Minéneá meyágalé
4
Ve Nsísim aa kɔ́bɔ sáŋsáŋ ná:
Mélú má ye súgan bot benziŋ bá ye tep mbwínánn,
bé ŋga ke bá bee misísim méduk ya méyágalé bembéa misísim,
2 ya méduk minéneá mí bot mí mbelé ósímánn aleét ané ekyeñ;
3 béé kili mélúk,
ya fe bídzí Nzamá a ngá vele,
ébí ya mvéán akíba bebwíni bá dzí byɔ,
ya ébá bé túga yaá yem bébélá.
4 Amú ná é dzóm ése Nzamá a ngá vele é ne mvéáñ,
băá yian ki tep dzóm enziŋ ye bá dzí béé vé akíba;
5 akála ná dá tɔbɔ eki ya éfíá Nzamá ya meyaglán.
Pablo aa vé Timoteo meyágalé
6 Niané wa lére bɔbédzaŋ é mam má,
wa ye bɔ é mbamba mvwála bíséññ Ntí Yesus,
o tɔɔ́ ndzálánn ya melépgá méye á mbwínánn,
ya fe é mbamba ayágalé o túga yaá ábee.
7 Ve tépge nzeze mengann,
ya émá miyomm mí biningá.
Wa yémŋe fe lwíñ wámyen ébe nkaŋann Nzamá
8 Amú ná álwíñ ñúu é ne ya oyomm abúánn,
ve nkaŋann Nzamá wa ó ne ya abúánn ébe dzam áse,
akála ná ó ne ya ngaá ébe éniŋ dzí ya édí é nkún nzu.
9 Tételé efíá éñe ñí,
dá dá ñep fe ná bé yébe ñí.
10 Akála ná dzam te édɔ bía bíra séñ ya dɔ bíí yém nguu,
amú ná mébúnn mea mé ne ébe é Nzamá á ne ntétéá,
éñe á ne Nkoro bot bése,
ádaŋdaŋ ébá bé ne bebwíni.
11 É mam má,
émɔ wa mánan ya ávé ayágalé.
12 Mot enziŋ ñí a táa ki wa byana akála ná ó ngén ndómán,
fáve ná wámyen tébegé ané efonann énzénzaŋ bebwíni,
á nkɔ́bɔ,
á fúlú,
édziŋŋ,
á mbwínánn,
ya nlém mfúbánn.
13 É tám măá bé sian,
nzomoŋé nláŋán mítsili,
ya ávé melépgá,
ya ávé ayágalé.
14 O táa tɔbɔ ngeé ya é mvɔmm e ne ébe wa,
éñí e ngá kalan ébe nkúlánn medzó ya mbélánn é mó mikúkúmá.
15 Weé túga fas é mam má,
émɔ tɔbɔgé fe mbán été,
á mfá ye ná bot bése bé yén amvála ané éséññ dá ke ósú ébe wa.
16 Tɔbɔgé ya wámyen ya nkée ya fe meyágalé;
tɔbɔgé mbán ébe é mam má,
akála ná weé dzálá mɔ,
wa ye koro átára ya wámyen ya fe é bot bá béá wa.