñí bwíni ébe éniŋ é ne mbéámbéá.
17 Édɔ ná,
ébe é Kéza a tɔɔ́ kɔ́mm áse,
kaa ábweñ,
kaa ki áyéne,
éñe etámm a ne Nzamá,
á tɔbɔgé ya ngaŋŋ ya dúmá,
átára mbéámbéá ye akekwíñ mbéámbéá.
Amén.
18 Á mwán,
wá Timoteo,
é dzam dí édɔ ma mánan wa,
ébe ámvála nkúlánn medzó ó ngá tára kwíñ ébe wa,
ébe éwɔ,
ó bɔ mbamba mélúmán mé mwann bénzima;
19 weé baale mbwínánn ya mbamba osímánn,
ébe émá méte bot benziŋ bé tep yaá mɔ,
bé mana yaá fe kúbán á mbwínánn été.
20 Ébá béte ébɔ́ bé ne Emeneo bá Alejandro,
ébɔ́ me ngá kee Sátan,
á mfá ye ná bé ñɔŋ melépgá méye ná bé táa bera ákɔ́bɔ ya abyann.