Áyaglan
2
Édɔ ná,
ósúsúá,
ma lép ná bé bɔ ndzaá mam,
ya meyaglán,
ya ásíli mam ákála bot befé,
ya ávé akíba á mfá bot bése;
2 ébe é mvéáñ bekéza,
ya fe é bot bése bé ne bítɔɔ́ bídzwée,
á mfá ye ná bí niŋ sí edzagá ya milém mí bóo bía ósí,
ya nkaŋaŋŋ Nzamá óse,
ya ésémm ése.
3 Édí te é ne mvéáñ ósú Nzamá Nkoro wea,
aa yébe fe dɔ;
4 éñe aa kómo ná bot bése bé tɔbɔ nkoránn,
bé nzu fe átúga áyem bébélá.
5 Amú ná Nzamá a ne mbɔ́ɔ́,
mvaŋ ñí a ne fe mbɔ́ɔ́ énzénzaŋ Nzamá ya bot,
Kristo Yesus,
mot binam.
6 Éñe a ngá vé é ñúu deñ émyen
ané ntáŋ ákoroga ákála bot bése,
é ngañiá bé vé yaá ébe
métám mé ngá yian.
7 Ya ngañiá te éñí bé téle yaá ma nkat fwéñ,
ya apostol (ma kɔ́bɔ bébélá ébe Kristo,
măá bɔ mineá),
ya nyágale meyɔŋ mefé,
á mbwínánn ya á bébélá été.
8 Édɔ ná ma kómo ná befám bé yaglan mevóm mése,
béé bére mifúfúp mí mó ó yóp,
kaa meyéá ngé ki mikéá.
9 Á mfá mbɔ́ɔ́,
biningá bá bé tɔbɔgé mbwátán á ngaŋŋ été,
ya tételé osímánn,
ya kén;
se ya nkomann miló wá loran,
ngé ki ya koŋ,
ngé ki ya mekwá mé perla,
ngé ki bítóp byá bíra bɔ táŋ ndén;
10 ve fáve ya bembamba míbɔann,
ámvála dá yian ya é biningá bá dzó ná bá kaŋ Nzamá.
11 Miningá á bɔɔ́ge eé yága a tɔɔ́ evóvóó,
ya nsilann ñúu ósí.
12 Ve măá lík ná miningá ávé ayágalé,
ngé ki ná a belé edzwée ébe fám,
fáve ná aa yian tɔbɔ evóó.
13 Akála ná Adán éñe bá tára vele,
ó mvús véa,
Eva.
14 Se Adán éñe ki bá duk,
ve miningá éñe bá mana duk,
a kpéñ á nsémm été.
15 Éde aa ye tɔbɔ nkoránn eé byéñ bwán,
ngé aa tɔbɔ á mbwínánn été,
ya édziŋŋ été,
ya étɔɔ́ eki été,
a tɔɔ́ fe ya kén.