Katge fwéñ éfíá Nzamá
4
Ma kpéá wa ósú Nzamá ya édí Ntí Kristo Yesus,
éñí á ntéle ná a nkún kík betétéá ya bewú misaŋ,
ákála ásian deñ ya fe édzwée ngɔ́mán deñ.
2 Katge éfíá,
tɔbɔgé nkomann ané éyɔŋ tám e ne mvéáñ ya éyɔŋ tám e ne abé,
ásóŋán,
ávé mbámm,
ávé melépgá ya abwiññ edzíp ya ayágalé.
3 Amú ná tám da ye kwíñ,
éñí bot bá ye bɔ kaa ánzomo áyágalé é ne bébélá,
fáve ná ámvála mikómánn myeba bébyen mí ne,
bá ye kóán beyágale bá kɔ́bɔ bɔ́ é mam bá dziŋ bá wók;
4 béé vea bébélá á melɔ́ meba été,
bé ŋga veŋan á mengann.
5 Ve wá,
tɔbɔgé ya kén ébe mam mése,
nzomoŋé midzuúk,
bɔɔ́ge eséññ nkat mbamba fwéñ,
dzálágé fe éséññ Nzamá dwe.
Mebúnn bekrísten
6 Akála ná me ntɔɔ́ bebeñ ná bá swii ma ané bivévé,
é tám ma ke da é kwíñ yaá fe.
7 Me bɔ yaá mbamba meyítán,
me mana yaá mékatan mam,
me baale yaá fe mbwínánn.
8 Atéé ye éndagá,
bé nii yaá ma korona ye á nzósoó;
éñí Ntí,
nzósoó nkík misaŋ,
aa ye ma kee mos te;
se fáve ma etámm,
ve ya fe ébá bésesé bá dziŋ ásian deñ.
É mam má súgan
9 Bíragá dzéŋ ná ó dzíga ma nzu yén.
10 Amú ná,
ya ádziŋ éniŋ dzí,
Demas a lama yaá ma,
á kéñ á Tesalonika;
Kresente ñí á Galasia,
Tito ñí á Dalmasia,
11 fáve Lukas etámm éñe a ne bía ñí.
Ñɔŋŋe Markos,
o sɔ́ mína ñí,
akála ná a ne ma ya eban á mfá éséññ Nzamá.
12 Ve Tikiko maá lóm ñí Éfeso.
13 Éde éyɔŋ wa nzu,
nzaá ya ekót me ngá lík á Troas ébe Karpo,
ya fe mitsili,
ádaŋdaŋ émí bikop bétsít.
14 Alejandro,
nlwíñ bikyeñ,
a bɔ yaá ma abé abwiññ,
Ntí éñe aa ye ñí vé méyáán má yian ya mibɔann myeñ.
15 Wa tɔbɔgé fe ñí ya nkée;
akála ná,
a bíra yaá ke é fwéñ bía kat á ngamm áyát.
16 Eyɔŋ ósúá me ngá vé eyalann,
mot enziŋ ĕé mbé á mfá wɔm,
fáve ná bésesé bá mana ma lama;
bé táa ki bɔ́ áláŋ ebúk te.
17 Ve Ntí éñe á mbé á mfá wɔm,
éñe fe a ngá vé ma nguu,
á mfá ye ná ébe ma,
nkatann fwéñ ó dzálában ye fe ná bot bésesé béye meyɔŋ mefé bé wók.
Éde me ngá tɔbɔ nkoránn ébe ánu mgbemgbem.
18 Ntí éñe aa ye ma koro ébe mbéa mbɔann óse,
éñe fe aa ye ma baale á mfá ébe édzwée ngɔ́mán ye á dzóp deñ.
Éñe á tɔbɔgé ya dúmá mbéámbéá ya mbéámbéá.
Amén.
Mibóló myá súgan ya meyáán
19 Bérágán ya Priska bá Akila,
ya é ndá bot Onesíforo.
20 Erasto aá lígi á Korinto,
ve Trófimo ñí ya maá lík nkúkwann á Mileto.
21 Bíragá dzéŋ ná ó nzu kaa ná metám mé mveŋ ya avép bí sian.
Ewubulo aa bérán ya wa,
ya Pudente,
ya Lino,
ya Klaudia,
ya fe bɔbédzaŋ bésesé.
22 Ntí á tɔbɔgé ya nsísim we.
Mvɔmm é tɔbɔgé ya mína.