Awókgán ékóánn bebwíni été
5
O táa vé ñá mot mbámm ya ngét,
fáve ná vá ñí melépgá ané éséá;
bendómán,
bá ané bɔbéñɔŋ,
2 beñá biningá bá ané beñiá;
bengwan bá ané bekéá ya mfúbánn nlém óse.
3 Vá mikús mi biningá ngaŋŋ,
émí mí ne beñá mfaŋ mikús;
4 ve ngé nkús miningá enziŋ ó belé bwán ngé ki bendeñ,
bébyen bé táragé dzálá esémm ébe é mvɔŋ bot dzeba ya ábúlu beéséá mbeŋ,
akála ná édí te,
Nzamá aa yén dɔ mvéáñ.
5 Ve éñí á ne ñá mfaŋ nkús,
a lígi yaá fe a tɔɔ́ etámm,
eé tɔbɔ fe Nzamá mébúnn,
a tɔɔ́ fe mbán ná aa síli Nzamá ya ábɔ meyaglán alú ya omos.
6 Ve éñí ñí aa kee émyen á mfá éndendea eniŋ,
a ntɔɔ́ nwúán éniŋ dzí.
7 É mam má,
émɔ,
vá ayágalé á mfá ye ná bé tɔbɔ kaa bidzo,
8 Ve ngé mot enziŋ aa bɔ kaa áyem ábaale bívúvúmán byeñ,
ádaŋdaŋ bot béye é ndá bot dzeñ,
mot te a tep yaá mbwínánn,
a ne fe mbéa mot álot éñí a sés mbwíni.
9 É miningá bá nii á kálara mikús été,
a ne éñí á lot yaá mibú mewóm mé saman,
a mbé fe a belé nnóm mbɔ́ɔ́;
10 a belé ngañiá ye bembamba míbɔann;
ngé aá yala bwán,
ngé á ngá yem ñɔŋ bot,
ngé aá sop mitɔ́pbán mí bot mebɔ,
ngé aá vwála é bot bá yén midzuúk,
ngé aá dzéŋ fe ná ábɔ é dzam áse é ne mvéáñ.
11 Ve o táa yébe mikús mí biningá mí ngén bengwan,
amú ná éyɔŋ bivéé bíye á nlém weba byá kána bɔ́ ya Kristo,
bá kómo ke mélúk;
12 néa éñe bébyen bá ñɔŋ meku,
ákála ná bá tsam é ngaá bé ngá tára kyaa.
13 Ya fe ná,
bé ŋga tára niŋ ané bivovoba,
béé ke bá ñíi mendá ya mendá,
ve se fáve eniŋ bivovoba,
ya fe ná eniŋ miswa ya áduman,
béé kɔ́bɔ é mam măá yian.
14 Ya dzam te édɔ,
ma lére ná ébá bé ngén bengwan bé biningá,
bé kéŋ mélúk,
bé byéñ bwán,
bé ŋga baale méndá meba;
néa éñe bá ye bɔ kaa ávé nsíŋ afóo enziŋ á mfá mbéa nkɔ́bɔ.
15 Amú ná mikús mí biningá minziŋ mí dzími yaá nzenn,
mí ŋga bee yaá fe Sátan.
16 Ngé mbwíni miningá enziŋ a belé mikús mí biningá,
á vwálagé myɔ,
ya fe ná ekóánn bébwíni é táa ñɔŋ mbaga te,
á mfá ye ná,
é vwála ébá bé ne beñá mfaŋ mikús.
17 Betébosú bá dzwée mvéáñ,
bé belégé bɔ́ ané ébá bá bíra yian ya ngaŋŋ,
ádaŋdaŋ ébá bá bíra séñ á mfá nkatann éfíá ya ávé ayágalé.
18 Amú Ntsili wá kɔ́bɔ ná:
“Éña dá kwa bidzí,
wăá ye dɔ dzip dzóm ánu,”
mbɔ biséññ ñí aa yian fe ya ntáŋ weñ.
19 O táa yébe bisɔ́mán bá vé ébe ntébosú,
fáve ngé é ne ya bengañiá bé beáñ,
ngé ki bé léa.
20 Ébá bá tsíni á nsémm été,
bwaalé bɔ́ ósú bot bése,
á mfá ye ná ébá bevɔ́ɔ́ bá bé kɔ fe wɔŋŋ.
21 Ma bíra wa súgan vé melépgá ósú Nzamá,
ya Ntí Yesus,
ya fe mítɔ́pbán mí baángel ná,
ó baale mémvéná má,
kaa mɔ átára fas,
kaa ábɔ dzam enziŋ weé ke ngamm
22 O táa bere mot enziŋ mó mbíí ya mbíí,
o táa ki ñɔŋ ngap ébe éyá misémm;
baalé wámyen nkeññ.
23 O táa tsíni ná wa ñú fáve mendzímm etámm,
á mfá ábum dwe ya ábwiññ akwann dwe ñá fe oyomm vino.