TITO
É Kálara Tito
Mebéránn
1
Ma Pablo,
óloá Nzamá ya ápostol Yesukristo,
amvála ané mbwínánn mítɔ́pbán mí bot Nzamá ó né,
ya fe nyemann ye édí é ne bébélá,
ákála bébélá nyébé,
2 ébe oyan ye éniŋ é ne mbéámbéá,
édí é Nzamá a ne kaa ábɔ mineá a ngá tára kyaa,
kaa ná mvelann byém ó bɔ.
3 Éde,
niané é tám déñ e ngá kwíñ,
a dzálá ngaá te ébe nkatann efíá bé téle yaá ma,
amvála ané é mvéná Nzamá Nkoro wea e ne.
4 Ébe Tito,
é ñá mwán wɔm ye á mbwínánn ó ne bía fufúlu:
Abwará ya mvwaá atéé ye ébe Tará Nzamá,
ya ébe Kristo Yesus Nkoro wea.
Méfúlú betébosú
5 Akála te édɔ,
me ngá lík wa ya dɔ á Kreta,
á mfá ye ná ó mana kom é mam mé ngá lígi má buk ósí,
ya fe ná o téle betébosú ébe kada kísoan amvála ané me ngá mánan wa.
6 Dá yian ná mot te,
á bɔ kaa bidzo,
é fám e belé ngéá mbɔ́ɔ́,
é bwán beñ béé tɔɔ́ bebwíni,
kaa ná bá sɔ́mán bɔ́ ná bá niŋ túga ngé ki miló abé.
7 Amú ná ntébosú aa yian bɔ é mot a ne kaa bidzo,
a tɔɔ́ amvála ané éñí aa belan ya é mam Nzamá,
kaa ábéle émyen ó yóp,
kaa áyéá avóó,
kaa mfían meywa,
kaa mbɔ mitéé,
kaa ki éñí aa ñɔŋ ábúánn dá sɔ́ á mbémbéa menzenn.
8 Fáve ná aa yem ñɔŋ beyéŋ,
ya ádziŋ édí é ne mvéáñ,
ya átɔbɔ ya kén,
nzósoó mot,
é mot a ne eki,
ya ádzwée nlém weñ émyen,
9 eé túga baalé bébélá efíá,
amvála ané áyágalé é né;
á mfá ye ná ñí á tɔbɔ fe nkɔkgán ye álép ya áyágalé é ne mvwaá ya álére é bot bá bɔ bisó évuzá deba.
10 Amú ná abwiññ bot é ne bebɔ melɔ́,
bekɔ́bɔ nzeze mikɔ́bɔ,
ya beduk bot,
ádaŋdaŋ ébá béye á nkíkgán akeé;
11 ébá béte dá yian ná bé dzíp bɔ́ menu,
amú ná bá nzaman mendá mé bot migúrá,
béé yágale é mam mé ne kaa áyian,
á mfá ye ábúánn dá sɔ́ á mbémbéa menzenn.
12 Mot mbɔ́ɔ́ ye ébe bɔ́,
nkúlu medzó weba bébyen,
a ngá dzó ná,
“Tám áse Bekretense bé ne minéneá,
bembéa bétsít béye áfan,
bedzí bidzí ya bivovoba.”
13 Ngañiá te a ne bébélá.
Akála te édɔ,
ábíra bɔ́ bwaale ya ngét,
á mfá ye ná bé tɔbɔ mvwaá á mbwínánn été;
14 kaa ábéá mengann Bejudio,
ya fe mémvéná mé bot má vea bot á bébélá été.
15 Mam mésesé mé ne ná fúmm á mfá ébá bá bé ne fe ná fúmm;
ve á mfá ébá bé ne nwúán ntuk ya fe ébá bé ne kaa ábwíni,
dzam enziŋ é sés bɔ́ ná fúmm;
fáve ná atéé ye ásímánn deba akekwíñ milém myeba mí ne bɔ́ nwúán ntuk.
16 Bá mem ná bá yem Nzamá,
ve ya mibɔann myeba bá sóán ya ñí;
bé ne ébá bot bá víni,
bebɔ melɔ́,
bá kaa ki eban á mfá mbɔann enziŋ ye ó ne mvéáñ.